Zogam sungah Zomi te Khantoh nading ~ Salai Issac Khen

Zogam sungah Zomi te Khantoh nading (Hihlai simlo in paisan kei in)

1. Zogam sungah a teng Zomi te i khantoh nadingin Kumpi Budget tawh vai kihawmzo lo hi. Mikhat in i khantoh nading sum 100 a kisam i hihleh Kumpi Budget in 40 bek hong pia zo hi. Tua nangawn zong a 40 bup in ih gamsung leh i minam sungah kizangtaktak lo hi. Tua ahihmanin Zogam khantoh nadingin mimal in i hanciam ding kisam hi. A beisa kumte ah Zogam sungah gamdang investment 0% a hihi.

2. Zogam sungpan a piang gamdangdong ah a kizuakthei pawlkhat om hi. Tuate pen 1. Coffee, 2. Thawhbat leh 3. Zopuan (siamngat puan) hi 3 teng a hihi. Gamdang leidangah tampi kideih a hihmanin Zogam sungah Zomi te in hih nasepte hahkat sep mahmah ding hihang.

Mailam ah gam hong hoihleh hih nate a neite ki hau masa pen ding hi. Sum i neihleh hih nasepte sep nadingin invest ding hihang.

3. Zogam sungah Zomite i khantoh nadingin Sumleitawi nasep tawh kisai i ki sam mahmah lai hi. Sum haute in a hizong, kipawlna tuamtuam te in a hizongin sumleitawi piakzawh ding hanciam lai ding hi hang.

Zogam a khantoh nadingin mimal khantohna kisam hi i cihmah bangin Mimal khantoh nadingin Sumleitawi tawh kisai, kiciantak, suakta tak leh thuman tak in asem Mihau te leh Kipawlna i nak kisap mahmah lai hi.

Tu hunpen mite zong kithuman, nasep kihanciam nuamtek ta lel a hihmanin i khantoh baih penpen theih nading hih Sumleitawi nasep kipan ding hanciam sawm tek ding hihang.

4. Mimal leh innkim in nasep i neih ding kisam hi. Mun dang leidangah nasepna in donghu hiaa hoih mah hi. Ahizongin mikim in ei ma innsung, ei ma lo sung ah nasep nei ding hihang. Ei ma sumlut ding bawl thei ding hihang.

Cihnopna ah mikiangah ‘khasum sangin nasepna’ lo zaw ding hihang. Tua pen khantohna kipatna hiaa kumsawt hong lenkip hi. Inn sung nasep dingpen gentehna: Siamngatna, Singno ciinna cihte pawl hahkat sep mahmah ding hihang.

5. Zomi te i khantoh theihna dingin tan 10 ong tampipi kumsim i om ding kisam hi. Tampi om cihciang percent tampi i ong ding kisam hi. Hihpen Zogam sungaa Zomi te i khantoh nadingin paisan theihloh hanciam ding khat a hihi.

Tan 10 ong keileng kumpi sung, company sung leh nasepna khat peuhpeuh ah kita zo nawnlo pah hi. Tua a hihman lai hilh sia/ma te, inn pan nu leh pa te, u leh nau te, pawlpi pan sia te a kipan mikhempeuh in lai ong nading hanciam pih ding hihang. A sangkah te mahmah in zong neihna taktak mahtawh lai sin in, thei in, ong sawm ding hi hang.

Tua hileh Zogam sungah Zomi te nuntakna i tawisang zo pan ding hi. Salai Issac Khen’ gelh Zomi te Khantohna ding tawhkisai Laibu no pan. Na share sawn in maw. Siamsin Library