Zomi koi ah, bangci gup ding?

Zomi koi ah, bangci gup ding?

Zomi i hihna i gup leh i pom tintenna ding mun pen Minam sung mah a kidempih a nei, ong kikhen sak, ong kidem, ong ki-elsak electoral politics (or) Party politics ding hi hetlo hi.

Tom gen leng CSOs nasepna ah Minam gum, Minam min hum in Minam min leh hihna humcip leh dinpih ding hang a, electoral politics asai party politics ding hilo hi.

Tua ahihman in mipi a huai, mipi tawh deidan leh khentuam omlo a vai ding khawm CSOs a panmun len leh mapang active khat in political party thu hahgen ding hilo hi. CSOs i cihte in party khempeuh, pawlpi khempeuh, MP (or) tangmi khempeuh, ulian khempeuh tawh ki-it kilem a mipi’ ading a nasem, mapang ding ahi hi. Tua ahihman in party guptuam paihtuam nei mimal peuhmah CSOs a panmun len ding a kifit lo ahi hi.

Party pen MP tutphah ngahna ding siksan leh pawl/kipawlpih zonna hi a, nasepna pen MP hihna leh pawl hauhna in a sem leh a muibun ahi hi.

Party a Zomi min puakna tawh Minam kihuai zo ngeingei lo ding a, Zomi min puaklohna tawh zong Minam kinuaksan, kitaisan thei ngeilo ding hi.

I Minam thahat leh kipumkhat ding i lunggulh takpi leh political party ah luanglet lo a, CSOs nasepna ah i pankhop ding a kisam ahi hi. Kitel hun ciang teel ngah azo kumpi tawh i kizopna a i tangmi ding mi gina leh dinmun muanhuai khuadak giaugiau a i teel ding hilel hi.

Lungsim siangtho tak a Minam it takpi i hih leh cihna hi a, Minam min paulap a mipi a khenkham party tawh buaina pen minam it hilo bek thamlo, minam a susia, minam abuse treason namkhat ahi hi.

Kei party tawh buailo kahihman in gal leh kidempih neilo hi ing. ( kei’ lampang pan ). Ahih hang, ama’ cihbang hehe hawihawi a cilo, amah a support lo khempeuh gal le sa, kidempih a a ngaihsunte ading in a gal uh hiding hi ing. Pau Khat Suan