Zomi leh 2015 Kitelpi (Zomi leh NLD)

Zomi leh 2015 Kitelpi (Zomi leh NLD)

Dear Zomi pih teng,
Tuikhang, memcip hun, Lamka lam ah e sanggam te buai mah mah hun lai tak a hi phial zong in, e phuk khak lo a pha mawh ding kitelpi pen November ciang hong tung ding hi mawk a hih man in, Zomi ten vai kin tampi nei mah ta leng, kawlgam Zomi te a ding a thupi ding khat a hih man in Kawlgam ki tel na tawh ki sai tawm ki khup dih ni e.

Tua party vote (mee) pia ni/pia un hong ci nuam keng in, ahi zong a thu thei sa in pia ni hong ci nuam in (Make informed decision). E tel bang a ngah ding e hih man in, kua vote (mee) pia ding ci pen hoih tak ngaih sut tak mah mah sa ing.Kei bel Zomi khat ka hih na tawh Zomi bulphuh (Only Zomi for Zomi Only) ZCD a thapia khat ka hih man in ka lai at pen khat vei vei a lang hong lek kha phial zong in, a hi thei pen in kei theih sun sun party tuam tuam te thu hong hawm sawm nuam ing. E theih tek ki kum tek leng vote pia ding ten a deih uh tel thei ding hi. Ka theih sun sun a nuai a bang in khen 5 suah in hong at ning.

1. Zomi leh NLD
2. Zomi leh USDP
3. ZCD – Only Zomi for Zomi Only
4. Zomi leh Other parties (Chin Parties/ NUP…)
5. 2015 Kitelpi pai zia (2015 Election)

Kum 5 sung hong uk ding kumpi tel theih ding hunpha ngah e hih man in, hoih tak ngaih sun in meltheih vai peuh tawh vote pia lo in, a thu tel tak in vote(mee) pia tek leng, nang leh kei nung tak khua sak zia hong khel zo ding hi. Ken bel party/MP te kamciam(promise) cih te pawl bel um khin khol kheng in, party policy din mun, a sem ngei sa, a piang sa thu te tung tawm in a tam zaw kong at ding hi.

Zomi leh NLD

NLD leh DASSK (Daw Aung San Suu Kyi) pen kawl gam democracy ngah na ding in mipi leh gam dang te pawlpih a a ngah pen mi/party cih pen e thei sa tek hi. Zomi te in NLD party te vote (mee) piak huai ta tak hiam?

NLD ten ki tel na hong zo uh hang tu lai tak a thukhunpi(constitution) tawh DASSK President hong suak tuan lo ding hi. Tua hi leh kua NLD president candidate hi ding. Mi lam et bel U Tin Oo a hih kei leh U Win Htein hi kha ding hi ci hi ven. NLD te kumpi hong sem leh Zomi te bang ei ci tam (Impact on Zomi Community) ci e ngaih sut thei ding in NLD leh NLD ma kai mi te thu tawm ki kum leng.

1. DASSK pen leitung bup in thupi a sak mi khat hi. Ken zong thupi sa mah mah ing. A hi zong a mah zong kawl te mah hi a, a mau tung bek ah e ki ngak leh bel khial thei ding hi hang ci pen tu ni ciang a sem na te ah tampi ki mu thei hi. Ni dang a thong khiat lai leh tun MP khat hong hih ciang a sep a pau zong tam pi hong ki lam dang khin ta hi.

Kachin gal vai ah, kam khat zong pau lo/ pau nuam lo hi. A thong khiat lai tawh ki bang nawn lo hi. Kumpi hong sem leh bang ciang hong ki khel lai tam?

A thong khiat lai in tri-party talk (kumpi, democracy lam te, tazinta lam te) pen lim gen a, MP a suak ciang 4 party talk (President, Amy, Parliament, DASSK) lim gen a, tazinta te hong nawl khin ta hi. Kumpi hong sem le uh bang ciang hong ki khel lai tam?

Kei bang in bel Gen. Aung San ka um lo mah bang in DASSK zong um tuan lo hing. Ei Zomi a tampi in zong Gen. Aung San pen kawlgam independent leader ci in thupi a sa ki tam mah mah a, tua pen bel a ta tak in kawl te hong kem na (brain-wash) a hi lel hi. Kawl te a ding in mi thupi hi mah a, a hi zong Zomi te a ding bang mah a man phat na om sa keng.

Nung Tedim hong pai lai in tayinta allaince te tawh ki tel ciang ki dem lo ding ci in, mipi dawt na dawng hi cih na sim kha ngei ing. Tu tak ciang CRPP member mun teng bek ah ki dem lo ding ci hi. Hi zong kamciam pel ki ci thei lo ding maw? um zo lai ding maw Zomi te? A ta tak in bel CRPP member e cih te bel 1990 kum lai pek a, a zawh lo sa uh hi lel hi ven. A ngap lo man vua, pau lap zong maw leh?

A hi zong kawl gam Makai ding pen kawl te mah hong hih kul ding a, tua te sung pan bel DASSK mah hoih pen leh thupi sa pen ve ve ing.

2. U Tin Oo
NLD party a ding a senior mah mah khat hi a, a hi zong tek mah mah ta hi. Kum 90 kim pha khin hi.
A man bel President ut keng ci ci phot sam hi.

U Tin Oo pen 1974 U Than hun lai sangnaupang te buai lai in kawlgam gal kap mang pi (Command-in-Chief) a sem lai tak hi. A ma gen ki ci ka zak ngei khat pen Zomi te ciam teh huai mah mah sa ing. A ma leh man lo bel ken zon a ki cian in thei tuan keng. A hi zong a ki gen gei thu khat in “1974 hun lai a sangnaupang te a kap gal khat te pen Chin gal kap (Tamadaw sung a om Chin gal kap te) te hi” ci in gen ngei ci mawk in, tua bang mi khat in uk na nuai/party nuai ah Zomi te bel lung ngaih huai kha ding hi.

3. U Win Htein
Hi pa zong gal kap lui mah hi a, a tang thu ka tam theih kei hi.

4. CEC (Central Executive Committee) te leh a sep na te uh en leng tha ngah huai khol lo hi.
Tu nai mah mah in zong MP candidate (lawtdaw a mat ding) tel dan pen, a mau sung mah mah na ngawn a hoih ki sa lo in a tawp tawh a ki hawl khia tawh tha ngah huai het lo hi.
5. Zo Bawi. Zo Bawi pen NLD Chin State president hi a, NLD in zo leh Chin State kumpi (Chief Minister) hong suak thei ding hi. Hakha mi hi. A tang thu a ki ciang in ka theih lo hang, Zomi hong deih sak in bel za ngei keng. NLD pan training neng, hamphat na no khat peuh om leh Hakha/ThanTlang mi te mah ma sak hi ci ciang bel za ngei in. Zomi ten tua bang mi khat Chin State Chief Minister ding in tel ding e hi hiam? U Hung Ngai tawh tam ki lam dang khol lo ding hi. Hung Ngai zong hoih zaw lai thei maw? (Zomi te tung ka ci na).

6. MP Candidates te
DASSK na gawn in MP Candidate te en kei un, NLD bek en in mee hong pia un ci ci leng. A MP Candidates te uh gi na lo hi ci pen tel mah mah hi ding hi. A tel CEC te zong gi na sa lo ci na hi lel hi.

Mipi deih democracy makai min thang U Ko Ko Gyi zong MP Candidate ding in sang nuam lo uh hi. Kei up mawh bel a mau sang pil zaw, tei zaw sa a hi tam ci ing.

7. Zomi MP Candidates te
NLD Zomi MP candidate te a mi mel in thei lo ka hih man in a hoih/hoih lo bel tel khin keng. A tel ten hong at ve vua.

Zomi NLD members te pen, mun dang a en nai kei ni in, a mau NLD party sung mah mah ah thunei zong ding (eg. CEC member, Chin State NLD president…) om khol lo hi. A mau party sung mah mah ah zong a mi cin sak na ciang hi lel leh ki lawm sa lel ing.

Party lian khat pan MP khat hi sam ding ci leng Party in kumpi hong ngah leh bel, a MP pa lian ding in bel hamphat na/ kumpi za neih na ciang khat bel a ma a ding om zaw deuh sam ve. A innkuan pih ciang lo buang in tampi nek pih kha lo thei ding hi hang.

A sawt nai lo khat ing zong NLD ten MP ding (candidate) ten media (mipi thu ki zak na) te ki ho lo ding, interview lo ding ci in thu kham pia hi. E tel MP te mipi tang a a ki sam bang bang in thu hong sung/gen thei kei mawk leh Zomi/Zogam ki sum lua ding hi. NLD makai pi te in lah ei Zomi/Zogam a ding hong buai pih mah lo ding a, e tel MP ten a ki sam bang in a hun hun in thu hong sung thei kei le uh khiallap het lo ding hi. Mipi lung nguh bang in thu hong sung sak thei tak pi ding hiam ci pen ngaih sut huai mah mah kha ding hi.

Lamka thu piang tung tawn in Zomi te e tel ding khat a, India lam Zomi MP (MLA) te pen kei theih na ciang ah a tam zaw Congress member hi zaw uh a, a mau ut bang in gamtat(thu sung) theih na nei lo uh hi. Zomi te tang in hong dingpih lo/dingpih thei lo a hih man in, hi zah in buai na om hi. Zomi te hong khual lo/it lo hi sam lo in, a party pu te thu mang (nial ngam lo) khawng na hi kha thei lel ding hi. Zomi party khat na hih leh Zomi te hi zah in nu sia sam diam a ci nuam hing. NLD sung a Zomi te in e leh Zomi gam leh lei vai bang zah in hong buai pih zo uh tam?

9. NLD ten kumpi ding pen ki tel man ciang ngen khia pan ding ci se se. Mipi a ding a lawp huai lo (mipi pah tak khollo) khat peuh a hi kha tam ci nop huai pian sa ing. Theih lo pi khat President a, a tel ding dan tawh ki bang mai e. DASSK lah kumpi (President) hi thei lo phot ding ci leng.

NLD leh DASSK e lung gulh leh zong NLD te tung ki pum ap lo ding thupi sa ing. ZCD te pen NLD te tawh na sem khawm te uh hi a, ZCD mee pia le cin NLD piak tawh tam pi ki lam dang lo hi. Bang hang hiam ci leh ZCD ten kawl kumpi hong sem zo lo ding ci pen e theih sa tek hi. ZCD ten kumpi ding mi khat peuh peuh parliament ah vote a piak hong kul ding a, NLD te mah tawh vai hong hawm khawm ve ve ding hi. A hi zong NLD CEC ten a ut bang bang in hong pei khin tei lo ding hi. Bang hang hiam ci leh ZCD MP te pen a mau tawh na a sem khawp hang a mau khut nuai mi hi lo hi. Tua in Zomi te a ding hamphat na (negotiating power) tampi nei tuam ding hi hang.

Zom lai ni…

Lai at,
Mungsen