Zolai ah Hyphen (-) zatzia kuppihna

Zolai ah Hyphen (-) zatzia kuppihna

Nunglam in Zolai ah Double Vowel zatzia them ikikum khin hi. Tuakhit ciang, kepcing huai kammalciik pawlkhat thu zong genkhin hihang. Lakam, paunak zong tampi inei hi. Atom in genleng, Zolai vai-ah thangah huai semsem cih kitel hi.

Tutungin Zolai ah Hyphen (-) zatzia them kikum nuam hang. Amasa-in na khatpeuh isin ciangin abulpan mah a kan/sin masak hoih hi. Abul abal itheih khitteh puahphatna behlapna pen kikhial lozaw hamtang hi. Bultak thuktak a kantel masa lopi leh ei kivakna lopi khat vaki tulmawh luatna pen ‘innteek te’ mit heek theilo a, anbel buluh pualpual leenglahai tawh kibang hi.’ Mikangte’ paunak ah, “Half knowledge is dangerous,” cimiau uh hi.

Vanglak, laklawh bektak ciang theihna pen lauhuai hi. Itheih leh theitel vet, itheih keileh theilo vetleng vaisiang zawsop hi. Theitel mialmual lopi a kitheih sakna pen buaihuai zawkan lai hi. Thei napi atheih bangin azang nuamlo teitei te lah ‘leengpei kisong sowlawi’ tawh kibang hi. Heihei taleng lampi tungtawn theilo in lamnawl tengah sawitai vaivai veve hi. Tuate pen athei te’n hilh khamah leh zong maizum zahla taleh zuihsawm tuanlo in tangkai veuvau lel thei uh hi.

Zolai ah Hyphen zatzia pen Manglai tawh zatdan kibang phalo hi. Atamzaw in Vowel tawh atawp laimal khat leh Vowel tawh akipan laimal khat gawmtuah in malkhat isuahnop ciang kizang hi. Isim ciangin aw (2) kisuah hi. Gentehna in:

Ci-in/Ciin
Jesuh in anung zuite kiangah, “Kei kahong paikik baih tading hi,” ci-in (ciin hilo) agen hi.
(Hih munah Hyphen zang keileng ciin @ guahciin, ciin-le-tuai, Ciin Lun, etc., cihbangte tawh awsuah kibang laizang ahih manin, tuate tawh khentel theih nading a kizang hituak hi.)

Ki-at/Kiat
“Khaipu gilpi damlo ahih manin Zatopi ah ki-at (kiat hilo) ding ci hi.”

(Hihpen Sia Khoi Lam inzong nagen ngei hi. Hyphen omkei leh kiat = kuigawp/kiatgawp, kiasuk, cihbangin akhiatna tuampi suak thei laizang hi.)

Ki-it/Kiit
“Cing Khup leh Ngam Bawm ki-it (kiit hilo) mahmah uh hi.”
“Note na ki-it un.”
(Ki-it ah Hyphen tawh kigelh zaw hi.)

Ni-in/Niin
“Zan ni-in (niin hilo) guah ciin hi.”
(Hih munah niin @ niinthem, niinbung, etc., agen hilo ihih manin Hyphen kizang hi.)

Ci-a/Cia
“Hongciah baih in ci-a (cia hilo), hongciah hak veve.”
(Hih munah zong cia @ tuacia, hicia, etc., cihbangin agolna, aneuna agen hilo ihih manin Hyphen kizang hi.)

Ataangpi in hih atung a dante ah Hyphen kilim zat pen hi. Tualo azatna dangkhat leuleu pen laimal nih leh thum val aphate malkhat isuahnop ciang leh Noun in izatnop ciang kizang hi. Gentehna in; ‘Pheituam-sungteen’ ‘Nu-le-pa,’‘ciin-le-tuai,’ ‘tu-le-ta,’ etc. Ahi zongin hidan pen kitamzat nailo hi. Zatnop leh zattheih, zang takei leng poiluatna omtuan lo hi. Kikup tohtoh theih hi.

Akizang ngei khollo leh azathuai khollo Hyphen zatna pawlkhat ensuk leuleu ni. Mitawmcik khatin Zolai ah atam genna ahi Plural ‘te,’ Affixes ahi ‘in, te, a,’ leh Prepositions ahi ‘ah’ cihkhawngah phengzat gawp uh hi. Zatngeina ah Consonant tawh atawp laimal khat leh Consonant tawh akipan laimalte (Or) Vowel tawh atawp laimal leh Consonant tawh akipan laimalte (Or) Consonant tawh atawp laimal leh Vowel tawh akipan laimalte malkhat isuah ciangin Hyphen koih kullo hi. Tuapen tudong hoihpen lai hi. Telkhialh nading omtuan samlo hi. Akitel dingin anuai ah Hyphen zatkul khollo munte Hyphen zatna pawlkhat enleng:

“Nuungkum lam-in guahtui tawm-a, Zomi-te luungkham-in lam-et beei mahmah uhhi. Luungkham man-in huhna ngen-in, namdang-te huhding lam-en uh hi. Tukum-a kipan-in hahkat-in, a-kisap na mun-ah leihoihza-te buah sawm-ta uhhi. Gamdang-om Zomi-te in-zong a-hi thei bangmah-in panpih-a, inn-ngak-te in-zong a-hi thei bang-in na-na hanciam ding-uhhi.”

Hih atung a gentehna sungah Hyphen tuizat bang a kizang hi-in, ahoih ding abat hangin simhak zaw, telhak zaw lehbung hi. Tua hi-a, paizia Norm om meello a Hyphen thaangzat gawppen Zolai Standard sangsak tuanlo banah siasak behlap hi. Tua ahih manin Zolai gelh ciangin Hyphen nangawn zatdan/zatzia akilawm akituak theih huai, kanhuai mahmah a, itheihcian meel keileh zong tamzat keileng khialhna tawmzaw lai hi. Zam Sian Sum