Zomi Christian pawlpite in abuaipih lailai thu

Zomi Christian pawlpite in abuaipih lailai thu

Zomite sungah Pasian Lungdamna thu hong tun pen 1899 kum hi a, 1899 pan in 1999 ciang in kum zakhat na hi khin ta hi. Zomi Khristian pawlpite thu tel kante in kum zakhat masa (1899-1999) sung Zomi Khristiante nuntakzia a hun li in kikhen thei hi na ci uh hi.

• 1. 1899-1950 Tuiphumte leh Lawkite kinawt hun. (The Period of Confrontation)
• 2. 1950-1970 Khristian pawl tuamtuamte kidem hun. (The Period of Competition)
• 3. 1970-1983 Kha khanlawh hun. (Revival)
• 4. 1983-1999 Pasian thupuak hun. (Mission) {Rev. Dr. Simon Pau Khan En’ gelh thuluite kaihkhopna, ‘nuntakpih ding tuhlaigil’ laibu, Sia. Job Nang Khaw Thawng kaikhop sungpan ki tei}

Hih a tung a ka hong gualh bangin thutel kante in hun na khen uh a, ahizong in ke’n 1950-1970 sung Khristian pawl tuamtuamte kidem hun kici pen,tuni dongin zong hi toto lai hi in ka thei hi.

Zomi Khristian pawlpite sunga i ki lamdangna uh le kitelkhialh, kithutuahlo na tampitak pen ‘Kha mitna takpi’ (True Spirituality) kici telsiamloh man hi in ka mu hi, adang zong bel kithuneihsak nopna,makai ding kituh na cih bang zong om tham hi.

Ahi zongin khamitna takpi tel khialhna pen lian mahmah in a suk khak zong lian mahmah hi. Khamitna takpi telkhialhna pen Laisiangtho thugen telkhialhna hang hong hipah hi. Laisiangtho in ‘Kha Letsong’ (The gifts of the Holy Spirit) acih leh ‘Kha gah’ (The fruit of the Spirit) ci in a gen telkhialh na hang hong hi leuleu hi.

Tua ahihmanin hih Thului/ thusun ah hihte gel- Kha Letsong le Kha gah kici bang hi hiam cih limtak en cian in, khamitna takpi icih bang hi hiam cih i dawng ding hi.

Fig. 1: Kha Letsongte (Rom 12:6-8 Korin Masa 12:4-11)

• 1. Pasian thugen theihna 1. Thuthuk pilna
• 2. Nasepna 2. Thugensiamna
• 3. Thu hilh theina 3. Upna
• 4. Midang hanthot theina 4. Cina damsakna
• 5. Midangte hop theihna 5. Nalamdang bawltheihna
• 6. Makaih theina 6. Pasian thu hilh ding siamna
• 7. Hehpihtheina 7. Khasiantho piak siamna ahi le ahilo khentheina ding
• 8. Paulamdang pau theina
• 9. Paulamdang tuamtuam a khiatna gentheihna

Efesa 4:11 Peter masa 4:11

• 1. Sawltak nasep 1. Pasian thu hilhna
• 2. Kamsang nasep 2. Nasepna
• 3. Thuhilh kawikawi nasep
• 4. Pawlpi kem nasep
• 5. Laihilh nasep

Hih a tung a Fig.1 ah imuh khempeuh pen Laisiantho thuciamthak sungah Khasiangtho in thu umte a hong piak Letsongte ahi hi. “ Hihte pen pianpih siam nate (talents) hilo-a, Khasiangtho neihna tawh a piang pan ahih hi”. {Kap, Nang Lyan, Systematic Theology (Tedim-Chin), Laimai 23}.

Kha Letsongte pen Topa in a hong piakna hang leh a kipiak zia lim tak le kiciantak in Sawltak Paul in Korin laikhak 12 ah na gelh hi. Korin masa12:1 ah “Sanggamte aw, Kha Siang-tho’ hong piak letsong a tuamtuamte tawh kisai thu na theih loh khak ding uh ka deih kei hi” cih tawh a lai gelh na pan thong hi. A ban gensuk lai in, Kha Letsong nam tuamtuamte a gen ciang in “tua Khasaingtho mah in ‘adang khat’ tungah thugen siamna hong guan a, ‘adang khat’ tungah pau lamdang pauhtheina, adang khat tungah tua pau lamdang tuamtuam paunate a khiatna gentheihna hong pia hi” na ci thuah lai hi.

Hih tak a tel khelhlo ding aphamoh pen ‘ adang khat tungah na ci teekteek hi’ tua ahih le pau lamdang pau theihna pen piangthak khempeuh pau ding hilo a Khasiangtho in hoih asak na bangin mi apiak hi zaw a, thugen siamna mah zong mi khempeuh tungah pialo a, kisam a sak bang in mi tungah apiak na hi zaw hi.

Kha Letsong i tankhak pen eiteel hilo a Kha Siangtho in amah hoihsak bang in ahong piak ahih manin paulamdang a piak khat in paulamdang ngahlo a letsong nam tuam a ngah khat kei sang in na khami kei zaw hi ci theilo ding hi. A hang in miin amau deih bang letsong a ngah hilo in Khasiantho in kisam asak bangin mi tuamtuam tung ah a tuamtuam a piak ahi hi.Mikhempeuh aki bang ngah ding cihna omlo hi.

Kha Letsongte mimal khat in a ngah zia tawh akhamitna (a person spirituality) kiteh theilo ding cihna hi pah hi bang hang hiam cih leh Kha in mi tuamtuam kiangah a nam tuamtuam in pia hi. Tua ahih mawk le Khamitna takpi bang tawh teh thei mawk ding ? How does one weight what true spirituality is?

Topa Jesu in Matt 7:15-20 ah Singkung a gahin kithei hi na ci hi, singkung hoih in gah hoih suangin ahoihlo in gah hoihlo suang na ci hi. Khamitna mah zong Khagah suang le suanglo in kitel thei ding cihna hipah a. I tehna ding taktak pen mi khat in Jesu um in khagah gahin asuang hiam cih hong hi zaw ding na hi hi. Khagah i cih bang hi hiam? Koi ah kimu ding?

Fig. 2: Kha Gah (Galati 5:22-23)

• Itna
• Lungdamna
• Lungnopna
• Lungduaina
• Migitna
• Hoihna
• Cihtakna
• Dikna
• Pumpi ki-uk zawh na

Fig. 2 pan in lim tak in Khagah ki mu thei hi. Galati 5:22-23 in agenna ah Khagah kici Itna, lungduaina, pumpi ki-uk zawh na le atuamtuam (Fig. 2 na en in) ci hi. Khamitna takpi i cih pen Jesu gumpa le Topa (Ukpi pa) in nei in tua kawm in itna hauh mahmahna khong, mi it ngaungauna khong hizaw, pumpi ki-uk zawh mahmah na khong na hizaw hi.

More: Kha Siangtho Lawnna le Pianthakna (Regeneration and Conversion)

Tua bang ahihmawk peuhmah le kam tuampau, pau lamdang khong pau in, biakinn sungah laamlaam napi, kamsangin diangdiang kici na pi in itna haulo-nei mello, lungduailo in heh niloh, migensia niloh, pumpi uk zolo in, ei mah ‘lei’ nangawn a kem zolo ta dingin bel khami mahmah teh nangpen ci in Laisiangtho in hong gen peuhmahlo ding hi.

‘Khamit na takpi’ (True Sprituality)’ pen ‘Kha Letsongte (Gifts of the Spirit)’ hilo in ‘Kha Gah (Fruit of the Spirit)’ tawh tawikhai zaw ta ni! Tg. Kham Khual

ETKAK:

• 1. Barclay, William, The Letters to the Corinthians, Theological publications in India, Bangalore, 2010, Pg. 124- 137.
• 2. Kap, Nang Lyan, Systematic Theology (Tedim-Chin), Timothy Bible School, Tedim Town, Chin State, Myanmar, 2005.
• 3. Enns, Paul, The Moody Handbook of Theology, Moody Publishers, Chicago, USA, 2008.
• 4. Erickson, J.Millard, Christian Theology, Baker Academic, Grand rapids, Micihgan, USA, 1998, Pg.891.