Zogam pan kahna Aw ~ Rev. Kai Cin Mang

Zogam pan kahna Aw ~ Rev. Kai Cin Mang

Kalaymyo a ZYA-te kiang panin article ngetna lai ka ngah ciangin nuam lah nuam, dah lah dah cih bang khatin ka oma kihei pongpongin ka om hi. Ka nuamna ah bangmah ka theita kei zongin ZYA in article khat gelh dinga hong muanna uh hangin angtang mahmah hi’ng. Ka dahna ah kei laigelh mi hi loin Tagah naupang kem khat hilel ka hih man ci-in ka thanem mahmah hi. Ahi zongin ka thangah kikna ah Chief Editor a sem pen ka lawm it mahmah Rev. Job Nang Khaw Thawng ahih man a valteng na lakhia thei ding a, a kisam teng na guansak thei ding ahih teh ci-in kong gelh phengphang hi.

Gal in don vua
Ei Zomite pen tulaitak lianin i Zogama om le Zogam ahi lo muntuam gamtuama omte kigawm pen a kikim kei zongin tam kikhai lua nawnlo dingin ka ummawh hi. Mi namdangte lakah pau namdangte lakah i om kawikawi ta hi. Leitung buppi ah kizel ta hihang cileng a khial nawnlo ding hita hi. Mi laka kihelte sungah zong mi namdangte muantheih suantheih ding zong tampi mah i om ta hi. Mite sangin pilna lam, kimawlna lam ah a kitawisang zong i om kawmkawm ta hi. Pasian in ei Zomite sungah tumtheih siamna, lasak siamna cihte zong hong pia in, mi lakah a kidawkdiak zong i om hi. Eimi tampi takmah Pasian piak siamna tuamtuamte tawh mi namdangte lakah i om kawikawi hi.

I Zogam panin a pil a siam, a nei zawdeuh pawlkhat in mi namdangte lak hong zuat sansan uh ahih manin pawlkhatte’ tate bang in Zopau nangawn a pau nuam nawnlo bang a om ta himai hi. Minam dangte lakah inn hoih nono, mawtaw hoih nono tawh anlim nono ne-in om zo uh hi. Eenhuai, lungdampihhuai tawh kibang hi. Yangon khuapi ah Khuado pawi kumsimin kibawlin nopci mahmah hi. Gam ngaihna la vive kisa in, alim le aw kithuahin hong bawl uh a, i Zogam pan tuate ka na en zel uh a, ka angtang mahmah uh hi. Ahi zongin Khuado pian khiatna i Zogam ah khua a kido zawh loh sawt simsim ta hi. Mun tuamtuam ah kibawl zo napi, i Zo leitang ah kibawl, kivaihawm zo nawnlo hi. Zogam itna la le thute kisasa kisutsut napi-in i pianna i Zogam ah kisa kisut zo nawnlo hi. Gal in hong don ve vua.

I dinmun
Zogam Zovontawite sung panin khuamu masa apil asiam pawlkhat in hong paisansan ta-in a tamzaw phial pen khangthakte khutsungah vai khempeuh hong omta cileng kikhial nawnlo ding hi. Khangthak a tamzawte pen pilna siamna tawh kituakin nasem silbawlin a munmun ah om kawikawi uh hi. Pasian thupha kisangin pilna siamna sangpipi zong ki-om a, tuate pen khuapi khualiante bekmah tawh a kituak hi zel hi. Sumzon paizonna ah zong khuapi khualian mah ah baihzawin nuntakna nuamzaw hi. Pawlkhatte ahihleh tuipi galkhat nangawn ah a va tung uh hita hi. I Zogam pen nuntakna haksa kisa tekin tua pan suahtak nang a kizong tek hi a, mi’ gam mi’ lei batzawh nading pen mimal khat ciat lungsim sungah om tek dingin ka um hi.

Zogam i cih pen nidangin singzing lak hi a, singkung lopa dum dildialin luituite luang sialsialin nuntak gim a nam mahmah mualtang dungte hi a, tu-in ahihleh singkung lopa zong po zo nawn loin luituite nangawn a kang phialphial hita a, guahtui man nawn loin khuahun kikhelna hangin khawhsa kikham zo nawnlo hi. A khuahun mah tawh kizui-in apil asiam anei alamte zong i Zogam ah hong heupian ta-in nuntak khuasakzia pen hong haksa tektek hi.

Nuntakna haksa ahih man a cina a omleh neihzah tawh kituaka kibawl kikep hi-in, nuntakna nangawn in a zuizui hita mai hi. Tua ahih manin, i Zogam sungah Nu nei lo, Pa nei lo, Nu le Pa nei lo, Nu le Pa om napi nektawm ding nangawn a nei lo Nu le Pa, naupang tampitak om mawk hi. Pilna sin nang genlohin, nektawm ding a nei lo tampitak ki-om mawk hi. I Zogam ah hih bang haksatna a nei pen kitam mahmah hi. Apil asiam ding mailam ah Zogam ading kizang thei mahmah ding pen khuasung khuavai ah sang kah zo lo a, a vakthap tampitak om lai mawk hi. Apil asiam teng lah paipai-in i mipihte hi ci koih leeng laitan nei mel lo honkhat in i khua i tuite hong makaih leh khuangaihhuai mahmah leh kilawm hi. Pawlkhatte bangin bel an ngah theihna peuh, pilna sin theihna peuh ah kha ziauziau uh a, tuate bela mi lah mangthang, a kha lah mangthang hi pah lel hi.

Tua ahih manin, mun tuam, gam tuam, minam tuamtuamte laka Pasian’ thupha sanga om Zomi te aw, i Zogam leitang ah i ngeina Khuado, Sialsawm cih i ngeinate a kineih zawh loh ban ah neilopipi, siamlopipi-in tagah kepnate kiphuan kipansama i Zogam haksatna tawh teh leng nasepsate ci’ gei (Zoci) peh zong bang zo lo ahih manin, i Zogam leitang in nang mahmah kisam teh, ci-in kap ngutngut hi.

Zomi na hihna Zogam leitang tungah na kilatsak zawh nading Topa in thupha hong pia kim ciat ta hen. Rev. Kai Cin Mang (BOM) B.A.B.S; B.C.Min.; M.Min, Founder & President, Bethesda Orphanage Ministry, Tedim