Zogam maban mimal lunggelna

Zogam maban mimal lunggelna

Kalaymyo huamsung February kha pan kipan lampitung lungphona kinei toto hi. March kha lang valpan kipan mipi lungphona hong khenkham hong kap in zong mat hong nei to uh hi. Mipi lampam zong nuntakna hong beilawh hong omta hi.

Naute zong alawm agual te aki man tawh a si tawh hong om takteh na sa mahmah in kidalna le kisaple dokik theih ding lunggulh in minam sung a kipawlna omte tung hopihna le zopna nei ngeingai a tua kipawlnate in ei buai ding hinailo ei kalsuan zia policy tawh kituaklo ci uh hi.

March kha sung ciangciang naupangte lunggulhna le lametna hong ngahloh uh teh bangbang aizong a leitangh tung ah (ground ah) kasam kin luamahmah ta ahih teh ci kipawlna omsa te sung mite mah tung lampi zialetong dong in tua lamlahna zui in amau teng mah kikum to in neih bangbang tawh nanding le a vengveng pan simding hong kithawi khia uh hi.

Khangno vai le kisam kin luata ci in kiallap in a vengveng, a munmun le a khuakhua (Tonzang, Tedim, Theizang, Khaikam, Munlai, Tahan, etc.) ah kizom to deudeu uh in khut siam pawlkhat in amau hih theih bangbang (eg. saili, gas thau, huih thau, zothau, tangkhat thun thau etc.) tawh pan hong lato tek uh hi.

Hun tomno sung hipan le kilawm napi in meeting bang 20 veival bang nei man khin uh a kipawlna kilam zia zong “ZOMI FEDERAL UNION” ci in tua nuai ah,

• – Supreme Council (mi 7) (Tedim 2, Tonzang 1, Kalaymyo 1, Yangon 1, Overseas 1 le teltuam 1)
• – Department 5 (Finance Dep, Public Relations, Supporting Dep, Federal Army, Admin Team)
• – Advisory board
• cihbang in akilam khin nahi uh hi.

April kha sung hong tuntak teh naute omna phual teng buluh hong kipan uh a vanneihte kikimloh na hangtawh suahtak theih bangbang in kitai khia tek in tu in gamlak a om tawh, gamgi lam a om tawh le gamveng sung a na tung tawh cihbang in kihem khia tek pak phot uh uh hi.

Tuabang kawmkal ah a tung a naute lunggulh a tangtung lo pen tun hong kilim patsawm mahmah din mun hong om in kiallap a ading kipawlnate mawhsakna ki zazelzul hi.

Naute in a cimawh laitak vua huhna a ngahloh uh teh alem bangbang tawh le amau mite mah i lamlahna tawh hong dintoh na uh pen a omsa kipawlnate a demnuam cih hipeuhmah loding hi.

Generation xyz zia le dan zui in ding pah ding, gel pah ding, kuan pah ding etc. cihdan hi in a omsate thusim lohna, demnopna le donopna hipeuhmah lo khading uh ahih manin ki telkhialh khak hetloh ding thupi mahmah ding hi.

Lunggulh le tupna kibang lua pha mahmah khading ahih manin makaipite maitang kimu tuah in holim kumkhawm thei hile uh deihsak huai mahmah hi. Khangthak khangno a qualified mahmah le a semngam zong honkhat hong dawk khia sa ing.

Tutung in Zogam, Zomite ading khangthak khangno, khanglai, khangham kipawlkhawm ngeingai a Zogam maban kalsuanna ah alimci mahmah hong piankhiat na hong hihen ci in ommuan munpan lunglai ah nana gelgel ing ee.

Behlapna: Kuamah mawhsak nopna hilo, gamle minam hoih nading vei luat natawh mimal muhna ciang hilel hi. Ngaihsutna kibang kim hetlo ding ahih manin ei ngaihsutna tawh aki tuah keileh kimaisak ni. Kam Suan Mung