Zolai – Nang Koi ah Pai Ding ~ Rev. Cin Do Piang

Zolai – Nang Koi ah Pai Ding ~ Rev. Cin Do Piang

Thu masa: Mihing khat pen mi ngeina cing ahih leh pau thei a, tua a kipau kammalte lai tawh kiciamteh hi. Pau le lai cih pen unau-pata khat hi a, kikhen thei lo hi. Tang din thei lo uh hi. Pau le lai pen mihing sangin naupang zaw napi, tuate gel a bei khak leh mihing/minam zong a bei mah tawh kibang hi. Tua ahih manin lai pen mihing adingin kitangsam mahmah khat ahihi. Pau nei napi, lai a omkeih leh zong tuantualna tualniamna hi a, mihing khat, minam khat adingin bucin lohna, langbaina ahihi. Tua ahih manin lai tawh kisai gen ding tampi om ding hi ta leh, tawm khat ensuk dih ni.

Lai i cih pen eimi sungsuak pau hi a, Mangkangte in Literature ci-in Latin kammal Literatura pan a laksawn uh a, a deihna/ khiatna pen lai gelh, khen, hual cih bang hihtuak hi. Lai cih kammal vai ah, Dr.Hatzaw in, Hindi pau zui-in Mizote’n lehkha ci uh a, Kawl pau zuiin sanggam Haka, Falam lamte’n ca,sa na ci uh hi ci-in genngei hi. Lai cih kammal bel koi pan hong piangkhia hiam cih thei kei hang. Lai cih pen a laidal hi loin thumal ahihi. Na khempeuh a mangmawh dingin ciamtehna ahi hi. Tua hangin mihingte kizopna, thu kizaksakna le siamna kihopsawnna om thei hi. Minam le pau a phungvuh a, akhuasuaksak ahi hi.

Lai pen Thu ciamtehna ahi hi:

Kampau thu le la, leitung vantung le a sunga om van-le-nate khempeuh lai tawh kiciamteh kei leh beimang lel hi. Mihing’ khuak pen hoih mahmah ta leh, za ah sawm giat pen mangngilh theihna dingin a kibawl hi, a kicih mah bangin khuak sangin lai tawh ciamteh lehang a kipzaw ahihi. Mipil khat in, a pilpen khuak sangin a gina lo ballpen khat tawh ciamtehna sawt kimangzaw hi, ci hi.

Biakna khempeuh lai tawh kinahvawh ciat hi. A diakdiakin christian tangthu enleng, lai omkei leh tu-pawlpi zong a piangthei lo ding ahihi. Tua thu hang mahin Pasian mahmah in Hebia mite teltheih dingin suang pek tungah thukham 10 gelh a, Moses na pia hi. Pasian mahmah in lai na gelh hi. Pai.30:8,32:16. Ahun hunin Pasian in thute lai ah a ciamteh dingin mi na sehtoto hi. Mang 1:19, Na muh thute laiah gelh in.Pasian in lai thupi sa mahmah hi.

Teci kippen hi: Thu khat pen kam tawh kigen ciangin a aw ging beikik pah hi. Tua kammal in lai ah akiciamteh kei leh a nung ah muhkik ding om nawn lo ahih manin, thutak bangin kisang ngamlo hi. Lai ah om leh kithupi san a, a awging lo hita leh, a thu gin ngaihzaw hi. Kawlte in, kammal za khat laimal khat, na ci uh a, kammal za khat ii gihna le laimal khat ii gihna kikim cihna hi ding hi. Bang hang hiam cih leh kammal pen kiphuaktawm thei a, kibehlap thei a, kidok khia thei kawikawi hi. Laimal pen zuau thei lo hi, a kinung behlap a, a kidawhkhiat leh zong kitheikik veve hi. Tua manin laimal pen teci kippen a suak hi. Lai tawh kiciamteh leh a thu kikhel nawnlo hi, ci-in Dan.6:8 gen hi. Kampau pen muhkik ding omthei lo ahih manin thu kip hi lo a, lai tawh a tonkhop ciang bekin thukip thu gina suak theipan hi.

Lum le tei ahi hi: Lum le tei cih pen khanglui kammal hi a, gal le sa i tuah ciangin kidalna, kidona galhiam ahi hi. Lai tawh thu kiciamteh ahih manin mangngilh theihna ding pan kidalna kikepna hihi. Pasian in kamsangte tungah a gen thute a hun huna zatkik theih lakkik theih ding, galvan khat a suak ding deihna tawh lai ah ciamteh in, na ci tangtang hi.Jer.36. Biakna nasepna gamkekna ah thugen sangin lai tawh nasepna in thu umlote lakah lawhcing zaw hi. Phun lo pau lo –athugen muiibun pen hi a, hun khat in mi khat tawh maitang kituahin thugen ahi hi. Lai ah kiciamteh kei leh Pasian kammal takpi kimu thei nawnlo, kigenkik thei nawn lo ding hi. Lai ah a om manin a hun zuiin kilakik thei a, Satan galdona ding galhiam, thuman langpangte do nading hiam khat bangin kizang theikik hi. Tua bek hi loin, lai nei kei lehang, i thu i late sawt loin bei ding a, tua tak ciangin i minam, mahmah zong dam damin hong bei ding ahi hi. Lai pen minam kipna ding le bitna dingin hong hu, lum le tei khat ahihi.

Lungsim gawmna ahi hi: Aw kaih a tuamtuam omta leh a kibang lai khat zattangna in lungsim le khuamuhna kinaisak a, gawm thei hi. Gtn. Kawllai pen i lai zattang ahih manin tua hangin Kawlpau le Kawl ngeina pahtakna, it theihna hong guan a, tua lai a zang mite’ lungsim hong gawmin hong thuzawh mahmah hi. Nungak le tangval in , solkha ah i maimit gel gawm mai ni ka sannem aw, a cih bangin Kawllai ah i lungsim kigawm thei hi. Tua hangin mun tuamtuam a om, gamgi tuamtuam in hong khen, awkaih tuamtuam a nei ei mite Zolai in hong gawm, hong phankhawm thei a, Tedim pau ah hong gawmbit lai ding hi. Literature is the highest policy na kici liang hi. Hampah hi hang. Zolai i neih manpha mahmah hi.

I Zolai e le!!

Lungdamna thu in a hinkhiat ahi hi:

Tua manin Pasian hong mop, thupha piak, tuiphih cih ding ahihi. Banghang hiam cih leh, lai tawh ciamteh ding a deih Pasian in ei mite zong lai neih ding hong deihsak ahih manin sangmang Cope topa zangin lai hong bawlsak hi. 1888-1902 kum sunga a kimu laimal 1050 apha,mangmu Pau Cin Hau’ lai le 1913 kuma Cope topa hong bawlsak Mang Tuallai kici i Zolai , hih nihte kalah ka phawk thu khat hong gen nuam ing. Pawlkhat in i lai taktak pen Pau Cin Hau’ lai, Laipian lai ci se tangtang uh hi. Khial lo hi.

Laipian lai a piang masa hi mah hi. Ahi zongin nauzaw innluah cih pen Pasian’ pat ahihi. Esau zong Jacob’ u hi napi, Pasian in gamhluah dingin a piang nunung, a nau Jacob sehin thupha pia mawk hi. Tua dan zui mahin a nauzaw Mang Tuallai in thupha ngahzaw hi ding hiven, tua hun lai mite in a uzaw Laipian lai sangin telbaih sa zaw, nuam na sa zaw uh hi. Kumpi in zong recognized a, mi tampi pilsuah khin hi. Leitung bup huamin Zomite mivom mikang lakah hong maingalsak Zolai ahihi. Ei kiangah Sukte beh le Luseite bangin nauzaw innluah ngeina tuni dong zang uh hi. Pasian’ zia mahmah bilbel hi. Sukte sung bangah nauzaw innluah panin uzaw innluah tawh a laihte bang daupai lo hi, ci-in ummawh uh hi.

Tua ahih manin Zolai pen neumuh ding, sila mite lai bangin muh ding hi lo hi. A hangin a pianna nu pen lungdamna thu hi a, a pa pen Pasian hi mawk ahih manin sathau nilhna ngah a, Pasian in panpih ngiat hi, ka cinuam hi. I kampau tungtawnin Cope topa’ khut tungpan Lai a nei ihi hi. Kamdang khatin gen leng, lai a nei nailo eimite in kampau i si a, Cope topa in a gelh si hi. Mihing khat hi leh thupha ngah Manglai min tapin Zolai naumin hong kiphuahsak sese zong a lamdang thupha khat ahihi. Pasian tungah lungdam ko ni.

Laimal zawl tawh kilam ahi hi.

Manglai bulphuh ahih mah bangin laimalpite(capital letters) ciangkang git ( /) vive tawh kilam a, laimal neute pen a zawlin tak lam ah awnin kisawikaih dimdiam hi. Tak lam ah a awn dimdiam huang umna gawl tawh kibang hi. I ngeina lamvui cianga, khuang tumpa makaihna zuiin lia le tangte vei le tak ah awn diamdiam lamtual kaih tawh kibangin, et lawm mahmah ka sa hi. Laimal zawl hiuheu se hi.

Tu hun ciangin zong leitung bup in a zawl hoih kisa mahmah hi. Korea le Holly wood film star te bang maibem om loin, maizawl vive hi uh a, hoih mahmahin hi dingdiang uh hi. A mu peuhmahte a lailung kuai dikdek hi. Kawllai ahihleh Beem O vive tawh kilam hi a, O yero hoih takin gelh thei lehang khutlam a hoih hi pah hi. Tua lungsim mah hi lo dia, Kawlte’ mi hoihsak i cihte maibem kiukeu peuh na hi hi. Gtn. HTet HTet Moe Oo bang maibem hi. Kawlte’n numei hoih a sak, limci a sakte uh pen tawzawl ziuhzeuh hi loin tawbem neinai, taw bil neinai peuh na hi hi. A numeite un zong nuamna hehna ah taw bempi uh pei pualpual nuam se uh hi. Ahih hangin ei mite bel i laimal zawl zui in maizawl hoih a sate hi hang.

Tu’n i Zolai e leh koi lam manawh..

I Zolai pen amahmah kipuah tawm thei lo a, eite puah ciang bekin a etlawm, a nungta ahi hi. Pasian thupha piak hi a, Jacob bangin galnei tawntung hi. A khangthu tawm ensuk ni.

1. 1913 kum piang hi.1925-1994 kikal kum 69 bang ama khom takin cidamin thahat lel hi. Hih hun sungin kumpi sang laisim bu ah mun ngah ahih manin nungta in cidam gawp hi. Mihing hileh a hat lai ni,a pallai ni cih ding ahi hi. I gam ah maingal mawh lo hi.

2. 1994 kum khit a kipan tu dong si lah nungta bangin om a, tapidaw pawlpite’n cina kep bangin kemin, biakinn sungah kikhoikhoi hi. Banghang hiam cih leh,

(1) I gam ah piang napi, inntek mun ngahlo, kipia lo a, lengla bangin nungta hi. Pitek lungzuang a monu’n a hepkhiat bangin inn sungah, i gamah mun ngah zolo hi. A pau nangawn ciangin pitek mihai pau bangin kineumuh lel hi. Mihing bang hileh khitui tawh a nite a zang toto ahi hi. A nulsak ding eite hi hang. A hangin, ei mite’n laidal tung ah a thu-in gam i nei a, leitang tungah gam taktak i nei zonai kei hi.

Laimal bem in laimal zawl Zolai numei hing suan bangin suankhia hi. Inntek nu pen lengla le sila suak ta ahih manin hong nua-kik a, a pianna tapidaw pawlpite in an vakin, i zun niloh hi. A sih ding lau ahih manin pawlpi sungah galtai-in (refugee) hong kibu hi. Sang khak sungin pawlpite hanciamna ciat tawh Zolai i sin a, i nungtasak toto hi. A dinmun gen pak leng, laimal zawl le laimai bem mun khat a om khop ciangin zong inntek laimal zawl in mai gual ngah loin, lengla laimal bem O maigual ah kitusak se hi ve aw, na lawmlawm hi. Na lungngai ngei hiam?

2) Koi lam h pai ding. 1994 kum ciangciang kumpi sungah a tualtel mahmah i Zolai tuin biakinn sung bek ah kikoih ta hi. Tua ahi manin tuin koi lai ah om a, koilam manawh in pai sawm hi ding hiam., Khangthak miten lungngaih taak mahmah kasa hi. Zolai zuun ni i cih taktak leh, laibu tampi bawl ding maw, laimal gelh zia kituhtuhin hun bei ding maw, tuate hi masa lo hi. Zolai in kumpi sungah panmun hong ngah photphot nadingin biakinn sung pan kumpi sungah i thun zawhna dingin hanciam ding ahihi. Tua bang a pian theih nadingin ei-le-ei ki-uk theihna gam taktak i neih ding thu kisam masapen ahihi. Zogam in eima aituam gam, thuneihna tawh a kithuah gam ahih ding kisampen hi.

I lai in Zogam kumpi inn sung pan hong kipatphat kei leh, a cingtaak zuun le puahna omthei lo ding hi. Lai pen biakna in keem loin kumpi in hong kepsak hun ciangin khuasuak bek ding hi. Aituam vaihawm theihna pupa gam taktak i neih ciangin i lai in mun citeng, zumkong mangkong teng ah inntek mun ngah ding hi. Maingal takin thu hong hopih thei bek ding hi. Tua ni ciangin tapidaw pawlpi kipawlna ahi, ZCLS,ZACC,CCLS cihte hong kisam lua nawn lo ding a, kumpi maban hong ta ding hi.

A kikhumcipna biakinn pan pusuahin i gam kumpi tokhom dongah tusak dingin Zo taten maban sahpi i nei hi. Tua dingin thaman piakkul ding hi. I lai a thahat keileh i pau zong guallel den ding a, damdamin bei tawh hong kizom ding hi. Beem O pau le lai in hong buluah lua ta ahih manin, i lai i pau i minam nadong guallel sal suak khin hi hang. Tua ahih manin tuin mi khempeuh in i hih theih tawp suahin thasan khia ni. I Zolai in gamsung manawh loin kumpi huang sung a manawh theih teitei nadingin nasem taktak ni, Vai kaita hi. Tu laitak hunhoih ahih manin khahsuah kei ni. Zolai, koi lampai ding na hia? Rev. Cin Do Piang