Zogam leh Kalay Myone aa dongtuak te panpih ding hanthotna

Date : July 31, 2015
Kongit uh USA gam sunga om Zomi Pawlpi te leh Biakpiak kikhopna mun tuamtuam te:

Athu: ZOGAM LEH KALAY MYONE AA DONGTUAK TE PANPIH DING HANTHOTNA

July 14, 2015 ni a kipan in Zogam leh Kalay Myone kiim ah guahtui tam luatna hangin cimawh dongtuakna ih Zomi pihte in phu kha uh a, tuni ciang dong guahtui kang nailo ban ah tui khangkhang lai cih a za kim tek dingin kong lamen uh hi.

Tua ban ah hih ih tuah cimawh dongtuahna pen tu le tu in zong a veng zo pah ding hilo a, tui hong kiamin hileh zong inn le lo leh lampi tampi sia a, neektawm ding nangawn haksa mahmah ding ahih manin Zomi / Zogam in huhna tampi kisam ding hi. Zogam ah tu laitak tuuk tung nailoh deuh ahih kawmkal ah guahtui in ankung teng susia khin ahih manin zong ih dah mahmah hi. Kham’ a te zaang ah pai theilo, zaang a te kham’ ah pai theilo dinmun ah ih om hi.

Tua ahih manin tu a ahong tung ding Nipi Ni – August 2, 2015 ni-in USA gam sung aom Zomi Pawlpi khempeuh ki thukhatin, ih Zomi pihte a ding thunget khopna hun ih neih ciatna dingin ZCMF USA min tawh kong zawn uh hi.

Ih Pawlpi ciat pan in Nipi sumdon khat ahih kei leh eimau hanciam zawhzah ciat Pawlpi min tawh ahi zong, mimal min tawh ahi zong, ih Zomi pih dongtuakte ih panpih ciatna dingin Zeisu min tawh kong hanthawn uh hi.

Sum khakna ding mun:

Rev Cin Do Thawng
Treasurer, ZCMF USA
P.O. Box 1939
Frederick, MD 21702

N.B. Pay to the order of: ZCMF USA

Note: Sum ngah zahzah Tedim Churches Council ( TCC ) leh
Zomi Youth Association ( ZYA ) Kalaymyo ah ki khak ding hi.

Note tawh nasem khawm,

Rev Thang Cin Pau
Secretary
ZCMF USA