Zomi lamhilh Aksi te ~ JK Kam

Zomi sungah mipil, misiam, milian, mihau a hoih khop mah ih om a, Pasian min ih phat hi. Zomite ki pumkhatlo, ki thutuaklo ih cih pen hong makaite nung ih zuih matengin kipumkhat cih om ngeilo ding hi.

Mipi deihna banga makaih ding thupi a, aizongin mipi in ih makaite muang tak a ih kingak (depend) phot loh in mipi deihna mipi mahmah in zui khawm thei ngeilo hi.

Makai ding kua?

Ei pil, siam, thei, nei kha mah ni, kicing nai kei ci khang. Ei hong ki ciapteh hun hong om lel dinga tu laitak in Kawlgam leh leitung ah hong kiciapteh pih, ei mimal kim sang mun sang a tung masa zaw, mipil bek ahilo miciim, Zomi maidawk, a nung uh zui le hang hong ki puk pih lo ding mi 3 om hi.

ZOMI LAMHILH AKSITE

1. Rev. Dr. S. Pau Khan En
2. Dr. C. Thang Za Tuan
3. Pu. Cin Sian Thang

Rev. Enno pen Kawlgam bek hilo leitung bup in hong theihpih, doctrate sinte lai hilh dinga gamdang ah hong ki sap sak zel, Pasian leh minam a it Asian-theologian hi. Zomi Biakna makai lak ah a za a sang pen leh min zong hong theihpih pen hia, biakna lam ah Zomi i PA ahi hi.

Dr. Tuanno pen Higher Education Ministry of Myanmar pan hia, Kawlgam bup sang khempeuh university level dong ii lai sin dan ding a vaihawm pawl ahi hi. Zomi kumpi nasem lak ah a za sang pen leh pilna (education) lamah a sang pen a ih neih ahi hi.

Pu. Cin Sian Thang pen Law (upadi) pilna tawh lawyer (sitni) kumpina semin, Zomi dinmun tel ahih manin a kumpi nasep khawl liangin ninphual pan Zomi lamto dinga hong kipan Father of Zomi Movement kici thei hi. ZCD party makai zong hi in, Kawl gam kiukna sung ulian tampi in a zahtak, a kihtak, a thudot hi a, gam vai politics lam ah a sang pen thu dot tak pen ahi hi.

Gam khat kilam nadingin pilna kisam masa pen a, kimakaihna in zom hi. Zomi sung bek ahilo namdang gamdang ten zong mipil leh makai a hong zahtak pih ih ZOMI LAMHILH AKSITE in “ZOMI’ ah kipumkhat ding hong hanthawn tek uh ahih teh, ei le ei a kimuangsim khinkhian ih om phial zongin, amau nung zuih masak huai ka sa hi. Kikhiallo hamtang ding hi.

Zomi sungah thudot taak pen hih mithupi 3 tengin “Census ciang Code-914 ZOMI ci un” hong ci uh ahih teh hih ZOMI vai ah amau sim loh ken kua thu mang nawn tuan ding ka hiam?

JK Kam