Zolai na gelhciang ~ Rev. Khup Za Go

Zolai na gelhciang ~ Rev. Khup Za Go

Reverend, Doctor, Mister, Tang cihte pen a tom a, a kigelh ciangin Rev. Thang Gin, Dr. Piangpu, Mr. Khupta, Tg. Thangpu kici fullstop tawh a kiciamteh hi a, a hi ding mah hi.

Ahih hangin Pi, Pu, Nu, Pa, Lia, Sia, Upa cihte a tomlak cih om tuanlo ahihmahbangin Pi Khup Cing, Pu Khai Mung, Nu Luan Dim, Pa Mang Khai, Lia Cingno, Sia Lian Kham cihding hi a, full stop hiam, comma hiam koih kul lo hi.

Upa, Lian Thang, Nu, Cing Dim, Pu, Khai Thang cihbanga thukizakna leh laibu khat peuhpeuhah hong kigelh lianluan ciangin muh thadahhauai lua hi.

Kualhna (bracket) zong a zangkhial pawl om den lai hang a, dahhuai hi. Nambat peuhpeuh um pahpah pawl om hi hang. TTBA Kum (18) Cinna, Pastor khat in mi nih letthatin kha (3) zawh ciangin nau nei hi cih peuh omthei hi. Hihte pen kualhna zat nading om lo hi.

Dr. Pau Za Nang (MBBS), Rev. P. Thuam Thang, B.Th., Rev. S. Pau Khan En, B.Th., B.R.E., B.D., S.T.M., cih ding hi zaw hi. Tua ciangin B.A., M.B.B.S., B.R.E. cih bangte ah full stop (.) pen koih tektek ding hiam, koih se kul lo hiam cih tawh kisai pen a ngeina in koih ding hi.

Ahizongin tuhun ciangin mi pawlkhat, a diakdiakin USA lamte in full stop tat selo in hongzang uh a, tuazong kizui thei a hih manin MBBS, STM, MA, LLB cih bangin i gelh hangin a sia luain kituat tuanlo hi. Tua banga i gelh hangin BCom, BSc, MDiv cih ding hi a, BCOM, BSC, MDIV cih bangin kigelh ngei lo zel hi. Na zat khialh ding kidawm in.

Tu hunin min leh beh min a gelh khawm pawl ki-om hi. Khampu Hatzaw, Tualchin Neihsial, Vum Lian Pau Shoute cihbang i gelh ciangin Khampu, Hatzaw, Tualchin, Neihsial, Vum Lian Pau, Shoute ci-a a gelh pawl om thei hi. Tua pen man lo lua a hih ciangin min leh beh min kilakah comma om lo ding hi.

Nipikal min leh kha min peuhpeuh a patna laimal gol tawh gelh ding hi. Nipi, Nilai, Nino, Phalkha, Dopi, Dota, Khuado kha cih ding hi.

Mikang laiah A.D. pen a kum nambat maiah kikoih a, B.C. pen a kum nambat nungah kikoih hamtang hi. Tua bangin Zolaiah zong zang lehang a kicianzaw tam ci ing. 1500 A.D. ci loin A.D. 1500, B.C. 325 ci loin 325 B.C. cih ding hi.

Welcome cih na gelh ciangin wel come ci loin wel-come zong ci tuan seloin welcome ci-in gelh lel lecin a kicingkhin hi a, zep tuan kul lo hi. Rev. Khup Za Go