Zomi le Pawlpi khantona ~ Rev. Dr. Mang Do Thang

Zomi le Pawlpi khantona ~ Rev. Dr. Mang Do Thang

“Ih Topa Jesuh Khris sungah upna tawh na nasepna, itna tawh na hanciamnate uh leh lametna tawh na thuakzawhnate uh, ih Pasian mai ah thu ka nget sialun hong phawk denin Pasian tungah nite khempeuh adingin lungdam ka ko den uh hi” (1 Thes. 1:2-3).

THUMASA

Pawlpi khantona pen mi pawlkhatte in mimal phazah, sumpi ngah zah, biakinn thupina, biakpiakdan a nopciit zia cih bang dan teng bek tawh teh (measure) kha thei uh hi. Hi bang dan pen mihingte’ tehna (human measurement) hi bek a, Pasian’ tehna (divine measurement) pen a tuompi khat ahi hi. Paul in Thesalonica pawlpite khantona thu thum tawh na teh hi: upna tawh sepna (work of faith), itna tawh hanciamna (labor of love), le lametna tawh thuakzawhna (patience of hope) cihte ahi hi. Thesalonica pawlpi in hih thu thum teng nei ahih manin Paul’ muhna ah a khangto pawlpi khat ahih manin Paul in Pasian tungah lungdam a ko na hi gige hi. Mihingte’ ngaihsutzia le Pasian’ ngaihsutzia pen van le lei a kikhaih bangin kikhai thei hi (Isa. 55:8-9).

Tulaitak leitungah pawlpi lian mahmah (megachurch) ih cihte in pawlpi mimal tul (10) le a tung siah bang nei thei uh hi. Pastor Paul Yonggi Cho’ pawlpi Yoido Full Gospel Central Church pen leitungah pawlpimi a tam pen hi a, mi (480,000) bang pha hi kici hi. Tulaitak ih Khamtung gambup mimal phaza tawh kikim phial kha ding hi. Mimal tamna tawh Pasian in pawlpi khantona a hong teh ding hi mawk leh ei Kawlgam ah a khangto pawlpi cih taak ding khat zong om lo ding hi. Tua ahih manin pawlpi khantona tawh kisai Pasian’ tehna nam thum ih kikum ding hi.

1. Upna tawh sep ngamna (work of faith)

Upna ih cih sungah hong gumkhia thei upna (saving faith) le sep ngamna upna (gift of faith) kihel hi. Amasa upna in kha gumkhietna hong ngahsak hi (Eph. 2:9). Hih upna pen vantung gam ih tun theih nadingin Jesuh ih upna hanga Pasian in hehpihna tawh a hong piak khong letsong hi a, sepna peuhmah themcik zong kihel lo hi. A nihna upna pen gup ngahsa a tate tungah ama’ gam tangzai nadinga Pasian in a hong piak ngiat sep ngamna upna ahih kei le sep zawhna upna (gift of faith) ahi hi. Sepkhietna tawh ih upna lah ding pen Pasian’ deihna ahi hi (Jas. 2:17). Upna tawh Pasian adingin na lianpi a sem ngam mi tampi om a, tuate lakah a minthang mi nih thu ih gen ding hi. Khat pen USA gam Crystal Cathedral Church ah Pastor a sem Robert Schuller ahi hi.

Amah in Orange County, Garden Grove, California ah US dollar 1,500,000 bang bei-in Crystal Cathedral biakinn khat a lam nop hangin sum neih tuak hiau lo hi. Ni khat sumhaupa khat kiangah a biakinn lam nading US dollar awn khat (1,000,000) a nget miaimuai-a leh a lawm in zong himaw ci-in, “Schuller aw, sum awn khat tak hong haih nget miaimuai mawk na hih teh, ke’n zong awn khat hong haih piak mai ning,” na ci bilbel a, tua sum teng behlap toto-in adung 415ft, avai 207ft, a sanna 128ft a pha biakinnpi khat lam pah hi. Hih bang upna tawh sep ngamna (gift of faith) a nei manin biakinn lianpi a lam zo hi a, hih bang sep ngamna letsong pen mi khempeuh in ngah lo hi.

Robert Schuller tawh a nasep dan kilehbulh mahmah napi upna tawh sep ngamna letsong (gift of faith) a nei tagah kep nasepna (orphanage ministry) a sem George Muller in Bristol, England ah upna tawh kum (60) sung tagah tul (10) na vak a, US dollar (5,000,000) bang zang hi kici hi. Nasep a kipat tungin a nei sun shilling (2) bek tawh kipan hi zen hi. Tagahte adingin an le bawngnawi a bei sialin, “Pa aw, kote adinga nong piak ding ante hangin lungdam hong ko ingh,” ci-in thu ngen kholh den keei hi kici hi. Sum lompi zekin na sem hi loin a sep kawmkawmin sum kisam den a, a kisap hun hunin bangmah ngah nai lopi mahin Pasian muanna tawh a ngah zo dan bang kekin thu ngen den hi.

China Inland Mission sangmang Hudson Taylar in zong a nasepna ah haksatna tampi na tuak ngei ahih manin amah in, “Pasian’ na pen Pasian’ min than nadingin Pasian’ zia tawh sem peuh lehang Pasian’ hong sikna kicing lah cih om ngei lo hi” (God’s work done in God’s way for God’s glory will never lack God’s supply) na ci hi. A nuntakna sung vuah haksatna om lo hi lo a, haksatna a zote ahi uh hi. A gualzawhna uh pen upna tawh sep ngamna ahi hi.

2. Itna tawh hanciamna (Labor of love)

Itna pen a paikhia den ding hi a, ei tung panin midangte kiang a zuan den ding ahi hi (love towards others). Pasian ih itna pen tung lam kizopna (vertical relationship) hi a, tua pen a nuai lam kizopna (horizontal relationship) a kici midangte tawh ih kizopna tung tawnin Pasian ih itna lak den kul hi. Pasian ka it hi ci napi midangte a it lote pen zuauthu gen ahi hi. A muh thei a sanggamte a it lote in a muh thei lo Pasian it thei lo hi (1 Jhn. 5:20). Hanciam (labor) cih kammal pen Greek pau-in “kopos” hi a, “gim le tawl” (toil and hardship) a gen nuam ahi hi.

A khangto pawlpite pen itna hang tawh a gim a tawl ngamte ahih ban vuah a si ngamte zong ahi uh hi. Jesuh in a nungzuipite a vaikhak bulpi pen ahih le amaute khatlekhat ki-it a, Pasian’ min a thansak ding uh ahi hi (Jhn. 17:21). Pasian’ muhna ah a khangto pawlpi khat ih hih thei nadingin hamciam taka ih sep ding thu (2) om hi: Khat pen kipumkhatna (unity) hi a, adang khat pen sepkhiatna (service) ahi hi.

(a) Kipumkhatna: Ei Zomite kisap phat diak pen kipumkhatna (unity) hi dingin ka um hi. Ih pilna, ih siamnate gawm khawm a, ih sep khop theih kei ngeingei leh ih sum pha mahmah ding uh hi. World Council of Churches (WCC) nasepna a ke khat (branch) ahi “Life and Work” program makai Nathan Soderblom in, “Pawlpi thuhilhna ih ultunsakna in eite hong khenkham a, nasep khopna in eite hong gawmtuah hi” (doctrine divides, service unites) a cih bangin pawlpi khatlekhat ih kilamdannate ultung sak lo zaw a, ih gal pa Satan ih do khop ding uh ahi hi.

Mi khat in Gandhi kiangah India ah tapidaw a khanto theih lona ahang bang pen ahi tam a cih vial leh a lawm in zong no tapidawte hang ahi veh, na cih san ziau hi. Ei Jesuh Khris’ nungzuite khatlekhat kipawl thei lo, khatlekhat kisu su, kinangnang, kiho thei lo ih hih manin midangte in Jesuh Khris nung a zui ngam lo uh na hih tuak mawk hi. Thuciam thak pawlpite (New Testament Church) ki-itna en pha kikin amau banga ih ki-it thei nadingin hanciam ding kisam hi.

Tu kum zalom (21) hun pen thukizak pilna (information technology) hang tawh leitungbup ah khatlekhat kizop kipeh diamdiam hun (globalization) ahih manin “note, kote” cih lungsim (we-they mentality) ahih kei leh “eite, amaute” cih lungsimte (us-them mentality) paikhia-in na khatpeuh ih sepkhop liailiai ding hun ahi hi.

Ford Motor Company CEO Henry ‘ thu gen, UNO in zong a thubulphuh (motto) dinga a zat ngei khat ahi, “Ton khawm lailai lehang ma a pangkhawn ih hi pah veh” (coming together is beginning), khawl khawm liailiai lehang a masot ih hi pah veh” (keeping together is a progress), gel khawl liailiai lehang a kithuhual ih hi pah veh” (thinking together is unity), sem khawm liailiai lehang a lawhcing ih hi pah veh” (working together is success) a cih pen ih mite lakah zang thei zen leng khanto gim nam pah ding hiven maw!. Ih minam sungah nang kua pawlpi, nang kua beh cihte in mun hong la nawn kei henla, ih kibat lona teng kipumkhatna-in (unity in diversity) zang thei zen lehang ih gam sung, ih minam sung le ih pawlpi sungah bang zahin a nuam zen tam! (Late 133:1-3).

(b) Sepkhiatna (service): Sepkhiatna a cih pen “gammiel nasepna” (mission) a gen nuam ahi hi. Mission nasep nam nih om a, khat pen khamangthang zonna “evangelism” (Pian. 3:9; Rom. 10:15; Mat. 28:19-20) le adang khat pen khantona nasepna “social service” (Pian. 1:28; Mat. 22:39) ahi hi. Matthew (28:19-20) pen Sawlpina” (the great commission) kici a, khamangthang zonna (soul winning) zong kici hi.

(i) Khamangthang zonna (evangelism): Pasien’ hong teelna pen midangte tungah thupha ahi dinga a kiteel ahih lam a khangto pawlpite in tel lua zen uh ahih manin khamangthang zon nasep pen hanciam takin sem uh hi (Pian. 12:1-3; 1 Pet. 2:9). Khamangthang zonna sungah lungdamna thu tangkona (proclamation) le nungzui suahsakna (disciple making) kihel hi.

Thessalonica pawlpi in lungdamna thu tangko uh a, Macedonia gam, Achia ga le mun tampi ah kizelsak uh hi (1 Thes. 1:8). “Kizelsak” cih kammal pen Greek pau-in “exechetai” hi a, Mikang pau ahi “aw thawn” (echo) a hong piankhiatna kambul ahi hi. A khangto pawlpi khat ih hih nak leh lungdamnathu tangko ding pen ih nasep lian pen ahi hi. Pawlpi mi tamna peuh tawh a kisialte hi loin, mission field bangzah nei, pawlpi tung tawnin mi bangzah piangthak cihte tawh a kisial dingte ih hi uh hi.

Satan in gammial nasepna a khawlcip theih nadingin up dan san dan tawh kisai khaici hoih lo a hun hunin tuh thei zel hi. Kum zalom (18) hun lai pekin a muan huai pawlpi makaite zangin “hyper-calvinism” a kici kihilna man lo (false teaching) khat na om a, tuni dongin om lai hi. Hih thuhilhna pen Pasian in na khempeuh a sehkholsa hi cih upna (predestination) zong kici a, gupna ngah ding le a ngah lo ding pen Pasian in sehkhol khin ahih manin lungdamna thu tangko nasep (evangelism) zong sep kul nawn lo hi cih thuhilhna ahi hi. William Carey in Northamptonshire Baptist Ministers’ Conference ah gammial nasep ding vai a va hah gen leh Dr, John Ryland pen super-calvinism upna a pom khat ahih manin amah in, “Naupang pa, tusuk lel sin aw, Pasian in lawkite a pianthak sak nop nak leh nang le kei hong kol lawh loin sem thei lua zen inteh” na cih san ziau hi. Satan in Pasian’ gam a tangzai lo theithei nadingin mipil misiamte zang thei hi cih phawk huai hi.

Tu kum zalom (21) hunin ih kim ih pam ah upna peng ahi “Pawlpi tekah thuman thutak om hi cih upna” (pluralism) hong laang leuleu hi. Biakna khempeuh le upna khempeuh (all religions and faiths) ah Pasian kilang kawikawi a, ei tapidawte in ei pawlpi sung bekah a kip den thuman thutak (absolute truth) om hi cih tangkalh thei om nawn lo a, biakna dangte zawhthawh bawlna (triumphalistic strategy) peuh tawh ahih kei le ei hoihsak lampi khat bek (one way traffic) tawh upna dangte (other living faiths) kiangah thu kimawk gen thei nawn lo cih ahi hi. Cihnopna ah, “Jesuh bek lampi ahi hi: (Jesus, the only way) cih tapidawte upna pen man nawn lo hi a ci nuam ahi hi (Jhn. 14:6).

Hih bang upna a pomte in a genna vuah, ih gammial nasep zia (mission method) zong ih khel kul ding a, biakna dangte tawh kiholimna (dialogue) nei-in a hoih teng kilaksak kawikawi ding ahi hi ci uh hi. Amaute in biakna khat panin adang khatah kikhelna (conversion) pen kisam sa lo uh a, gupnathu gen ding zong kisam sa khol lo uh hi. Hih upna man lote hangin gammial nasep a lawhsap khak ding lau huai mahmah hi. Ahi hangin holimna pen a hoih lamin zang thei lehang a hoihna tam veve hi. Holimna pen holimna tawh khawl sak loin (dialogue for dialogue’s sake), holimna pana ih ngah ki-itna (rapport) tung tawnin gupnathu gen thei nading lam sialkhohna (means to an end) dinga ih zat thei nak leh holimna pen a manpha suak veve hi.

(ii) Khantona nasep (social service): Hih nasepna sungah mizawngte, cinate, kamko meisia tuakte, huipi guahpi tuakte, zinlinna le a hang tuamtuam tawh cimawh gentheih a tuakte (victims of natural disasters), bawlsiatna tuamtuam a thuakte panpihna banah thuman lona (injustice) panin thumanna (justice) a om nading nasepna, kimlepam kepcingna (preservation of environment), khuahun kepcingna (ecology), le adang khantona ding nasep tuamtuomte (development projects) sepkhiatna cihte kihel hi. Khamangthang zon nasepna (evangelism) le khantona nasep (social service) pen a nih tuakin Pasian in sep dinga a hong sawl ahi hi.

Ahi zongin a kikim liana sep miaimuai ding hi sam lo hi. Hih tegel panin a khatzaw zaw ih masatsak ding (priority), ahih kei le ih ultunsak ding (emphasis) thupi ding hi. Lai Siangtho sungah khantona nasep (social service) sangin khamangthang mat nasep (evangelism) pen ih ultunsak zawk dingin na gen hi (Mat. 10:28: Mrk. 8:36; Jhn. 3:16; Luk. 19:10). Bang hang hiam ih cih leh kha sihna (spiritual death) pen a tawntung sihna (eternal death) hi a, taksa sihna (physical death) pen tawlkhat sung bek ahih man ahi hi. Vantungah taksa sihna, dahna le khitui luannate om nawn lo ding hi (Mang. 21:4). Khantona nasep (social service) pen khamangthang mat nasepna a panpih ding (means to an end) ciang bekin ih zat ding ahi hi.

3. Lametna tawh thuakzawhna (patience of hope)

Leitungah a mudah huai pen in kam niin le kam nainawngte zatna (abusive language) hi zaw lo a, lamet beina (hopelessness) hizaw hi. Thuakzawhna (patience) ih cih pen Greek pau-in “hypomone” kici hi. Rome gamuk mangpa (governor) khat in pawlpi pa (church father) khat ahi Poly Carp kiangah Jesuh Khris mawhsakna na gen leh sihna panin hong kihonkhia ding hi, a va cih leh Poly Carp in, “Kum (86) sung ama’ sila ka hi khin zo a, amah in kei tungah siatna bangmah bawl ngei lo hi; koici bangin a hong tankhia ka kumpi pa mawhsak thei mawk ding ka hi hiam?” na cih san ziau a, a Topa tungah a lametna khempeuh koihin sihna na teelzaw hi. A khangto pawlpite in nei lo a phamawh lemetna nam nih om hi:

(i) Pasian’ kammal tungah lametna (hope in God’s word): Ih lamet taktak ding pen leitung thuphate hi loin Pasian le a kammal hizaw hi (Late 42:5). Satan’ mudah pen Pasian’ kammal ahi hi. Rome kumpi Diocletion in AD. 303 kumin Rome empire sunga om Lai Siangtho khempeuh a haltum khit ciangin Laisiangtho a mangthang khin ding sa-in Lai Siangtho manthanna phawkna-in Rome khupo laizangah khuampi khat phut a, tua khuam tungah Latin pau tawh “extincto nominee christianorum” (tapidawte min kiphiat maimang khin ta hi) ci-in gelhsak zen hi. Lai Siangtho pen kiphiatmang zo lo kisa-in tua khit kum (10) ciangin tapidawte maipha a pia Constintine kumpi hong kah ciangin Rome empire buppi ah tapidaw biakna (Christian religion) pen gambup biakna (state religion) suaksak hiau mawk hi.

Satan in Pasian’ kammal a suksiat zo lo banah lamdang sak huai zah dongin kembit a, tuni-in Lai Siangtho pen leitung laibute lakah a kitamzuak pen (the best seller) suak lai zen hi (Isa. 40:8; Mat. 5:18; 24:35). A beisa kum zalom (18) lai-in hong tung ding kum (50) a cin ciangin Lai Siangtho pen mihingte in mangngil kiuhkeuh ding uh hi ci-a a tangko khia French mipil Voltaire’ laikhetna (printing press) pen amah a sih khit kum (50) a cin kum lian ciangin Geneva Bible Society in Lai Siangtho khetna inn (Bible House) in zang hiau mawk hi. Pasian’ nasepna lamdang zen si mate! Tua hi a, a khangto pawlpite in Lai Siangtho simin, kantelin, lam kilaksak den uh hi (Late 119:105; Sawl. 17:11).

(ii) Hamsatna sungah lametna (hope in suffering): Pasian’ mizat pa khat in, “Hamsatna sung pan lametna in huihpi nun khit cianga a hong suak nitang galmuh hi” a na cih bangin a khangto pawlpite in lametna tawh hamsatna tungah thuakzawhna nei uh hi. Adonirum Judson in Kawlgam ah hamsatna tampi a thuak uh kawmkal panin, “Pasian kamciam bangin Kawlgam mailam pen nitang bangin tang selsal hi” (the future of Burma is as bright as the promises of God) na ci liang hi.

Tu kum zalom (21) pen pilna hun (knowledge age) kici a, Pasian’ hong piak “thukizak baih pilna” (Information Technology) ahi email tawh kizopna, mel kimu-a thu kikupna (video-conferencing), Zoom tawh thukikupna (Zoom meeting) cihte tung tawnin leitung kiu li-a a kithehthang ih mipihte tawh tong kikup thei hun hong tung ta hi. Tua ahih manin a sia kawmkal panin thupha (blessings in disguise) cih ding hong hi ta mai hi. Ei pawlkhat in Pasian hong piak thukizak pilna (information technology) pen a hoih lamin zang loin a sia lam ahi mi gensiatna, mi phinna, mimal le minamte mudahna kammal zatna (hate speech) dingin ih social media-te ih zang khial mahmah uh hi.

A hoih lamin zang thei hi lehang online tungah “a kithehthaang Zomite kizopna” (diapora Zomi network) tawh thu kikum khawl hialhial dingte ih hih lam zong mangngil het kei ni. A khangto pawlpite in Pasian piak khantona ahi social mediate tung panin Pasian thu tangkona le Pasian nasepna a tuamtuomte sep nadingin zang thei uh ahih manin pawlpi in Pasian gam nasep tangzai takin sem zo hi cih kimu thei hi. A beisa hun lai-in buaina a tuamtuamte hangin ih meltheih ih sanggamte tawh gamla pi ah ih kikhen uh a, lametna bei zah dongin ih om uh hi. Mipil tampite in mundangah hong taisan ahih manin tawlkhat sung mipil lawhsapna (braindrain) hong om mah tase leh Pasian in ei adingin a sia gel ngei het lo ahih manin tuhun ciangin online tungah mel kimu bek hi loin pilna kihopsawn thei kikna (braingain) zong ngah kik ta ih hih amnin Pasian tungah ih lung a dam hi.

THUKHUPNA:

Thesalonica pawlpite pen a etteh taak pawlpi ahihna pen ahih theih zah uh tawh midangte tungah lungdamnathu a tangkona uh hi pen hi. Amaute bangin leitung mun tuamtuama om ih mite in a thupha ngahte uh tawh ih gam sunga om ih mite taksa le kha lam khanto nadingin zing vai hong hawmin hong puah hong zun ding uh ih lunggulh mahmah uh hi. A diakdiakin pawlpite in thudangte hong kin lo zaw-in gammial nasepna hong kin uh henla, lungdamna thu za khin lua kisa-a a cimtak zawzen ih Zogam sungah hi nawn lo zaw-in gupkhiatna thu a kizak nai kiuhkeuh lona (Khris’ thu a kizak ngei nai lohna munte) namdangte lakah khut kilenin sem khawm lehang, Pasian in ih minam thupha hong pia ding a, ih lunggulh taksa hamphatnate zong hong pia thuah veve dingin ka um hi (Rom. 15:20).

Tulaitak ih mite sungah kilemna le kithutuahna a tawm mahmah laitak hi dingin ka ummawh hi. Ahang ih zonzon hangin ih mu zo kei uh hi. Thesalonica pawlpi thu ka sim tung tawnin gammial na ih sep lohna hangin ih mite sungah a kisam lopi-in buaina tuamtuamte hong om ahi kei tam ka cici hi. Kimkhatte in gammial na a kisem ngel veh zong hong ci kha ding uhi. A sem zong om mah him ahi zongin pawlpi a tamzawte in lungdamna thu taktak (pure gospel) a gen tawm mahmah ta a, a phawhlawh teng peuh (hauhna damna gospel) ki-uang gen zaw-in ka nei hi.

Hauhna dipna le nopsakna tawh kisai lungdamnathu (prosperity gospel or health and wealth gospel) peuh tawh ih buai lua kha ta hiam cih nop huai hi. Hihte pen a kisam lo hi lo a, lungdamnathu taktak ih gen khit nunga hong kipia thuah ding thuphate hi bek lel hi. Tua ahih manin Paul in lungdamnathu taktak a kigen nawn lo ciangin Galati pawlpite kiangah, “Kang hong gen sa mah bangin ka hong genkik-in ah, “Note’ sansa lungdamnathu tawh a kilehngatin thudang a hong hilh mi peuhpeuh hell khuk sung tung tahen!” na ci giap hi (Gal. 1:9). Hi bang thuhilh mi ih tam manin ih minam in hamsiat lawh ahi tam maw cih zong ka ngaihsun thei zel thu khat ahi hi.

Ih minam sungah cancer natna tawh a kibang a dam thei lo natna ahi khatlekhat sep khop thei lona, angsung khualna, kitot kiselnate tampi om cih pen nial thei lo thu ahi hi. Tuate ih gam sungah a ven thei nadingin bang zatui kisam ih hi uh hiam? Kuate’ mawh puak hi ding hiam? Israel gam sungah kamsang Jeremiah hunin zatui tampi om napi a mite natna kidamsak zo lo hi, na ci hi (Jer. 8:22). Ih gam sungah Pasian nasem tam semsem napi ih gam kisia semsem hi.

Thuhilsiate (evangleists) tam semsem kikhenna tam semsem a, degree sangpite khang semsem napi zuau le nalna khangsemsem mawk hi. Sangmangte hun (1910) panin 1970 kim ciang ciang siakhawk khat (a tawm pen khua sagih bang a pha) pen siakhawk kem sia (area pastor) khat bek in kem a, ahi zongin tuhun ciangin khua khatah Pastor nih le thum bang om keei napi nidang sangin tuute gilvah zaw tuan lo uh hi. Pastor ih tam mahmah hangin ih tuute gilkialin, a kha uh cidam lo hi cih kimu thei hi. Ahang pen amaute in a tuute a cidam nading zatui nei lo uh hi ngel ding hi.

Ih gam sungah tulaitakin zong a tuute a cidam nadingin an siangtho ahi Pasien’ thu siangtho tawh a vak kitawm hi ngelin ka um hi. Kei mimal muhna ah tua damna zatui pen adang hi-in ka um kei a, gammial nasep taktak sepna zatui hi pen dingin ka um hi. Tua hi a, kha lam ah ahi a, taksa lam ah ahi zongin ih minamte ih khantosak nop leh ih minambupin gammial nasem minam (missionary people) suak lehang ih ut a ih ut kei zongin Pasien in ih minam hong tawisangin, kithutuah lohna panin kithutuahna, kimuhdah ki-etsatna panin ki-it kilemna in ih minam sung le ih gam sungah mun hong la ding a, Zo laukha hong pal lun ding hi cih pen kei mimal upna ahi hi. Tua ahih manin Thesalonica pawlpite bangin lungdamnathu tangkona (gammial nasepna) pen upna tawh sepna, itna tawh hanciamna, lametna tawh thuakzawhna cih teng masuanin ma nawt dingin itna tawh ih kicial uh hi. Rev. Dr. Mang Do Thang (Church Pastor, Zo Baptist Church Yangon)