Zomi kipawlna tengin Thukhunpi zattek kul (ZID Constitution)

Zomi kipawlna tengin Thukhunpi zattek kul (Sample: ZID Constitution)

Zomi kipawlna tengin zong Thukhunpi zat tek kul hi. I etteh theih ding deihna tawh ZID Thukhunpi hong khahkhia leu2 ing. Hih pen a hoih pen leh etteh hamtang ding cihna hi loin, ei kipawlna leh ei mun tawh kituak dinga hei theih ding hi. Kipawlna himhim Thukhunpi pen a hampi kibang khin hi. ZID zong sin kawm leh zat kawm kithuah hi pan sam hi. J. Thang Lian Pau

ZOMI INNKUAN DELHI (ZID) & ZOMI REFUGEES ASSOCIATION OF DELHI (ZRAD)

THUKHUNPI (CONSTITUTION) 2012 Published by Zomi Innkuan Delhi (New Delhi, India)

THU MAKAI :: Kawlgam pana galtai Zomite pen India gam khawpi New Delhi-ah kum 1995 kiim panin tun kipan hi. Kum 2000 khawng dong Zomi kitam nailo a, a sawma sim tham bek kipha in, tua laiin Ciimnuai Society cih kipawlna min tawh na kihuai uh hi. Kum 2003 khawng pan a za-a sim, Kum 2012 teh mi 1800 khawng kipha to ta hi.

Hun beisa-ah politics vaia kipawlna – Zomi National Congress (LA), Zomi National Congress (Exile) cih bang, khangno leh siamsin kipawlna – Zomi Students & Youth Organisation cih bang, numei kipawlna – Zomi Womens Union cih bang, minam vai leh refugee vaia kipawlna – Zomi Innkuan Delhi, Zomi Refugees Union, Zomi Refugees Camp cih bang a hunhunin kiphutphut hi.

Thukizakna lamah Zolengthe, Sunmang, Zomi Innkuan Thupuak cih bang kihawmhawm hi. Biakna lamah tu lai takin (February, 2012) ZID pawlmite pen Bethel Assembly of God, Full Assembly of God, Zion Zomi Baptist Church, Zomi Christian Fellowship, Zomi Church Delhi cih bang Zomi aituam pawlpite ah leh Seven Day Adventist, Roman Catholic, Burmese Christian Association cih bangin nam tuamtuam kihelna pawlpite ah kihawmin ki-om hi.

Kipawlna teng lakah kum 2001 kuma kiphut Zomi Innkuan Delhi (ZID) mah tou penin tu dong kip takin ding suak lai hi. ZID zong bah hun hat hun nei zel in, 2008 kumin kipuahpha in, 2010 kum pan zum tuam neih kipan in, 2011 pan kipawlzia ngeina tawh kalsuan taktak thei dingin kipan hi.

Kipawlna a kiphuh limlim teh thukhunpi (Constitution) neih kul hamtang hi. Thukhunpi ah kipawlna’ tup leh ngim (Aims & Objectives) leh kimakaihdan ding teng kitel taka tuansak ahih keileh kipawlna kician suak thei lo hi. Tua ahih manin tu kum (2012) a ZID EC meeting masa pen in ZID Thukhunpi bawl ding ‘Constitution Drafting Committee’ bulh in, tua-ah muanna lianpi tawh Rev. Do Khan Langh, Pa J. Thang Lian Pau leh Pa Thang Khaw Mang teng thum kiguang hi. Amau ten hoih tak leh kician takin i Thukhunpi ding hong bawlkhia thei pah uh ahih manin kilungdam mahmah hi.

Hih Thukhunpi pen i minam leh i kipawlna ZID adingin 2012, January 26 ni-in Thupisa taka (Solemnly) i Pom (Adopt), Dana i Bawl (Enact) leh i Kipiak (Give us) ahi cih thei in, i zahtak a, i kepbit ciat ding ahi hi.

Sd/- xxxx

• (THANG KHAW MANG)
• Dated New Delhi President
• The 20th February, 2012 Zomi Innkuan Delhi
• ZID THUKHUNPI

KHENPI 1 – ZID HIHNA

1. ZID min: Hih kipawlna in Zo min leh Mang min nei hi. A Zo min ‘Zomi Innkuan Delhi (ZID)’ cih hi in, a Mang minin ‘Zomi Refugees Association of Delhi (ZRAD)’ cih hi.

2. Zomi Innkuan Delhi (ZID) pen Zomi sungah zat ding hi. Zomi Refugees Association of Delhi (ZRAD) pen Zomi pua lamah zat ding hi.

3. ZID kiphuhna bulpi:

• (a) Zomite in refugee hamphatna tuamtuam ngah theihna ding.
• (b) Zomite kipumkhat theihna ding leh pankhop theihna ding.
• (c) Zomite haksatna-ah khat leh khat kidawntuah theihna ding.
• (d) Zomite gam leh minam itsakna ding leh zuun theihna ding.
• (e) Zomi khangnote pilna lam leh gamtat phatna lama pattahna ding.
• (f) Zomite in Zo pau, Zo lai leh Zo ngeinate a thupisak theihna ding.
• (g) Zomite leh namdangte kizop, kikopna ding.
• (h) Zomite leh khawtual mite kilem taka omkhop theihna ding.

4. ZID thubulphuh: ‘Pankhop Hatna’ (Unity is Strength).

5. ZID thubullet: ZID pawlmi peuhmah kuamah deidan loin a kibanga et ding.

6. ZID huam sung: National Capital Region (NCR) kici Delhi gam teng huam hi.

KHENPI 2 – ZID PAWLMI HIHNA

7. NCR huang sunga om, Kawlgammi hihna a nei, Zomi a kuama peuh in mi khat Rs. 10/- pia-in ZID pawlmi suah theih hi. UN card a nei ten a card photo copy tawh lutkhop hamtang ding hi.

8. Mi khat Rs. 1000/- tawh khantawn ZID pawlmi hihna (life member) suah theih hi.

9. ZID pawlmite bek in ZID pawlmite hamphatna leh ZID huhna ngah thei ding a, ZID panmun zong len thei bek ding hi.

KHENPI 3 – ZID KILAMDAN

10. ZID pen a nuaia bangin kilam hi.

KHENPI 4 – GENERAL MEETING (GM)

11. ZID pawlmi khempeuh kihel thei ding hi.

12. ZID thukhunpi su kha vaite leh ZID pawlmi bup su kha vaite vaihawmna (khensatna) hi ding hi.

13. ZID tawh kisai thunei pen leh vaihawmna sang pen hi ding hi. General Meeting khensatsa peuhmah General Meeting lo buangin phiat thei lo ding hi.

14. ZID thukhunpi tawh kisai kipsakna leh puahphatna pen General Meeting bekin hih thei ding hi.

15. Kum khat in khatvei, December kha-in sap hamtang ding hi. ZID makai kiteel ni tawh kituaksak ding hi.

16. EC in kul a sak leh Emergency General Meeting hiam Special General Meeting hiam zong sam thei ding hi. Hih pen General Meeting tawh thuneihna kikim ding hi.

KHENPI 5 – EXECUTIVE COMMITTEE (EC)

17. Office Bearer teng, Executive Committee member teng, Committee kim pan Chairman leh Secretary teng, Zomi Women Union pan President leh Secretary teng kihel thei ding hi.

18. General Meeting cihloh ZID tawh kisai thunei pen leh vaihawmna sang pen hi ding hi.

19. ZID thukhunpi letkip a mawhpuak hi ding hi. ZID thukhunpi tawh kituak loin ZID kalsuan phal peuhmah lo ding hi.

20. ZID malakna leh vaisai peuhmah a theihpih loh om thei lo ding hi.

21. ZID sum leh pai kum khatin nihvei sit zel ding hi. A sit ding (auditor) mi seh zel ding hi.

22. Office Bearer-te a encik ding leh gawtna a pia thei hi ding hi.

23. Pawl dang nam dangte tawh kizopna vai-ah thu neipi pen hi ding hi.

24. Office bearer ten kul a sak hunin EC meeting sam thei ding hi. A tawm pen kha thum sungin khatvei peuhmah sap hamtang ding hi.

25. Office bearer ten kul a sak hunin EC member teng baanah biakna pawlpi makai teng hiam, ZID pawlmi sunga mi muanhuai teng hiam, UNHCR zumpi leh UNHCR kikoppih (Implementing Partner) zuma a seem Zomi teng hiam, a vekin hiam sam khawmin Extended Executive Meeting sam thei ding hi. Hih pen EC tawh thuneihna kikim ding hi.

KHENPI 6 – OFFICE BEARERS (OB)

26. General Meeting leh EC thukhensat leh geelnate tangtunsak pen a naseppi hi ding hi.

27. President leh General Secretary thu kimu-in kul a sak hun peuhin OB meeting sam thei ding hi.

28. A nuaia panmun len teng Office Bearers (OB) kici ding hi.

(a) President: ZID makaipi pen leh ZID tawh kisai mawhpuapi pen hi ding hi. General Meeting, Executive Meeting leh Office Bearers meeting-te makaih ding hi. Pawl dang, nam dang, leh zum kong mang kong vai-ah ZID tangin ding ding hi. ZID sunga panmun nei teng leh ZID vai sai teng vaan ding hi. ZID sung kilemna ding hanciam ding hi.

(b) Vice President: ZID in Vice President 1 leh Vice President 2 nei ding hi. A kulna peuhah President panpih ding hi. President tawh tavuan kihawmin mawhpuak diak zong nei thei ding hi. President a omloh hun hiam, President a hih theihloh hun hiam ciangin khat zawzaw in President ai awh thei ding hi.

(c) General Secretary: ZID in zum a neihleh zum vai tawh kisai a mawh puapi pen hi ding hi. Zum a neih keileh ZID van teng keem ding hi. ZID meeting vaihawmnate gelhin ciamteh ding a, pulak kul a omleh pulakkhia ding a, a kisaipih mi teng kiangah meeting minute copy zong hawm zel ding hi. Thukhensatna banga buaipih kul a omleh vaan pah ding hi. ZID tawh kisai thusia thupha poimawh thu peuhmah ciamteh in, EC meeting leh General meeting-ah zong report pia zel ding hi. President tawh thu kimu-in Secretary dangte sep ding tavuan hawm thei ding hi.

(d) Assistant General Secretary: A kisapna peuh ah General Secretary huh ding hi. General Secretary a om loh teh General Secretary dinmun luah ding hi.

(e) Treasurer: ZID sum keem hi ding hi. Accountant tung pan a san leh accountant tunga a piakkhiat sumte lim takin ciamteh ding hi. ZID sum a bit leh bit lohah a mawh pua ding hi.

(f) Accountant: ZID sum limlim a tungtawn loin kizeek thei lo ding hi. ZID sum muh limlim a khutah lut masa hamtang ding a, account bu-ah hoih takin a ciapteh khit teh Treasurer kiang ap ding hi. ZID sum zat limlim kician tak leh sit theih dingin lim takin ciamteh ding hi. Sum kizang takpi hi cih lah theihna dingin receipt/memo lim takin koihcing ding hi. Kha khatin khatvei peuhmah Executive meeting (om lo ahih kei leh) ah ZID sum dinmun pulak ding hi. General meeting ciang zong ZID sum dinmun pulak hamtang ding hi.

(g) Finance Secretary: ZID sum muhna ding a mawhpuakpi hi ding hi. Treasurer leh Accountant tawh ZID sum muhna ding vaankhawm ding hi.

(h) Information Secretary: ZID tawh kisai theih tuak thute kan ding hi. Mipite hiam, ZID pawlmite hiam theih tuak thute zasak zel ding hi. ZID in thukizakna a neihleh a vai pua khat hi ding hi.

(i) Ex-Officio member: ZID President ahi nawn lo lakah a nunung pen ta in hih dinmun luah ding hi.

KHENPI 7 – ZOMI WOMEN UNION (ZWU)

• 29. ZWU in thukimna a neihleh ZID sungah om thei ding hi.
• 30. ZID sungah a omleh ZID neihsate zang thei ding hi.
• 31. ZID sungah a omleh ZWU President leh Secretary pen ZID EC member hi ding hi.
• 32. ZID sungah a om zong, kisam a sak uhleh ZWU in thunkhunpi, thu khensat theihna thuneihna leh sum a tuamin nei thei ding hi.
• 33. ZID sungah a omleh ZWU malakna kha li (4) teh khatvei peuhmah ZID EC meeting ah pulak ding hi.

KHENPI 8 – COMMITTEE

• 34. Khenpi thumna-a a kigen bangin ZID sung ah Committee nga (5) om ding hi.
• 35. Committee pen a hun dung zuiin behlap hiam, khiap hiam, puahphat hiam, beisak hiam kihih thei ding hi.
• 36. Committee khat ah Chairman leh Secretary baanah member thum (3) tek om ding hi.
• 37. ZID President leh General Secretary pen Committee khempeuhah Ex-Officio member hi ding hi. Custom and Culture Committee ah Security Committee-a Chairman zong Ex-Officio member hi ding hi.
• 38. Chairman leh Secretary pen EC member sung pana seh hi ding hi. A kisam diak vai-te ah midang zong seh theih ding hi.
• 39. Committee tengin zong kalsuandan ding thukhun nei tek ding hi.
• 40. ZID EC theihpih loh malakna nei thei lo ding uh hi. Committee-te in EC meeting ah a kalsuanna uh report pia zel ding hi.

KHENPI 9 – MEETING

41. ZID meeting khat peuh a kisap teh thukin lua ahih keileh ni nih hal peuhmahin zaksak kholh ding hi. A kisaipih member teng sap kim hamtang ding hi. Meeting sap teh agenda ding zong kihelsak tangtang ding hi.

42. EC meeting agenda ding OB in geel thei bek ding hi. General Meeting agenda ding EC in geel thei bek ding hi. A genda puak nuam ten OB tun masa ding hi.

43. Meeting khat peuhpeuh ah President in chairman seem ding hi. Member teng tawh kihalin Chairman leh Recording Secretary tukhawm ding hi.

44. President in a cial hiam a seh hiam a hihleh Vice President ten zong meeting ah chairman seem thei ding hi.

45. General Secretary in zong Recording Secretary dingin midang seh thei ding hi.

46. Meeting pat ma-in report tuamtuam piakna hun zat masak zel ding hi.

47. Meeting pat ding teh meeting nunung pena thu khensatte hiam, zawh siang nailoh vaite hiam a omleh pulak phot ding hi.

48. Meeting kah tengin a ngaihsutna uh tom kim takin gen tek zel ding hi.

49. Chairman in awnlam nei loin thulai la den ding hi. Agenda tawh kisai-ah a mimal ngaihsutna tam gen thei lo ding a, gennop a hauhleh chairman ding midang seh ding hi.

50. Chairman in meeting lim takin uk in, member-te thugen lim takin ngai ding hi. Agenda tawh kituak lo thu gen ahi zongin, aw ging zang ahi zongin, mimal kikapna zang ahi zongin a omleh khaam pahpha thei ding hi.

51. Meeting sungin thu haksa mahmah a omleh Pasian huhna genin thungetna neih zel ding hi.

52. Thu khat peuhpeuh a tamzaw thukimna (simple majority) tawh kikhensat zel ding hi. Thukimna lak haksat hun a om teh khut lap in hiam, secret ballot tawh hiam khensatna bawl zel ding hi. Tua khit ciang zong thu a kisikkim lai veve leh Chairman in a deihna lamah Casting vote pia thei ding hi.

53. A tamzaw thukimna pen i deihna tawh a kituak kei zongin i thukimna mah banga i pom hamtang ding hi.

54. Chairman in thukimna ciapteh (minute) dan ding genin Recording Secretary in khum zel ding hi.

55. Meeting zawh ma-in thukimna teng Recording Secretary in simkhia zel ding hi.

56. Meeting thukimnate nuai-ah Chairman leh Recording Secretary in letmat thuh zel ding hi.

57. Meeting vai tawh kisai a pualama pulak ding teng General Secretary in a pulak cih simloh thusim (confidential) hi khin ding hi.

58. Meeting thukimnate zaksak a kul teng kician takin zasak den ding hi.

59. Meeting thukimna bang banga kalsuan hamtang zel ding hi.

60. Meeting thukimsa peuhmah meeting thukimna mah loin kimelh thei lo ding hi.

61. Meeting kah lo ten meeting thukimnate kalh thei lo ding hi.

KHENPI 10 – QUORUM

62. General meeting ah EC member teng baanah ZID pawlmi a tawm pen mi sawmnga (50) pha loin vaihawm thei lo ding hi.

63. OB leh EC meeting ah a kisaipih member a lang sang tamzaw (simple majority) kah loin vaihawm thei lo ding hi.

64. Committee meeting ah Ex-officio member cihloh a tawm pen member mi li (4) pha loin vaihawm theilo ding hi.

KHENPI 11 – PANMUN LET SUNG (TERM)

65. Term khat pen kum khat hi ding hi.

66. Mi khat in panmun ngeina a kizomin term nih kaan len theilo ding hi. Term khat halin bel len kik thei ding hi.

67. ZID EC ah term khat zong a kihel ngei nai lote in President panmun len thei lo ding hi.

KHENPI 12 – KITEELNA (ELECTION)

68. EC in December ni 15 ma-in Election vaisai ding mi thum (3) seh ding hi. Election vaisai dingte pen candidate lakah a kihel lo hi hamtang ding a, ZID sungah a kizang ngeisa, kum ham lam leh kiteelna a makaih siam mi hih kul hi.

69. Election vaisaite in kiteelna, panmun hawmna leh panmun ki-apna teng makaih suak ding hi.

70. EC in December ni 25 ma-in nomination vai teng sai khin ding hi.

71. Kiteelna pen December ni 31 bei ma-in bawl hamtang ding hi.

72. Candidate-te tehna ding:

• (a) ZID ading hun a pia zo ding mi, mi lungsim picing leh mi deidanna a neilo mi hi ding hi.
• (b) Ama thukimna tektek tawh a ki-candidate hi ding hi.
• (c) ZID pawlmi hi hamtang ding hi.
• (d) Kiteelna muna a om hi hamtang ding hi.

73. Candidate teng dot ding:

• (a) ZID pawlmi ahi takpi hiam? (Sit ding)
• (b) Ama thukimna tektek tawh a ki-nominate ahi hiam?
• (c) Panmun a kipia (or a kiseh) peuhpeuh a seem nuam ding hiam?
  (d) Kiteel taktak ma-in nomination pan a kidok kik nuam hiam?

74. Candidate teng thu gensak ding:

• (a) Ama thu tomno (Bio-data) – Min, zi leh ta, khua, pawlpi, nasep, pilna-siamna etc.
• (b) Hun beisa-a minam nasepnate.
• (c) ZID ading panlak sawmdan.

75. Vote khia thei dingte:

• (a) Kiteelna ah ZID member teng bekin vote (mee) khia thei ding hi.
• (b) Candidate tengin vote khia thei lo ding hi.

76. Kiteelzia ding:

• (a) Election vaisai dinga seh mi thum in kiteelna makaih ding hi.
• (b) Candidate teng lak pan mi 15 teelkhiat ding hi.
• (c) Secret ballot tawh thumvei teel suah ding hi.
• (d) Khatvei teelin vote tam mu pen khatna pan ngana dong lak ding hi.
• (e) Secret ballot ah min hi loin candidate-te nambat kituahpih gelhin teel ding hi.
• (f) Teel thak teng Siampi khat in thu ngetsak ding hi.
• (g) Kiteel vai-ah lungkim lohna a omleh nai 24 sungin lai tawh gelhin Election vaisaite kiangah piak ding hi. Thu haksa a omleh Election vaisai teng leh EC in khensatna bawl ding hi.

77. Panmun kibulhdan ding:

• (a) Election vaisai dinga seh mi thum in panmun sehna makaih ding hi.
• (b) Kiteel ni leh panmun seh ni kibangsak loin ni tuam khata bawl ding hi.
• (c) January ni 5 ma-in panmun seh hamtang ding hi.
• (d) Panmun pen pilna siamna zui-in ahi zongin, pawlpi tuamtuam pan kihel kimna ding ahi zongin, panmun kinai diakte omna kihaldan ahi zongin ngaihsun kawma she ding hi.
• (e) Panmun nei teng Office Bearers (O.B) kici ding a, tua lo teng Executive Committee Member hi ding hi.

78. Panmun ki-apna

• (a) Election vaisai dinga seh mi thum in panmun ki-apna makaih ding hi.
• (b) January ni 10 ma peuhmahin panmun ki-ap ding hi.
• (c) Panmun ki-ap tengin ZID minute bu-ah suai kai (letmat thuh) tek ding hi.
• (d) ZID neihsa van, lai, sum leh sazian teng kim taka ki-ap ding hi.
• (e) Panmun ki-ap ni teh makai lui ten makai thakte kiangah ZID kalsuanzia kicing takin hilhcianna leh sinsakna bawl ding hi.

KHENPI 13 – PANMUN PAN TAWPNA LEH PANMUN GUANNA VAI

79. Panmun nei peuhmah a kizoma kha thum sung ZID ah a kihel nawn lohin hiam, meeting a kah nawn lohin hiam ahihleh amah le amah a kitawp cihna hi ding hi.

80. President in a hang khat peuh tawh tawp kulna a neih leh tawpna lai gelhin Vice President kiang ap ding hi. Panmun nei dang khat peuh in tawp kulna a neih leh tawpna lai gelhin President kiang ap ding hi.

81. Panmun nei khat peuh khawlna vai pen EC bekin kipsak thei ding hi.

82. Panmun awng hukna hiam, panmun thak behlapna hiam pen EC bekin thu nei thei ding hi.

83. Panmun piak thak peuhmah President in panmun sehna lai (appointment letter) bawlin a piak ding hi.

KHENPI 14 – DANKALHNA LEH KIGAWTNA

84. ZID dankalhna in a nuaia teng huam ding hi:-

• (a) ZID thukhun leh thukimna tawh kituak lo-a a gamtate.
• (b) ZID leh i minam a langpang, a mindaisakte.
• (c) ZID neihsa sum leh pai zang khialte.
• (d) ZID theihpih loha ZID min tawh kal a suante.
• (e) ZID hihna mimal hamphatpih nanga zangte.
• (f) ZID thusim a im zo lote.
• (g) ZID makai sungah seppihte tawh thu kituak thei ngei lote.

85. ZID dankalhte pen a hun ciangtan nei-in panmun len thei nawn lo dingin hiam, ZID pawlmite hamphatna peuhmah sang thei nawn lo dingin hiam gawtna piak ding hi.

86. Dankalh tawh kisai thukhenna pen EC in sai ding hi.

KHENPI 15 – THUBUAI

87. ZID pawlmi khat leh khat kikalah buaina a omleh Custom & Culture Committee leh Security Committee kikopin sai ding hi. Sai zawh loh a neih leh OB in huh ding hi.

88. Zo ngeina tawh kisai peuhmah ah thukhen a kul leh Custom & Culture Committee in khensatna bawl ding hi.

89. ZID sunga panmun nei khat leh khat kikalah buaina a omleh EC in sai ding hi.

90. Vaihawmna ah buaina neite kihel thei lo ding hi.

91. Pawl dang, nam dang tawh buaina a omleh OB in sai ding hi.

92. Committee hiam OB hiam in sai zawh loh a neih peuhmah EC tun ding hi. EC in sai zawh loh a neih peuhmah GM tun ding hi.

93. Buaina tawh kisai ZID tun nuam peuhmah in lai tawh gelhin General Secretary kiang pia ding hi.

KHENPI 16 – THUKHUNPI TAWH KISAI BUAINA

94. Thukhunpi bu sunga kihel lo thu tawh kisai hiam, thukhunpi bu sunga thumal zatte tawh kisai buaina hiam a om leh EC in khensat ding hi.

KHENPI 17 – THUKHUNPI PUAHPHATNA

95. ZID thukhunpi pen General Meeting hiam, Special/Emergency General Meeting hiam bekin puahpha thei ding hi.

96. Thukhunpi puahna pen General Meeting hiam, Special/Emergency General Meeting hiama paikhawm mipi sehthum suah sehnih bekin kipsak thei ding hi.

97. EC in loh theih loha thukhunpi puahphatna hiam behlapna hiam a neihleh General Meeting masa pen ah mipi thukimpihna a lak kik tektek ding hi.

98. ZID makai panmun len sung pan thukhunpi tawh kisai puahphatnopna nei a omleh lai tawh gelhin President kiang tun ding hi. OB in pom tak a sakleh EC tun ding hi. EC in pom taak a sakleh GM tun ding hi.