Zogam pan UNO Zumpi ah ~ Bob Tuangpi

Zogam pan UNO Zumpi ah ~ Bob Tuangpi

Tukum UNO Head Quarters, New York City ah January 30-31,2017 hunsung kibawl United Nations Youth Forum (ECOSOC YOUTH 2030) ka vakah thei hi. Tua kamkupna khawmpi hun pen 9:30 AM-3:15 PM kikal sung hi. Tua khawmpi ah kigen thutom leh kikup thu tuamtuamte mun tuamtuam ah om ka mipih ZOMI te’ tungah atomkimin hong hawmsawn nuam ing. Kamkupna thulu ahih leh, “Akikhelkhel Leitungah Zawnna Khiamin Cihtheihna Lapsangna Dingin Khangnote’ Panlaakna 2030” United Nations Youth Forum On The Role of Youth In Proverty Eradication and Promoting Prosperity in A Changing World Agenda 2030 (ECOSOC YOUTH 2030) ahihi. Hih khawmpi ka va kah theihna bulpi in ahih leh gamsungah gamvai nasepna ah lawptak kihelin iminam party Zomi Congress For Democracy tawh Zomi ading hihtheih zah ka mapanna hang ziakin Zomi Innkuan USA, Inc makaite’ deihsakna hang tawh amau’ taangmi-in hong kahsak uh hi.

Gam tuamtuam pan hong kihel taangmi teng (Asia Pacific, Latin America, Europe, Africa) tawh kimukha, kihopihkha ka hih manin, ka zak ngeiloh ka muh ngeiloh thu limcii tampi va sinkha ing. Hih kamkupna ah kipawlna (NGOs & CSOs, CBOs) tampi mun tuamtuam panin hong kah uh a, gamkhat le gamkhat ah akibanglo-in khangnote mapanzia, pattahzia atuamtuam thusunna leh dotna kinei thei hi.

Hih hun sungah United Nations Secretary- General ahi Antonio Gutteres in “Taking Action To Implement Agenda 2030″ cih thulu tawh ama pumpi hong kihel zawhloh hang’n video clip tawh thukhong honna leh vaimuakna hong nei thei hi. Tua ban ah, President of United Nations Economic and Social Council in zong innkuan khat ahi leitung gam tuamtuam ah a om minamte leh gamte in gamvai, sumlei sumzuakna lam leh nuntak khuasakna athahatnate ah amuibut nang le mazang theihna ding pen khangnote hi (Young people are the driving force of politics, socio-economic and sustainable development) cih thuguipi hong sutkhia hi.

Tua teng ban ah gam tuamtuam pan kumpi nasem panmunneite (Gtna: Russia Federation, Philippines, Bangladesh, Norway, Denmark, Portugal, Nepal, Hungary) gamte’ taangmite in agam vuah khangnote apattahzia uh ( National Planning for Youth) aneihzia uh le alawhcinna uh pulakkhiatna hong neikhia ziahziah uhhi. Tuate’ tungtawnin dotna dawnna akisehsa tungtawnin kinei thei hi.

Tua bang teng khit ah khuahun kilaihzia leh kiim-le-paam kepzia ding vai ( Climate Change & Environmental issue), khangnote athahat muibutna ding pilna hoih aguat kulzia (youth & education), le khangno le khantohna (youth & development) cih bangin khangnote’ khantoh nang muhna tuamtuam pan thusunnate akivate (experts) in thusunna hong neikhia thei uh hi.

New York khuapi ahih leh leitung khuapi teng lak ah khuamun lian pen leitung mihau, mipil leh mi maimailo teng kituah busakna ahih mah bangin inn le lo, lampite pen hicizaw deuh leh cih nang mahmah om ka sa kei hi. Leitung aa minam khempeuhte’ ngeina akimna (multi-cultural city) tatak hi cih lai leh video aa ka muh bek hilo mittangin ka muh tatak teh ka aangtang pha mahmah hi.

Avom, akang aeng minam tuamtuam, ngeina tuamtuam leh upnate (diverse backgrounds with diverse values, beliefs and peaceful co-existence) kampi bek tawh hilo, nuntakna tawh akilahkhiatna leitang, leitung gammi (global citizen) lungsim vomin khat leh khat kizahtak siamna leh kiteel siamna (mutual respect & understanding) leitungah a om penna hin teh ci’n ka ciam teh hi.

A young ZOMI attended United Nations Youth Forum on ” The role of youth in poverty eradication and promoting prosperity in a changing world Agenda 2030″ on 30-31 January,2017 at United Nations Head Quarters, New York City. We shared the same feelings for the future of global youth.

Lungdamna Leh Mimal Muhna
Yangon International Airport pan 29.1.2017 ka lengkhia aa, Incheon International Airport (S.Korea) ah vanleng laih-in John F.Kenedy International Airport (New York City) 29.1.2017 (US standart time 12:30 PM) ah cidamtakin ka va tung thei hi. Vanleng phualpi ah Zomi Innkuan USA makaipi Dr. Do Khan Khup leh Pa Tual Sawm Lian(ZIUSA Treasurer) te nupa in vaimuakna hong na neithei uhhi.

Kimuhphet kibansah, maan kilak khit teh ka giah nang Amsterdam Court Hotel New York khualaizang tak ah hong zuatpih pah vingveng uhhi. UNO zumpi New York ah ni (2) sung khangno kamkupna khawmpi ka kah sung lunghimawhna omlo abangkim kicingtakin hong vansak ZIUSA makaite’tungah ka lungdamna ka lungtang tawngah ka ciamteh hi.

America ka om sung teng (29.1.2017- 22.7.2017) kha (5) val sung ah Zomi omna State (15) leh khuapi (26) bang ka va hawh koikoi thei hi.

Amunmun ah om Zomite le Zomi Innkuan makaite (Local Zomi Innkuan tuamtuamte) tungah hong Zomi a itna uh hangin hong vaimuakna, zindonate uh leh tulai Zogam gamvai, Kawlgam gamvai khuahun luanzia leh Zomi te Kawlgam ah ahunhunin gamvai imapanna (the role of Zomi in Myanmar politics) cih thu limcii theihhuai muhnate kihopsawmna thupitak hong neihpih koikoite hangin zong hampha leh aangtang kisa mahmah ing. Adiakin Zomi Innkuan Oklahoma te’ tungah lungdam mahmah ing.

Bang hang hiam cih leh amaute in A (69) Veina Zomi Nam Ni, USA gamsungah Zomi atampen omna Tulsa khuapi ah zinmangpi (Chief Guest) aa hong nei-in Zomi tul (2000) val mai ah Zomi, Zogam vai leh Kawlgam gamvai thupi (turning point) kikhelna khempeuh ah Zomi te ikihelkhakna leh Zomi te Kawlgam phutkhia ihihna (Panglong Agreement Signatory 1947 & Founding Fathers of Union of Burma) vuicingtak hong suukhiasak uh ahih man ka lungkim phadiak hi.

Tua ban ah USA gamsung ka vak koikoina teng ah hunlem kamkupna ka ngah simin Zomi te leitung kiuli ah ikitheh thang hangin imuntek aciangciang ah iminam leh igam vai ipaihtheih hetlohna te akipan igam hong paallun nading ithathatnate buptuahin hualkhat aa iluankhop theih masiah minamvai leh gamvai ah kimualsuak zolo ding ahihna thute zong ka va tangko thei hi. America gamsung munthupi deuh ahi US gambup Innpi (US Capitol), US Kumpi Innkangpi (White House), 747 vanleng bawlkhiatna phualpi, One World Trade Center leh Tausang (tower) minthang zawdeuh teng zong ka va hawhkhak ban ah munthupi (historic places) tam simtha lawm-le-gual te’ deihsakna tawh ka va en kha koikoi hi.

Tuipi galkai abeisa le tulaitak Zomite’ dinmun nuntak khuasakzia ahih leh akipan tung akhuamkua khuat sanlaitak ihih mah bangin, minam dangte tawh liangko kikimin nuntak khuasak leh inn-le-lo kicithei nailo hi. Ahizongin ka upna leh lametna tatakin tulaitak alawhcing nuntak khuasakna ah nisuahna gam lam pan Korea, Japan, China, Vietnam te bang tuma kum (50) vallai pekin USA ah na tualbual khin uh ahihna hang ziak uh hizaw hi. Ei Zomi te zong tukhang masa ah alawhcing khop ki omta ahih manin, itate ahih keh tute’khang peuhmah ah bel tulaitak khang (3) na ah alawhcing minamte dinmun tungzo pelmawh dingin ka um hi. Tukhang ah bel ahaksapi teng aphullaitak ihihi. Tulaitak iphhutkhak pen eima in zong na nawkto veve uhhi.

Thupi ka sak leh a etteh huai US nuntakzia ah mihing pen mihing bangin kizahtak tekna (mutual respect), thukhun om bang nuntakna/thukhun kizelhna (No one is above the law/rule of law), gammi khempeuh in gammi hihna noptuampih (citizen rights) tek uhhi. Bangbang ahizongin inn-le-lo, omna leh nasep gammi kician ahih naak leh (basic human needs & fundamental human rights) ngahkim uh ka sa hi.

Ka thungetna ah nikhat ni ciang igam hong hoih teh leitung kiuli ah nuntak khuasak haksatna hangin akikhenthang Zomi te in atuntunna gam vua pilna, hauhna leh siamnate tawh Zogam hong zuankik lua un teh ci’n 1949 kum Communist Party of China makaipi Mao Zedong hun sung tawh ka tehkaak zel aa, gam ki-ukna hoihloh ziakin leitung mun citeng ah akithehthang Sen mipil le misiamte 1979 kum Sengam makaipi Deng Xiaoping hun teh hong ciahkik uh bang ngelnel in teh ka cici hi.

P.S :*Tungsolkhapi atanphat mahmah laitak miallam amanawh hita aa, amial mahmah laitak atangpha mahmah ding lam amanawh hi.* (Chinese Proverb)

Bob Tuangpi (Mauvom)