Zomi kahihman ka angtanna ~ CS Khai

Zomi kahihman ka angtanna ~ CS Khai

Thu patna: Leitungah minam le kampau gen zawhlohin tam a, tua minam leh kampau tampite sungpanin, Zomi in hong bawlin Zogam ah hong piangsak a, Zokam hong pausak Pasian tungah lungdamna ka ko masa hi.

1. Zogam Ah Ka Pianna Hangin Ka Angtanna

Leitungah gam tampi om a, tua gamte sungpanin Zogamah ka pian khakmanin ka angtang hi. Zomi hi napi in Zogam ah a suaklo le a khang khialo te in, Zomi hihna le Zogam a nopna taktak thei kha lo, ciam kha taktak lo uh hi. A hi zongin nu le pa, le midang te tungpanin Zomi le Zogam thu kigen te theithei khasam uh hi. Mi pawlkhatte in Kawlgamah, Zogamah ka piankhak kamsia lua ing ci a, a gen, ih za thei zel hi. A hangin Zogam ah leisung sumpiang omlo a, annek tuidawn nangawn kham khopding Zogam leitangin hongpia zolo hi.

Tua ban ah mual le guamtawh kidim a hihman in kizopna ding zong haksa a, khua khat leh khat kikal khe tawh ki pai ngekngek lai hi, nuntak khuasakna haksa hi, ih ci hi. A hi zong in mailam ah Zogam pen tua bang hong hi nawnlo ding hi. Zogam a hoihlo hi lo a, a ki puahnailoh man in, a hoihlo le a nuamlo tawh a kibang lai ahihi. Zogam a nopdan ding le a hoih danding ka mit kha in a mu hi.

A beisa April 1-3 sung Germany gampanin Switzerland gam, France (Piancit/tit) gam ka va zin kha hi. Switzerland gam ka zit kawikawi ciangin Zogam tawh a kibatna muntampi ka mu hi. Gentehna in Matterhorn kici mual khat om a, tua mualpen Switzerland gam khanglam a om mualte lak pan in a sang penpen a hihi. Thangmual, Lentangmualte tawh kibanga, mual le guam tampi om hina pi-in limtak in kipuah a hihmanin etlawm mahmah hi.

Munsia leh mun hoihlo a bang Matterhorn mualbul ah Meilengte manlah lua kisai in taizauzau zawzen phet uh hi. Lamdang ka sa hi. Lungsim sungah hong kilo thu in Zogam ah Car (Mawtaw) bek hiloin, meileng nangawn a pai thei ding ahih lam ka phawk hi. Thangmualdung, Lentang mualdungte ah zong tua bangin a hi theilua ding ahih lam ka phawk thak hi. Kham le zaang, mual le guam ki deidanna cih bang mahmah ki mu khalo a, mun khempeuh et lawm mahmah hi.

Kum 2006-2007 sung Holland gam (Netherlands) ah sang ka kah sungin Holland mite nasepnate, tuikhang in mi tampi nuntakna le inn le lo tampi a suksiat nungin, tui lauhuaina pan in a suahtak na ding un, a gam uh a bawlzia te uh ka mu kawikawi hi. A gam uh puah lua kisa: “God created the rest of the world, but we made Holland” ci uh hi. Pasian in leitung khempeuh bawla, ko kahih uhleh Holland gam ka bawl uh hi ci uh hi. Holland mite in a gam uh a puah uh sangin Swiss mite in a gam uh a puahna uh le, mual le guampipi te kantanin meileng te a taiziahziahna, mun khempeuh a etlawm theithei dingin a bawlna uh ka muh ciangin lamdang sakna thu gen loin ka om thei kei hi.

Hih bang thu te ka ngaih sutciang in Zogam zong nikhat niciang in gam hoih, gam nuam hong suak ding, mual le guam ci teng kipuah ding a, mualsangte ki zalhtam in, guam lianpipi te hong ki vuk ding hi. Tua ciangin munsia khat zong om nawnlo ding a, munval le mival cihbang om nawnlo ding hi. Khua a khaal hangin Zogam ah Aircon kisam lo a, phalbi ciangin zong Heater (Heizung) kisam se lo hi. Tua hi a, khuahun nuam in, huihsiangtho, tuisiangtho leh, munsiangtho a hi Zogam ah ka pian khak manin ka angtang mahmah hi.

2. Zogam ah Leisung Sumpiang A Omloh Manin Ka Lungdamna

Kawlgam sung a om State leh Divisionte tawh enkaak leng Zogam ah annek tuidawn ding a kicin loh banah Leisung sumpiang bangmah ih nei kei hi. Tua manin sum le paai, neih le lam ah state dang te sangin ki zawngzaw tham hi. Zogam ah nuntakna cingkhop dingin a piang bangmah omlo a hih manin Zomite in Pilna hanciam in zonpi in ki zong hi. Kawlgam sungah , minam le mimal tawh tuat leng laisiam a tampen Zomite ih hi uh hi. Zogam ah bangmah pianglo a hihman in Zomite in Pilna sinding ki thupisak a, sangkah in pilna ngah nading ahih nak leh nu le pate in, vokkuangkhup liangin tate pilna dingin sum leitawi in hong pantah uh hi.

Neih le lamte hong kiguksak theia, mitphiat kalsungin maimang in vut le vai suakthei lai hi. Pilna ahihleh kua mahin hong guksak theilo a, bektham lohin, mailam ading in lametna hongguan hi. Zogam sungah neih leh lam, leisung sumpiang bangmah neita kei le hang, Pasia hongpiak Khuak ih nei hi. Minam dangte thatang , neih le lam tawh ih zo ngeikei ding hi. Eite sangin tamzaw uh a, neih le lam kicing in neizaw mah lai uh hi. Tua a hihmanin Pasian hongpiak ih KHUAK Zomite in limzat mahmah ding hi hang. Zomi khang masate in Pilna thupisak in, na hanciam pha mahmah uh a hih manin, Zomite sungah mipil, milian tampi ih nei hi.

Amau te hangin ih maitaang a, mailam a ding lametna hongpia to zeluh ahih manin , Zogam ah leisung sumpiang ih neih loh hangin Zomi mipil le miliante hangin lungdam huai mahmah hi. Khangmasa ten Pilna a hahkat mah bangun tulai khangthak te in Pilna mah ih thupitsak ding a hihi. Zogam ah Kham le Ngun neilo hi hang. Zogam ah Kham le Ngunte pianglo a hihmanin, Pasian hogpiak, ih Khuakte Khamkhuuk hisak ding hi hang. Kua mahin hong guksak zolo ding hi.

3. Zogam Khuata Panin A Khangkhia Ka Hihna Hangin Ka Lungdamna

Khuata pan in khangkhia mi ka hih manin gentheihna namcin ka tuak hi. Sum le paai haksatna, pilna le siamna lamah mite phakzawhlohna, a ki genkhia theilo maizumna tamveipi ka tuak ngei hi. Khatveivei mihing lungsim tawh ka ngaihsut ciangin ka sihnop hun tamveipi a om thei hi. Nuntak khuasak, silh le ten, annek tuidawn haksa hi. Mite vanleng, mawtaw cihbang tawh khualzin in a a om laitak un gamsung khualzinna ah khe ki zang a, khatveivei zanpuan le lukham cih te zong omse lo in, lamkal ah suangtum peuh Jacob bangin lukham in om hun tamveipi om a, a hi zongin mang hoih ki man veve hi.

A haksat laitakin, a haksat hangin, hihte in tulaitak le mailam nuntaak khuasakna a dingin tampi hong huh a hihna ka phawk hi. MIT, Insein ah sang ka kaih lai-in, zingsang sim in Besan meh ki ne den hi. Kum 3, 4 bang besan meh nek hi mawk ahih manin lawmdangte in cimtak in, bemeh ki gen leh a luaksuak pawlkhat bang om thei lai hi. Mehdang khatpeuh leilo in an ne theilo uh a, mehdang aom kei leh gilkialkial den cihna hi mai hi.

Gen theihna khuata pan in a khangkhia ka hih man in, lupna nuamta kei leh ka ih muthei a, meh limta kei leh ka gilvah dong, an ka nezo veve hi. Hih te in, Pasian na sepna leh ka kalsuan na ah tamveipitak hong huh uh hi. Lupna nop loh manin mite tamveipi ih mu theilo in a om laitak in, kei khuaphawk lo zah dongin nuamsa in ka ih mu theia, meh limloh manin, mite gilkial in a om laitak in, Lungnuam takin ka sep, ka bawldingte ka zom thei hi.

Tu in Pasian hehpihna tawh gamsung, gampua ah ka zin kawikawi thei a, khuata nuntakna sangin a haksa zaw tam nawnlo ahih manin, ka omom na mun nuam ka sa thei ta hi. Kei mahbang a, nuntakna haksa le, khuata nuntak a sin khate a ding in, mannei leh manpha phadiak dingin lamen ka hih man in hi bangin lai hong gelh ka hihi. Ih tuak khak thu haksate Pasian hong taat taatna hi lo hi kua in ci thei ding hiam?

Khuapi sungah ih teeng a, khuata ah ih teng zongin, Kawlgam, vaigam ah ih tenga, nisuah nitumna gam ah ih teng zong in, ih omom na mun ah eitawh kituak in haksatna hong tung veve dinga, tua bang hunciangin ih haksatnate a pha lamin lathei hi leng tuate in ih masuan a dingin a hoihzaw le a phazaw lametna hong guan thei dingin ka lamen hi.

4. Mun le Gamte Sangin Amite Thupi Masazaw A Hihlam Phawkhuai

Abraham le Lot , Pasian in Thupha pia aa a neihsa uh ganhing te a dingin mun ki cingzo nawnlo hi. Tua banah Abraham gancingte leh Lot gancingte ki tawng thei zelzel uh hi. Khatvei Abraham in, Lot kiang ah, hi bang in ci hi. ‘’ Pasian hongpiaksa ganno te kicing ta a, a maute a ding in mun kicing zo nawnlo a hihmanin, ih ki khen kulta ding hi. Nang veilam na lak leh, ken taklam ka lading hi’’ ci hi. Lot zong khuadak pah tieuteu in Leitanghoihna, gam hoihna Jordan gun kuam khempeuh hong teel hi. Abraham in a hih leh Lot telloh na mun sehnel gam, gam hoihlohna mun, Canaan gam ah hong teng hi.

Lot in a leitung mittawh a muh, nuntakna nuamding, leihoih le mun hoihna gam a hong teel ahihi. A teel mahbangin Jordan gunkuam a teng mite in neihleh lam kicingtakin nei uh a, nuamsa thei mahmah uh hi. Mite in zu le sa nein, paaktat in, a ut bang un gam ta uh hi. Pasian hehna hongtung a, Sodom le Gomorrah meitawh haltum hong hi ta hi. Lot in apahtak, a kisak theihpi gamnuam, hauhna gam pen Kaat leh meikuang tawh kidim in hong kangtum ta hi. Vut le vaai suakkhin ta hi.

Abraham in a hih leh, sehnel gamah a teen hangin, a omom na munah Pasianin thupha pia ahihmanin, tuiphulloh na ding mun pan in tui hongphula, sehnelgam pen lonona gam Pasian in suaksak hi. Sehnelgam Pasianin niimsak dildial lel hi. Hih laiah a ki muhthei thu in, a ki muthei gam hoih sangin a ki mu theilo thupha a thupit zawk na ih mu hi.

Zogam ah ih om zongin Pasian in thupha hongpia nuam peuh leh ih gam zong hong niim kik thei a, sehnel gam ah siktui hong phul khia thei a hih lam phawk ni. A thupi pen in koi gam, koi mun ah ih om zong in Pasian thupha a ngah mi hihding a kisam a hihi. Ih omom na munah Thupha ngah ih hih nak leh, sehnel gam ah ih om zongin Pasian in ih nuntak na ding hong na vaihawm veve ding hi.

Gam thupi USA, Europe gam le gamtuamtuamte ih tung zo keizong in ih omna mun ah Pasian thupha sang ih suah theihna ding in Pasian maipha zon tawntungding mangngilh kei ni. Ih Pasian pen Dollar Pasian bek hilo in, Kyats Pasian, Rupees Pasian ahihna zong phawk tawntungni. Gamsung ah nuntakna bangzahtak in a haksa zong in gilpi a bawlpa in asung a, a ki koihding tavuan lak zawh ngap, a hihman in, a bawl ahihhi. Tua hi a, mun le gamte thupi masa zawlo in, ei mihingte mahmah Thuphasang ih suakding a thupi penpen ahihi.

5. Khan Tui Luanzia Et Theihding A Ki Sapna

Gam le lei, minam itna tawh kisai in mipil ten muhzia tuamtuam na nei uh hi. Zonet sungah zong muhzia tuamtuam ih sim khinta hi. Itna ih cih in, a genhak mahmah le a tel hak mahmah thu ah hi. Zogam ah teenloh man le Zomite teenpih loh (zi le pasal) manin Zomite le Zogam itlo ki ci thei tuanlo ding hi.

Mipawl khatte Zomite teenpih lo in, Zogam ah a teenloh hangin, Zomite a teenpih le Zogam a teeng mitampi te sangin Zomi le Zogam a it zaw tham tampi a om dinglam phawk huai kha ding hi. Globalization hangin leitung ki khel a, globalization in nopna le haksatna hong tunpih hi. Zomite bek hilo in leitungah minam tuamtuam te zong gam khat pan gam khatah nuntakna ding zongin lal kawikawi uh hi.

Globalization ih hong sukkhakna hang ahihi. Globalization khantuiluan in leitung muntuamtuam bek hilo in Zogam le Zomite zong hong nawkkha in hong zaapkha hi. Hih a khauh mahmah tuihualpi ih nansawm hangin ih nang zo kei ding a, saipi khuasung ah pai a,uite in a noh hangin phamawhsalo, awlmawh selo in, a ma thu in a pai hiathiat tawh ki bang lel kha ding hi.

Tua a hih man in Globalization tuihualpi nan sawm lo in, bang ci leng hih tuihualpi sungah nungta thei veve dinga, hih tuihualpi tawh bang cih tonkhop thei ding cih ngaihsut huai dingin ka um hi. ‘Rev. Dr. Pum Za Thang in a laigelhna khatah, ‘’ Haksatna sam tawm kei in, a hi zongin a ma thu in hong tun leh, tua haksatna tawh om khop theihding kisin in‘‘ ci hi.

Thu Khupna

Zomite ih thupitnak leh koimun, koigam ah ih om zongin, Zogam a thupi ding, hong hi lel ding hi. Zogam ngaipipi le, khenglah pipi mah in Zogam pan a ki lallal hong suak ta hi. Khasiat huai in zong dahhuai mahmah hi. Kawlte paunak khat ah ‘’Kuh wuanna kube tihde’’. Ei gilnat eibek in ih thei hi’’ ci hi. Hi thei hi leh u le nau, nu le pate tawh ih gamah nuamtak in teengkhawm in, zingvai, nitakvai hawm khop theih a lunggulhlo kuamah omlo dinghi.

A hi zongin u le naute tawh teng khawm a, annek tuidawnding, zingan, nitak an takpi ding neilo a, om khawm liailuai a, nek le dawn haksatna hangin u le nau takpi ki tawngtawng a, ih om sangin lono na munah a pai zo ih om zong a hoihpen ahihloh hangin the second best hong hiveve ding in ka ngaih sun hi.

Zomi khempeuh in nu le pa, u le nau, Zogam le Zolei a itlo, a ngai lo kua mah omlo ding hi. Itna le ngaihna lahsiamdan a kibanglo hi lel ding hi. India le Sente in gamtuamtuam ah sum le paai zon cihtak in zong uh a, a ngah uh sum le paaite a gam uh ah zangkik uh a hih manin khantoh lawh uh hi. Israel te in leitung gam tuamtuam ah a ki theihthang uh hangin Israel gam phattuamna ding nasep khawltuanlo uh ahih manin, gamneu no khat ahih hangin, a veng a paamte un zo zolo uh hi.

A gam a lei uh khual in panpih tangtang uh a, mite simmawh, zawhthawh dingin omlo uh hi. Tua mah bangin Zomite zong koimun, koigam ah omta leng Zomi le Zomgam it in, phatuam ngaihtakin ih sep theihna munciat panin nasemte ih hihman in, Zomi ka hihna hangin ka angtang a, Zomi a hongbawl Pasian tungah kalung akim hi. CSKhai, Bochum, Germany