Zogam Vilna, Zogam Gal-etna, Zogam Khangno Khawmpite ~ GS Khup

Zogam Vilna, Zogam Gal-etna, Zogam Khangno Khawmpite ~ GS Khup

Zogam ah Khangno Khawmpi tuamtuam kibawl ding cih thuhoih pawl khat za leuleu hang ei.. Khangno Khawmpi ka cihteh Party Youth Conference/Forum dan hizaw ei..

Tu kha sungin Zogam Tedim khuapi ah NLD Khangno Khawmpi kibawl ding ci, mai kum February kha ciang Tedim khuapi mah ah ZCD Khangno Khawmpi kibawl ding ci..

Zogam ka vilnop manmah in hih Khawmpi avaihawm Makaite khat leh nih tung ah thu ka dotna tung pan, ka deihsakna pawl khat hong om ahih manin.. hih Zogam Vilna hong gelhzel ing..

Khangno Khawmpi vive ahih manin, mailam a Zogam Makai ding Zomi Khangno vive a kikaikhawm dingin ngaihsun ing.. thupi himhim cih ding hi..

Party Khangno Khawmpi ahihteh, Party Policy thu kihilhcianna, thusinna bel omngel ding hi cih theihsa ban-ah, Khangnote tung ah 2020 Gambup Kiteelpi ading Party Campaign/Zolna zong kihel hamtang ding cih theihsa cini.. ahi dingmah hi..

Hizo hi lehbel, Khangno ih cih himhim, Political Party Policy khatpeuh, Political Ideology khatpeuh ih kihilh, ih kithun, ih kisinsak ma in, Zogam Makai picing asuak ding, Gam leh Minam a itngiat ding, lungsim sianthona leh diktat thumanna anei ding Khangno Khawmpi, Kipattahna, Thusinna om masa hileh, tua khitciang, Khangnote in amau thutheihna leh sandan zui in Political Party khatpeuh ah ma hong pangle uh Zogam Makai picing hong suak ding uhhi cih kei sandan hi..

Tua bang a, suakta takin Khangno Khawmpi a bawl thei ding dinmun om nailo ahihlah Party Khangno Khawmpi a kibawlzong apha hi ci ing..

A thupi ah, Khangno Khawmpi ahihteh, tu laitak leh tu khanghun a, Kawl Gam ah a kisam leh a kisin, a kinungzuih mahmah ahi, anuai a Thulu tengbel kihilh, kisin, kikum, kipantahciat ding kisam sapen ing, tua khitciang, Party Policy leh Party Campaign hi zawleh aci nuam hi ing..

Tua ahihteh, thupi leh kisam kasak Thulute hong kum dihning ei..

1. Democracy:

Democracy thubulpi kihilh bek hilo in Zogam leh Zomi-te Kivaipuakzia sung ah Democracy zia leh tong a kizui hiam sittel huai, a kizuihna ding bangci bangin kipantah ding ihhi hiam cihte kikup huai sa ing.. Gam, Kipawlna, Party, Kumpi Ki-ukna, Kumpi Zum, Khua leh Tui sung ah Democracy zia leh tong bangci bangin zui ding cih, a bulpi pan kisin kul mahmah ding hi..

Hih Thulu tawh kisai thusung dingbel Political Science lam ah Pilna Siamna asang simsim aneite cial huai sa ing.. Kidop huai kasak khatin, Gam sungzong cikei ni, Kumpi zum sung, Party sung ciang ah Democracy dan azui theinailo, Dictatorship zia leh tongmah nuam asalai khatpeuh, hih Thulu tawh thusung ding in ih cialkhakloh ding kisam in um ing..

2. Human Rights, the Rights of Indigenous Peoples:

Human Rights kammal mahmah taangpi kamdawn ah kigenngam, kitheihbawl napi in, Human Rights thusimna, zahtakna tung ah a kinga Zomi leh Zogam a kilam zawhna ding kikupna kisamlai in ka um hi. Tuaban ah, Tualsuak Mite Thuneihna himhim Kawl Gam ah limtak a kihilhcianna, thusinna omnailo ahihteh, tutung Khangno Khawmpite sung ah a thu kipan himhimleh lunggulh huai sa ing.. The Rights of Indigenous Peoples a theilo khatbel hih Thulu tawh thusung in cial huailo dingzong phawk huai ding hi..

3. Self Determination:

Self Determination thu taktak pen Kawl Gam in bangciang in ciangtan hiam cih dinmun tung ah kinga ahihteh, aniam pen pan asang pen dinmun ciang, kihilhciankholh ding kisam sa ing. District dinmun, Self/Special Administered Area dinmun, Federated State dinmun cihbang a dinmun tuamtuam khitciang, asuakta Gam dinmun ciangdong sinkholh ding kisamta hi.. Zogam suahtakna ding thu gen ding ahih pahloh hangin, tua ciang dinmun zong Determination sangpen a hihna a hilhcian ngam, thu asung ngam Makaite thusung ding cial huai hi. Zomi-te State khat in ading thei ding a hihna thu agenkhia ngamlo khatpeuh hih Thulu a gen ding in kicialloh ding kilawm hi..

4. Federal System:

Kawl Gam ahong kihon zawkdeuh a kipan, Federal kammal pen taangpi kamdawn ah kigenngamta ahih manin, mipil misiam a kinei Makai tampi in Federal nam tampi om hi ci in, thu asincil mipi hong amsaksan ka sa hi. Kawl Gam ah akisam Federal System pen India, US cihte bankawk akul hipeuhmahlo a, Minam a siksan, Minamte in Gamgi kician anei ahih na a kipsak Federal System akilam dingbek kihanthawn in, Khangnote in tua thu hong kipsak hile uh lunggulh huai sa ing..

Hih Thulu a hilh ding, thusung dingbel Gam thu atel mahmah, Mipil Misiam bek hilo, Kawl Gam kilamcil a kipan Gam Kivaipuakzia akikhel zia a tel mahmahte cial huai sa ing. Abeisa kum (3) val, ahihkei leh abeisa Term (2) bang, Kawl Gam ah Democracy Kumpi a kiteel dan in kiciamteh a, tua hun sung a Kumpi Thunei, Gam Makaite sung pan Federal Kammal khatzong a lokhia ngamlo, thusung thei hi napi a sunglo Makai khatpeuh in hih Thulu ahong sunloh ding theih huaipah ding hi..

5. Rule of Law:

Kalw Gam sung a Thusinna, Seminar, Workshop tuamtuam ah hih Thulu pen Popular Topic khat cileng kikhiallo ding hi. Zogam ading inzong hih Thulu pen Gambup huam genloh, Party sung ciang nangawn ah a kihilh huai, a kisin huai thu khat hita hi. Rule of Law kician takin a kizuihna dingin Law/Thukhun kician a om masak dingbel kitheita in ka um hi. Thu khatpeuh zui a thu leh la vaihawmna bel Zogam ading kua Party, kua Party, kisin mahmah kul in um ing. A Thukhun/Law genloh, Meeting Resolutions khatpeuh, Khawmpi Thukhensatna khatpeuh zuih ding, tua zui a sep ding cihpen, Khangnote genloh, tu laitak a Gam Makai tampite in phawkkha lomawk uhhi.

Tua ahihteh, Meeting Resolutions khat zuih ding lam aphawklo, Khawmpi Thukimna khat bang a kalsuan ding a utlo, Party Thukhun zui a vai hawm ding a utlo, Party tawh kisai thu leh la khatpeuh Thukhun zui a kalsuan ding sangin mimal deihna bangin vaihawm ding a masak zaw Makai khatpeuh hih Thulu tawh thusung dingin kicialkhakloh ding kisam in um ing.. Zogam ah tuabang Makai bel om nawnsamlo ding hi cih um ing..

6. Capacity Building:

Capacity Building kammal zong Kawl Gam sung a Politics sinna Seminar khempeuh ah a kiza tawntung Thulupi khatmah hi ei. Khangno Khawmpi sungbek ah hih Thulu sin ding hikei in, tu laitak mahmah a, Gam Makaite, Party Makaite inzong Capacity Building ahong lunglut ding uh kisam peuhmah in mu ing. A pilsa, a siamsa a suak omlo ahih hangin, tu laitak in a liangko tung ah a kisuan Gam Makai hihna, Party Makai hihna hangin kisinphat kul, sinsin kul cih sansiam huai sa ing.

Makai khat hih theihna ding in a kisam Mimal picinna ban ah, Pilna Siamna, Nasep Siamna, Thu leh La khinkhai theihna, madawk in ma pan theihna, akhangto Gamte ah a kizang ahoih Kimakaihna zia leh tong hoihte kisinna cihbang Capacity tuamtuam akhang aham kipattah huai mahmah hi. Zomi sung ah hih Thulu tawh thusung ding a omkei aleh namdang khatpeuh zong cialliang in thu sunsak huai sa ing.

Tu laitak a ih Makaite sung pan ama panmun tawh kizui in Capacity anei hetlo khatpeuh hih Thulu tawh kisai thusung dingin ih cialkhak leh khantohna lamsang in kiamsukna lam kimanawh ding a, Gam khantohna dingin Gu akhah Khawmpi kisuak zawmai ding hi.. kidop huai mahmah kasakna thu hi ei.. Capacity Building thusung dingin Capacity anei khat hileh cihna hizaw.. tu laitak a Zogam Makaite in amau munsan panin Capacity aneikim dingin deihkaih ing..

7. Policy Development:

Zomi sung a Gamvai asin khangthak Makai khat leh nih tawh ka kihongeina khat ah, Zomi sung ah Kipawlna, Party tuamtuam om napi in, Policy Development lamsang kithanem mahmah hong ci uh a, ka khinkhaikhak uhleh, Policy Development ciang a gending zong hikei in, Meeting Agenda Development nangawn a kisiam nailo in ka mu uhhi. Kipawlna khat, Party khatin, Meeting maw, Khawmpi ah maw, bang kikum a, bang thu kisung ding, bang Agenda kikhung cih limtak in ageelkhol zo kitawm mahmah hi cih ih mu hi.

Meeting tampi kibawl, Khawmpi tampi kibawl hi mahleh, Policy khatpeuh khun ding (Develop) genloh, tua Meeting ading, Khawmpi ading Agenda kician kigeelkhol zolo ahih manin, Meeting aman ciang, Khawmpi aman ciang vai teng aveng hi theizel hi. Zogam leh Zomi ading Policy tuamtuam, Khantohna ding Planning tuamtuam gelkhol dan tawh kisai Khangnote ban ah tu lautak a Gam Makaite inzong ih kisin sawm hamtang ding lunggulh huai mahmah sa ing.

Khangno Khawmpi sung ah hihbang Thulute asung ding, a hilh dingbel Mipil Misiamte mah cialloh aphamawh in ngaihsun ing. Agenda neilo Kipawlna, Party khat sung pan Makai khatpeuh in Policy Development Thulu tawh thu hong sung ding hileh bang hong sungtam cih aciammuih huai thu khat himai inteh..

8. Good Governance:

UN Khawmpi tuamtua ka kahna sung ah tu laitak a Leitungbup Ngimna ahi Sustainable Development Goal a tangtunna dingin Good Governance pen gam-uk Kumpi sungbek hikei in, Political Party leh CSO Kipawlnate sung ahzong nakpi takin kisam hi cici uhhi. Hih Thulu pen leitungbup ahzong a kisinsan, a kipantahsan thulupi ahihteh, Mipil Misiamte mahin kihilhsak dihni. Khangnote genloh keibang a khanghamte inzong sinsin laileng ahoih mahmah ding ahi hi.

Governance sung a dinmun khat ahi Kivaipuakzia tawh kisai, Party hi taleh, Kipawlna hi taleh, Zomi sung ah kician takin kikhunglo, kilamlo ahih manin, tuni ciangdong kikhangto theilo, kilamto zolo, ki-ukcip in mite nuai ah ih tai hi. Gambup cikei ni, tu laitak a ih hamphatna panin ih Party ciat sung ah Good Governance ih kisin, ih kipattah theih aleh, tua tungtawn a picinna siksan in 2020 Kiteelpi ah agah kimu in ka um hi..

9. Patriotism, Nationalist/ Zomi Movement:

Zandiak a kibawl Party Khawmpi khat tungtawn in enleng, Zomi-te sung ah Minam Itna lian mahmah, sang mahmah hi cih kimu thei hi. Zogam khantohna ding kilunggulh mahmah hi cih kilang hi. A thupi ah, Minam Itna siksan in Political Party in bangci kalsuan ding cih thu kician takin kihilhcian huai in um ing. Tuamah bangin Zomi Movement ih cih bang ahi hiam cihzong kician takin taangpi in atel ding kisamta hi. Zomi, Zomi ci in, Minam vang tawh Agenda adang khatpeuh ih gupkhialhloh ding zong Khangnote in theih huaita ding hi.

Minam Party in Minam siksan in Kivaipuakzia anei hiam, Minam Party ih cih bang hi a, kuate Minam Party taktak ahi hiam cihpen Khangnote in sittel huai mahmah ding hi. Gam leh Minam Itna tawh a kilam Party khatpeuh dinmun, zia leh tong, kivaipuakzia bang tawh kiteh thei ding hiam cih thu Mipil Misiamte in hong hilhcian hileh lunggulh huai ka sapen hi.

10. Nation Building:

Zogam a kibawl ding Khangno Khawmpite ah Nation Building thulupi tawh kisai thusinna bawl ding hileng, Kawl Gam huam in thu ih sunma in, Zogam alam ding hi lehang, bangteng kisam a, bangteng geel ding, bangteng kikum ding ihhiam cihciang tawh lungkim huai in ka um hi. Tu tung Khangno Khawmpite sung ah, tu laitak a ih Gam Makaite tung a thusun huai, Zogam lam dan ding leh Zogam khantohna ding thubulpi pawl khat (Strategic Plan) kikum in Khawmpi Thukhensatna bawl a, Gam Makaite tung Laipi phahciat ding ka hanthawn nuam hi.

Gam khat alam dingin a kithawi hi lehang akisam Thu leh Late khungkhawm lehang mailam ah hong kimangthei mahmah ding hi. Ih vengte in Master Plan cihmah, Blue Print cihmah tampi na geelkhol uh a, tuate a hun atun ciangin phahkhia uh ahih manin namdangte sangin madawk zaw uhhi. Zogam Master Plan maw, Zogam Development Blueprint hiam khat, tutung Khangno Khawmpite sung pan hong gingkhia dingin lam-en ing.

Zanhal sungteng a, Zogam a kibawl ding Khangno Khawmpite avaihawm Tanute tung pan thuleng ka zakna tungtawn in, tuipi galkhat a ka ommuan panin ka lunggulhna, ka deihsakna leh ka lam-etna teng Zogam Vilna ci in Laipai tawh a gelh samsam hi ing ei. Pawl khat in zadah thei ding hi cih thei ing. Gam leh Minam vai ahih manin kei tawhzong a kisai in ka ngaihsun a, tuamah bangin, Zogam leh Zomi thu ahih aleh, leitungbup a om Zomi khempeuh tawh kisai hi ci in ka sang hi. Ih vengte inzong a omna mun, a gammi hihna cih dinmunte tawh kideidanlo in, Gam leh Minam vai kikum thei ahihteh ci a, eizong mite bangmah in kikuppih thei dingin lam-en ka hih manin Khangno Khawmpite thu ahong kum hi ing. Ngaihdan akibanglote kitelsiam ni. Anungta Pasian in Zogam alamto semsem tahen! GSKhup (Tulsa, Oklahoma)