Zolai Pupi Dr. Gin En Cin

Zolai Pupi Dr. Gin En Cin

Pupi Hang Sawk pan khang 17 na Pu Son Tual le Pi Ning Khaw Vial (Hatlang) sung panin Tuitum khua ah Pu Dr. H Gin En Cin suak hi. A suah ni lian kician lo hi. Sakawng-a a pute zunun kum hi, ci-in a nu le a pa in ciamteh uh hi. Aneu lai-in citak mahmah a phengphi-in sikha cih bang kihtak nei lo hi. Christian innkuan sunga khangkhia hi-a aneu mahmah lai-a a nu la hilhte hih lai a gelh kum 73 bang a phak dong thei lai hi.

A nu in biakna lamah pantah a, aneu tunga kipan a tek dong Pasian nasep nuamsa hi. 1946 April 6 ni-in Rev Vial Nang in kongpi lui ah a lawmte nga (Tg. Kap Za Thang, Tg. Tual Za Do, Tg. Thang Khaw Hau….) tawh tuiphum hi. A tui kiphum un Thang Khaw Hau longal in pheituam teng nai lo uh hi.

Amau unau:

• Pi Luan Khaw Man – 2Lt. Neng Za Thang (Tawtak)
• Rev Khup Khen Thang Dip.Th – Pi Nem Khan Cing (Tawtak)
• Tg Kham Khan Thang (tangvalno in si)
• H. Gin En Cin D.D -Sister Don Khaw Hau (Buansing)
• Pi Ning Suan Cing _ Pu Hang Za Kam (Tawtak)
• Tg. Sian Khan Thawn (aneu lai-in si)
• Tg. Pau Khan Suan (aneu lai-in si)
• Pi Don Ngaih Niang – Neng Za Suan (Hatlang)

1944-1945 Tuitum ah nitak sang kah a Zolai Tannih zo hi. Nitak in sang kah a tua hun sungin a nu lah sikhin a unu lah mothaka a u Rev Khup Khen Thang lah Tedim ah LST sang kahin a amah le a pa in lo kho uh hi. 1946 – 1947 Tonzang Zolai sangah Tanli zo hi. 1948-1949 kumin Tongzang ah Manglai tannga zo hi. 1952 panin Tedim ah kahin 1956 kumin Tan 8 zo a, 1957 kumin SLC kah kim lai tawpin sumbawl kipan hi.

A sumbawl sungin sumkhek (Hundi) sema 1958 kumin Phaipi (Imphal) ah om hi. 1959 kum ciangin Calcutta ah om a Tamu ah tuahsia in sumbawl khawl hi. 1960 pawl ciangin Tonzang Canteen ah sem a, a sumsa tangpi sai dingkiksak hi.

1960 kum CMBC biakinn hon le Tedim khua pawlpi pian zawh kum 50 Golden Jubilee kithuah pawipi ah Rev.Vial Nang Thuhilhna le a la phuah lai-in gelhsak a, ama sum bei-in mipi tungah hawmkhiatsak hi (tua zawh ni 7 in Rev. Vial Nang in hong nusia hi) Tua huna kipan Pasian nasep ding utna lungsim nei hi.

1964 kuma kipan TBA nuai-ah kum thum sung Cope Memorial Printing Press ah Manager sem a, Zogam ah Press nasem a masapen hi. Lungvakna Endik tawh thuah hi. 1972 in BCC vahawmna tawh Khangham Laihilhna Thukhungpi (Adult Literacy Organiser (ALO)) kum thum sung sem hi.

Tua sungin Tedim, Tongzang gama om khuate ah zin kim hi. Kum thum sung mah Press Manager le ALO sem khawm hi. Tua kum 6 sungin Zolai thei lo mi 1000 theihna Laipi (Certificate) pia hi. 1964 kum in Tedim khangnote tawh Jesu tangthu a suahna pan a vankahna dong drama in lak uh hi.

Lahna khuate:

• 1. Kansau TBA kumcin khawmpi
• 2. Tonzang Buzung tual
• 3. Tedim CMBC biakinnpi
• 4. Falam Town Hall
• 5. Hakha Suang Biakinnpi
• 6. Buanlung ZBC kum 3 cin’ khawmpi ah kilak a H.Gin En Cin Jesu Limzil (Actor) in pang hi. A kilak masapen hi.

1969 July 19 ni zingsang CMBC biakinnpi ah thuhilh ding a kiginna ah piangthak hi. A piangthakna Oswold J Smith gelh “Kal Li Bek” (Just Four Steps) a cih tract tungtawn ahi hi. Tua hotkhiatna thugenna tract Zokam in letkhia pah a copy 3000 hawmkhia hi. Tract amasa pen hi-a tua ni-a a thuhilhna in gamtat hoih le thukham zuihna tawh vantung tun sawmte lungsim sukha lua ahih manin mi tampi lunghimawh uh a hotkhiatna ngah lawh uh hi. Topa in minthanna tangta hen. Amah zong tua huna kipan a paina peuh ah Evangelist sem suak pah hi.

1972 kuma kipan Zolai Simbu puah kikna ah Committee in kihel hi. Zolai Simbu puah Committee kilaihlaih taleh amah kilaih ngeilo hi. ABC Chart pan Tanli dong a kipuahpha ahi hi. Hih lai a gelh hunin a kipuah zawh kum 36 phata hi. Zolai puahna ah a hanciam phadiak leh ma tampi a tutpih Sia Kam Khan Thang, Sia Tawng Khaw Thang, Siapi Lam Za Tint le Siapi Suan Khan Mang ahi hi. Zomite in Zolai Simbu kumsima a ngahden nading amah tavuan kipia a, kum khat beek kisamsak lo hi.

Hanciam a Zolai a bawlna ahang a kidot ciangin “Zomite in i Zolai mah tawh Pasian kammal Laisiangtho simin i Zokam mah tawh Pasian pahtawina la sa-in, i Zokam mah tawh thu i nget ciangin Pasian tawh kizopna thukpen in, i lungsim hong bunpen hi. Zolai ka sep ciangin Pasian na a sema kingaihsun ka hi hi. Tua ban ah Zomite mi namkhata i kiciamtehna ahih manin sep loh phamawh hi,” ci-in dawng hi.

1974 kum TBCEU in Tedim Labu bawl ding tavuan a lak ciangin Sia Gin Za Tuang, Sia Hang Khan Pau le H. Gin En Cin aman Labu committee teng Hakhate le Falamte tawh Labu sunga la guan ding kikumin Falam ah va pai uh a la nambat va gual uh hi. A thute puahphat a kizawh ciangin TBCEU Secretary P. Thuam Khan Khup in fair copy khen a, amal maan le maan lo H. Gin En Cin in a sittel khit ciangin solfa tawh kithuah hi. Tua pen Tedim labu ci-a 1973 kuma kihawm khia pen hi-a solfa tawh kithuah Labu i neih masak pen ahi hi.

1974 TBA gam sungah kha khanlawhna a tun ciangin TBA makaipite in sang thei nai lo uh ahih manun TBA zuma sem dingin deih lo uh a TBA delegate buppi mi alang sanga khata tamzaw thukimna tawh Press Manager Cum ALO sem kimlai kitawpsak hi. Pianthakna thu hanga nasep tan a masapen hi, ci-in EBC in ciamteh hi. 1976 Jan 26 ni-in a it mahmah lawmnu Siapi Vul Za Thang le Pi Ning Za Niang tanu upapen Siama (Midwife) Don Khaw Hau (Tun Sister) tawh kiteng hi. EBC pawlpi in Bo Kam Cin Hang te inn nuai Biakinn a a sap hun hi a, tua biakinn ah Rev Hau Lian Kham in pumkhat suaksak hi.

Pasian piak thuphate:

• 1. Pa Tual Sian Sum B.A (Hist) (Can) – Nu Anna Lal Mangaih Khim
• 2. Nu Vial San Lun B.A; B.A.B.S; M.Div – Pa Suan Khan Tuang
• 3. Lia Niang Muan Kim BC.Sc (Hon)
• 4. Tg. Thang Pil Mung BC.Sc (Hon)
• 5. Lia Man Kop Dim BC.Sc; B.A (Korea)
• 6. Tg. Thang Lem Kim B.Sc (Physics)

A tute

• 1. Lia Esther Hau Sum
• 2. Lia Rachael Siah Sum

1972 Kum pianthakna thu hanga EBC phutkhia dinga Pasian mizat hunbit sia sem 3: Rev Hau Lian Kham, CMBC Senior pastor Rev. Gin Khaw Thang Asst pastor, H.Gin En Cin ALO Cum Cope Memorial Press manager (TBA) le Pawlpi upa 14 te lakah a makai in pang hi. 1975 kumin Tedim ah EBC biakinn 56x30x15 lamna ah makaipi sem hi.

Biakinn lam nading vante inn ah pai-in a ngettawm uh hi a, a kipiate lakah a neih hoih pen a pia Khup Suan Mung (Leilum) hi, ci hi. Ni 42 sungin kikhop theih nadingin zo uh hi. Pasian panpihna hi ci-in ciamteh hi. Tua ban ah Tedim EBC zumpi zong singzat ding a haksa khempeuh a topsa ahi hi.

1983 kum EBC khawmpi Naminhan ah NIV letkhia a Ziv suahsak ding EBC in thukimpih a, a etpih Committee dingin Sia Tual Khan Pau, Sia Thang Khawm Pau, Sia Zam Lam Thang, Sia Gin Khen Mang seh sak uh hi. Sia Zam Lam Thang, Sia Thang Khawm Pau le Sia Gin Khen Mang te in amau manlahna hangin seppih man lo uh hi. Tua ciangin a etpih ding aman cial tawm hi.

• 1. Rev. Tual Khan Pau B.Th; B.D; M.Div
• 2. Rev. Dr. Neng Khan Thang B.Th;B.D; Th.M
• 3. Rev. Zam Khat Kham B.A.B.S; M.Div;Th.M; Ph.D(can)
• 4. Rev. Nang Za Thawn B.A.B.S; M.Div
• 5. Sia Hung Suan Kim B.Th;B.D; Th.M; Ph.D(can)
• 6. Mr. Thang Pil Mung BC.Sc (Hon)
• 7. H.Gin En Cin B.C.Min;

1996 kumin Tedim Roman Catholic-te Biakna labu (Catholic Hymnal) puahpih in la khempeuh rhymn thuahin Nov.1 1993 in zawhpih hi.

Catholic Hymnal Committee

• 1. Father Phillip En Mang
• 2. Father John Deng Cin Khup
• 3. Bro. Michael Suak Do Lian
• 4. Sia Micheal Pum Khan Thang
• 5. Sia Aloysius Thang Kap Pau
• 6. H.Gin En Cin D.D

1994 Falam Zatopi ah a innkuanpih tawh om a tua sungin Tedim RC te aa bangin Falam Catholic te Biakna Labu puahpihin late rhymn neisak in zawhpih hi. Tua kum mah in Falam Township bupa Lai Simbu dingin Falam Laica Sial Ca-uk ABC Chart, Tanlang pan Tannih bu dong bawlpih hi.

Committee:

• 1. Siapi Thang Vung
• 2. Sia Hre Dum
• 3. Sia Za Siam
• 4. Sia Len Tin Hre
• 5. U Cin Za Kam (A.TEO) le
• 6. H. Gin En Cin

Sia S.T Hau Go bawl X’ian Labu a pat tungin H. Gin En Cin in patpih a, dawng 235 ciang a zawh uh ciangin H.Gin En Cin kisam sa nawn lo uh hi. Ahi hangin phulum phul nading leikha pehlet dong a huh suak hi.

1983 kuma a pat ZIV pen saklam Zomite tawh kopin sem a, Thukhun Thak zopah napi 1994 kum ciangin kihawm khia zo pan hi. A bu gol 10,000 le ippuak bu 10,000 kibawl hi. A kihawm khiat ciangin kideih mahmah a tampi kikhawngpah hi. Lamka khua sat zawh laibu khot khata kikhawng a tampen hi, ci-in kiciamteh hi. Tedim kampaute aitang in Rev. Hau Suan in apna thu ngen hi. Zokam a Laisingtho ippuak a masa pen hi.

2000 kumin Thukhun Thak Phatna-late le Paunakte agol bu 3000 le ippuak bu 5000 hawmkhia keuleu hi. 2001 November 12-16 sung Dr. Hines tawh Tahan EFCB Hallpi ah Conference Fundamentalism thusinna nei uh hi. Falam, Hakha, Tedim mi thusin khempeuh Laisiangtho bu khattek pia hi. Bu 427 hi a, letsong piak khat a Laisiangtho kipia a tampen hi dingin kiciamteh hi.

1969 H. Gin En Cin a piangthak a kipan amau innkuan sungah a pa mah vei masa hi. Tuaban ah pawlpi khatpeuh sunga om nai lo lawkite ahi hi. A kituiphum zawh kum 50 a cin ni-in Lawkite laka Pasian nasep nading Tedim ah phuta a min “Harvest Camp-reaching the heathens” ci hi.

Mi tungah huhna a ngahna tawh kizui-in Lawki omna khuate a Camp bawl hi. A vekin Christian a suah nadingun zol hi. A kikhel uh ciangin amau utna pawlpi ciatah lutsak hi. Khua 7 ah lawki beina mualsuang phut khin zo hi. 1. Saipimual 2. Tuitawh 3. Sezang 4. Saizang 5. Tuipi 6. Phaiza 7. Tuimang ah mualsuang phutin “Topa Gualzota” ci-in gelh hi.

Lawki tamna Tuipi ah dawi bia a bei ciangin nuam mahmah a, mi tungah sum ngetsakin Ballei tui a cih uh plastie tuizawl in laksak hi. Laitui ah camp a bawl masakin lawki inn 8 ah song botin tonna siallu tampi haltum uh hi. Zogam Christian tun zawh sep khat a song kibot a tam pen hi dingin kiciamteh hi.

Khatvei laitui ah biakna dei loin Laitui EBC pawlpi tawh Camp bawl leuleu uh hi. Pasian Khasiangtho in ompih a mi tampi piangthak in 135 tui kiphum hi. Rev Gin Sian Thang phum hi-a Zogam ah phum khata tui kiphum a tampen hi dingin kiciamteh hi.

Topa in Zogam ah lawki bei nadingin amah a zat ding a ki-apna hi. A dam sungin lawki om sunte in Pasian bia leh Zomite in Pasian tung pan thupha a cingin ngah ding cih lamen hi. Harvest Camp huhna PPCC-te pan le midang tuamtuamte tung pana a ngah tawh a bawl ahi hi.

Makai Sinna ah Makaihna

TBA Christian khangno Makaih sinnate ah makai in kihel hi. 1.Leilum Leadership Traning Cum Work Camp,2. Khuasak 3. Thuklai 4. Tongzang 5. Gamlai 6. Suangdawh 7. Tedim khua te a Leadership Traning ah makai in kihel den hi.

Khangham laihilhna vaan-a a zinna khuate ah a theihhuai thute kanin mun thupite ah pai hi. Innbuk mual, Tongciin kawl, Vanzau, Phaiza, Khuakhung mualte ah kahin man zaih kawikawi hi.

Tu laitak a nasep

• 1. Laisiangtho Zokam International Version (ZIV) Hilhcianna let hi.
• 2. Founder & President Harvest Camp- Reaching the Heathens Ministry
• 3. Zolai sangte ah Zolai Simbu kisamsak lo-in sik bawl
• 4. Zomi Christian Alliance Coordinator

Mikang kam pan a lehkhiat Laibute

• 1. Christian Khualzinna (publish nai lo)
• 2. Jesu Tangthu
• 3. Comic bu 4
• 4. Numeinote le Pasalnote ading Nuntakna Thak
• 5. Adam pan Moses-Laisiangtho Sunga Mi Minthangte
• 6. NIV pan ZIV Laisiangtho

Tract te:

• 1. Kal Li Bek (Just Four Steps)
• 2. Tuiphum Upna le Thulet Bulpi (Baptist Doctrine and Distinctive)
• 3. Baihtak a Hotkhiatna Ngah nading Pasian Geelna (Gods Simple
  Plan of Salvation)

A zontawma a bawl Laibute

• 1. 2003 Zolai Endikte Khutlet
• 2. 1971 Kha mangthang zonna
• 3. Ni sagih lai
• 4. Dong Hu Labu
• 5. Zokam pan Zokam Tongdot (Dictionary)
• 6. Zolai Pupi

Endikpi (Editor) sepnate

• 1. Lungvakna
• 2. Thupha Puak
• 3. Tedim Sangpi Magazine (Chief editor)
• 4. Christian Kumza Tuitum Sovenir

Laibu Bawlna ah Kihelnate

• 1. 1977 a suak Holy Bible (RSV) Sia Kam Khaw Thang letkhiat pen
• Laisiangtho lui buppi ah 2nd Committee in kihel Committee-te:
• 2. 1974 kuma suak Tedim Labu
• 3. 1990 kuma suak RC Labu (Tedim)
• 4. 1994 kuma suak Falam RC Labu
• 5. 1995 kuma suak Falam Laica Sial Ca-uk
• 6. 1972 kumpan tuni dong Zolai Simbu puahna
• 7. 1999 kum pan ZCLS Labu puah
• 8. 1980 ZCLS Zonbeh (research) in kihel
• 9. Zolai sangte a ki zang Namkim Bu
• 10. Zolai simbu Tanlang saklam Zomite tawh zatkhawm Dr. Ngul Za Dal tawh bawlkhawm

No. 1. 1977 a suak Holy Bible (RSV) 2nd Committee

• 1. Rev. Mang Khaw Pau (Khuasak)
• 2. Rev. F Ngo Khaw Cin (Thuklai, TBA Secy)
• 3. Sianu Cing Khaw Vung (TBA Women Secy)
• 4. Rev Ngiak Za Dim (Thuklai)
• 5. Pi Thum Khan Khup (TBCEU Secy)
• 6. H. Gin En Cin (Press manager Cum ALO)

No.7 1999 ZCLS Labu puah Committee

• 1. Rev Paul Thuam Thang (Baptist)
• 2. Rev Nok Sian Pau (Baptist)
• 3. Rev Gho Khan Dal (Baptist)
• 4. Rev Twel Khan Nang (Baptist)
• 5. Rev Kam Khaw Thang (Baptist)
• 6. Pastor Lang Sawm Mang (SDA)
• 7. H.Gin En Cin (EBC)

Laibu bawlnate ah Pawlpi/mipi tawh pangkhawm loin amah le a innkuanpihte in Pasian muanna tawh sem uh hi.

A Gelhsa Article te

• 1. Khanglui mite kisak theihpih
• 2. Zogam a om singkungte min le na tuamtuamte min
• 3. Zomite Koilai Khul a Piang
• 4. Zomite Kidemna (Tonna)
• 5. A Pammaih Na Lukhu Nelkai
• 6. Gulhik Cilget
• 7. Ciil Tanglam Lo
• 8. Zolai
• 9. Ka Tonzang Sangkah Lai
• 10. Zomite Thucinte
• 11. Vaphual Thu
• 12. Tedim Zomite Zolai Pupi

A kihelna Seminar-te (Zolai)

• 1. 1985 kumin More ah Saklam Zomi PLS makaite tawh Zolai Seminor nei hi.
• 2. 1986 Apirl 8 in Tedim ah ZCLS maikaihna-in endikte tawh a masapen Zolai Seminor nei uh a thugenpi khatin pang hi. Ama gelh khiat Zolai gelhzia tungtawnin kikupna kinei hi.
• 3. 2000 May 4 in Presbyterian-te makaihna tawh Tedim ah Zolai Seminor kinei-in thu genpi-in pang.
• 4. 2002 in ZCLS makaihna tawh Leipi Tuiphum biakinn ah Zolai Seminor kinei a thugenpi-in pang.
• 5. 2003 Zangkong Zomi Momnote le Dr. Chin Khua Khai makaihna tawh Zolai Seminor kinei thugenpi in pang.
• 6. Zomus in 36 St a AZBC biakinn ah la tawh kisai a masapen Seminor nei-a H.Gin En Cin le U En Khang Nang thu genpi ahi hi.
• 7. EBC in Tedim EBC biakinn ah la tawh kisai Seminor nei-a T.S Khai le H.Gin En Cin thu genpi ahi hi.

Laigelhzia tawh kisai i nam pumpi a muhna

Laigelh zia tawh kisai i minam pumpi a pai nading mel thei loin gammang tawh kibang hi.

• 1. Pawlkhatte in a gelhzia ding teltektekta uh hi.
• 2. Pawlkhatte in a gelhzia ding thei lo ahilam telta uh hi.
• 3. Pawl khatte in thei a kisak hangin ama gelhzia kuamah in telpih lo.
• 4. Pawlkhatte in Zolai a maan pen a gelh theih nading zongsan hi.
• 5. Pawlkhatte in a gelhzia ding thei loin cimawh in dinkhawl.
• 6. Lai tampi gelh pawlkhatte mi tawh kikumkhawm a, laimal gawmzia kibat ding deih uh hi.
• 7. Pawlkhatte leuleu ama zongsatnasa khel nuam loin ama zatsa mah zang teitei hi.
• 8. Pawlkhatte in Zolai thei lo a, zat kul sa loin midang lai zatpih uh hi. Tuate a gammang taktak a’i ta ve!
• 9. Pawlkhatte in internet ah lai i kikhak theih ziauziau ciangin Zolai itin puah nuam sansan uh hi.
• 10. Pawlkhatte in a ut teng gawmin a ut teng halin gelh gawp ngi-ingei uh hi.

Lailam Dinmun Khantoh Nadingin

• 1. Laimal gawmzia a kibat nading mun khat pan uk leeng
• 2. Thu tangpek om loin kikum khawm liailiai leeng.
• 3. Laimal a aw suahin gelh loin a malgawmin bawl leeng.
• 4. Zolai tawh kituakte ah leitung buppi zat English mah bulphuh leeng.
• 5. Zomite i omna peuhpeuhah i Zolai in hong khihkhawm lam theitelin no aa, ko aa ci loin a kisapna mun ah zangtuah leeng.
• 6. Zokam veve no kam, ko kam ci loin kithupi ngaihsutsak ciat leeng.
• 7. Zomite zat kim pen Laisiangtho suanga laimal zatzia le kammal zatzia zuih sawm ciat leeng.
• 8. Laisiangtho sunga minte kam kiphen lo teng in a kibang zang khawm leeng.
• 9. I omna mun tekah Thuzakna lai a tam theithei hawmkhia-in laimal gelhzia kibangsak leeng.
• 10. Zomite lakah kampau telsut (Languistic) 4 bang 5 bang omin Zolai puah khawm leeng
• 11. I kipawlna (denomination) phualpi ciat pan kizomtuah dimdiam leeng.
• 12. Laibu bawl om ciangin kipahpihna (Royalty) pia leeng.
• 13. Fund tampi nei-in Zokam a kibawlsa Laibute hawm khiatsak zo leeng.
• 14. Mipi zat Laisiangthote Zolai le Mikang lai Diglot in nei zo leeng.
• 15. Zokam pau khempeuh in Labu kibang zangin tua tungtawnin i kampau gawmkhawm leeng.
• 16. Zolai sang bek hi lo Laisiangtho sangte ah Zolai Subject khatin Sinsak leeng.
• 17. Kam kiphen lo khempeuh in Zolai Simbu Tanlang pan a kibangin zangkhawm leeng.
• 18. Zolai Seminor nei khawm pahpah leeng.
• 19. Saklam Zomite in “ou” le “ch” tangin “o” le “c” zang leh.

Zola Ahikeh Lakam

Minam lianpi tampi in a neih loh Zomite i tungtuanna hih lakam ahi hi. Pasian in hong piak tuam Thupha hi-a limtaka kep ding hi. I tu i tate limtakin hilh a theihsak ding ahi hi. Tu-a i zatsa sangin a hoihzaw lakam mal kaikhawm a sin ding ahi hi. Phuahtawm theih om leh zong phuahbeh lai ding ahi hi. Tan 7 pan a tungsiah ah Zola subject khatin nei-a sin ding hoih hi. Zola kammal in Zomite minampi khatin hong ciamteh hi.

A gelhsa Laite pan a phawkthak

• 1. A maan lo zaw mipi zongsatsa khat amaan zaw a a laih ciangin mipi in khelhak sa hi.
• 2. A kizang mun lo upate kamzatte zat ciangin saklam Zomite aa, khanglam Zomite aa cih nei thei uh hi.
• 3. Minam dangte kammal i kawmte in Zomite khat le khat hong ki midang muhsak hi.
• 4. Zokam a om nai lo kammal i zatte panin dotna tampen hi.
• 5. Zatsa kammal pawlkhat gensiasia uh a a maanzaw ahih lam a theih uh ciangin lungdam uh hi.
• 6. Kampau zia-a lai i gelh ciangin miten telhak sa uh a, Laipau a a gelh ciangin mipi in telsiamzaw uh hi.
• 7. Lai thupite kampau banga gelh kilawm sa lo uh a, thu mawkmawkte laipau-a i gelh ciangin zong kilawm sa tuan lo uh hi.
• 8. Kihonate kampau in gelhin thupite laipau-in gelh a, la omnate lakamin i gelh ciangin mipite in hoihsa uh hi.

Maban ah sep a sawmte

• 1. ZIV Study Bible letding
• 2. Kam kiphen lo Zomite in Lai kibang neih ding
• 3. Zomi Christian Alliance sungah Zomi khempeuh pumkhat suahsak
  ding

Awards Angahte

• 1. 2005 Dcember 14 in Tedim Bethel Bible College in B.C.Min degree pia hi.
• 2. 2006 February 25 in International College of Bible Theology, Sikeston, USA in affiliation with Reaching the World Bible College in Yangon Emanual Baptist Church ah Doctor of Divinity (D.D) degree pia uh hi.
• 3. 2005 July 5, ni-in Bible International in basic translator training zawhna Certificate pia uh hi.

Hih lai sunga kigelh bangin Zomite kithukhatin Zolai gelhzia a kip nei a, Mikangte aa bangin Computer ah i gelh ciangin amaan lote a nuai asan-a hong git ciangin ka dam lai leh khukdinin Topa tung lungdam ka ko ding hi.

Ama kiangah ka ciah khit leh ka kham lukhu suahkhia in Ama mai-ah bia-in lungdam ka ko ding hi. Ka dam sunga Pasian hong matutsak khempeuh Ama minthanna le A gamzai nading hi ta hen ci-in Ama tungah ka ap hi. Amen.