Zolabupi Degree le Chin min ~ Khat Thang

Zolabupi Degree le Chin min ~ Khat Thang

Lengtong Kamkhen in, lengtong Pauno pen pahtawina min khat pia a tua pen “Zolabupi” cih ahi hi. Lengtong Kamkhen genna ah lengtong Pauno pen Tedim naipitau nuai ah zukham in khuaphawk lo in a lup laitak, Tedim khangnote in mu uh aa, “eih hiah Zolabupi khat kipaii hi lo maw” ci-uh hi ci. Tua a kipanin lengtong Pauno in “Zolabupi Buaih” a ngah hi. Hi Zolabupi buaih pen lengtong Pauno in zukham-a a ihmut kal a kipia buaih min ahi hi, ci in gen hi.

Chin pen zong lengtong Pauno zukham a ihmut kal a ki-pia min mah bangin, Zomite i ihmut hun lai ahi, lai i theih ma, mi namdangte tawh kizopna hoih i neih ma hun khat lai, i thu theih loh kal a hong kivawh sim na hi gige hi. Chin cih min pen a khiatna ahoih a hi a, a sia ahi zongin, Zomite kammal hi lo hi. Ka Nu in kawllai sin ngei lo ahih manin, Chin hoih takin lo thei lo hi.

Ka Pa in Chin ci-in, Kawlte kiangah kigen leh a aw-suah maan lo ci-in Kawlte in “Chian hi kei uh teh Chin hi zaw uh teh” ci-in ei-minam min ding ei mah hong leh hilh tazen uh hi. Ih minam min pen ei-le-ei’ kilawh bang a nam dangte in hong zuih dinguh hizaw hi. En namdangten i ihmut hun lai a hong vawh uh i zuih ding hi lo hi. I minam mni pen thangtawng i theih ban zawh nawn loh hun pek a ei-le-ei i kilawhna Zomi hi aa, khangham I nu le Pa, Pi le Pu ciang va hopih leng kua mah in i minam min Chin hi hong ci lo ding uh hi.

Ei-le-ei kilawhna minampi khat ih hihna min maan ZOMI pen khangthakte in namdangte tungah pulaak ngam ding, kumpi thuneite tungah kipsakna i ngah theih nading i omomna gamte hanciam tek ding kisam hi.

Zomi min pua kipawlna tuamtuamte in zong kipeng sak hetlo a, kei nasep na, ko kipawlna, ko maban hong ngawngkai sak lo ding hi, cih san het lo a, koikoi ah Zomi min i dinpih ngam ding thupi kasa hi. Kawlte, Vaite, Sente, Mikang/ mivomte kiangah zong Zomi i hihna a daipih ngam, akisaktheihpih ngam ding in i kihanthawn hi. Tua hipeuh leh hun khat teh Chin kici khempeuh Zomi hong ut ni hong tung lel ding hi. Tua pen Zomi kici ei-te ii maban a hi hi.

P.S. Lengtong Pauno le Lengtong Kam Khen te ciamnuih kawm in genteh ka hih manin hong telsiam dinguh zong ka ngen khawm hi. Lungdam. Khat Thang