Zogam in nang tektek hongngak

Zogam in nang tektek hongngak ~ Cin Lian Khai

Zomi it leh ngaihteng, Oct 16-2017 Malaysia ah Zomi Khuado vasim thei ingh. Khuado Committee ten hun minite 15 hongpia in Shortspeech vanei thei ingh. Tualai ah athulu ding in “ Zogam in nang tektek hong ngak” na ci ingh. Milak ah thugen mengmenglo kahihman in mipi mai ka tunciang, tuazah tak a mipi tam mai ah ka ding ciang ka tha hong ling mahmah hi. Lungsim takpi leh deihsakna , lunggulhna takpi tawh Zomi tangval honkhat hong ciah in ih gam ih lei mikhut sung ah om aiteh a lakik ding in hong ciah uh leh cih lunggulhna tawh “ Zogam in nang tektek hong ngak” aci hingh.

Tuaban ah Zomi/Zogam it tektek ih hihteh ei mahmah in ih gam ading sem nuam ding hihangh, mi khut a gul mat sawmlo ding hihangh cihnop na hi. Zomi khempeuh in Zogam a zun ding in tunnu Zogam in hong ngak cihnopna zong hi. Anuai a bang in thulu guan in na gen thei ingh. Zogam in luankhi tawh haibang hong ngak hi.

Zomite Dinmun Ahuampi

Zomite ih dinmun ahuampi in enleng, Kipawlna tam mahmah a, Zomi Innkuante, Civil Sociaty Organizationte, NGOs te Biakna Kipawlnate, Party, Thaw tawi ci-in dinmun kip kinei mahmah ta hi. Tuate sungah Community pan

• ZIUSA in UN ah Consultative hong ngah hi.
• Biakna kipawlna pan ZBCA in WBA ah member hong ngah hi.
• CSOs pan ZYA in khua 100 val ah zungkha khin hi.
• Mizoram State ah Zomi cih ciaptehna ih ngahnang Zomi Cultural Society ten pan alak laitak uh hi.
• Manipure State ah ZRA in India Kumpi tawh kilemna la hi.
• Kawlgam ih Minam Minsel Party ahi ZCD pen Kawlgam Innpi ah tukhin hi.
• Zogam, Tedim -Tonzang huam bekbek ah zong ei thuneihna tawm lai mahmah hi.

Rebuplic of Union of Myanmar (RUM) Dinmun Tomlak

Atom in Kawlgam dinmun enleng, NLD in gualzawhna hongngah hang in Mipi deihloh penpen kilemkimna hongdal 2008 Constitution hong khekzo paklo ding uh hi.

Abeisa 2015 Nationwide Ceasefire Agreement in Mualmi Thau tawi kipawlna UNFC leh EAOs teng sukham zawsawp hi. Kilemna om cih thadah, kikapna tudong omlai hi. UNFC kitamkham ahihman in Kilemna lalo Thahat Tautawite NA-Northern Alliance ah lut un, Federal gam apiang mateng malak sawm uh hi.

Union Peace Conference-21st Century Panlong ihcih sam hang, Thautawi kipawlna khempeuh lutsaklo uh inclusive loban ah 2015 NCA Roadmap bek ahihman in Galkap Kumpi mah in thunei ahihna tawh, kilemna hong tunpih zolo ding cih muhsa ahihi.

NCA pan FPNCC- Why Nationwide Ceasefire Agreement to Federal Political Negotiation and Consultative Committee

NCA Thukimma pen August 7, 2015 in mansiang sak uh hi.

Kawlkumpi let ahihman in,Taang National Liberation Army (PSLF/TNLA), Myanmar Nationalities Democratic Alliance Army (MNDAA) Arakan Army (AA), Lahu Democratic Union (LDU), Wa National Organization (WNO) and Arakan National Council (ANC) te kihel ding phallo uh hi. Tuahang in, Kachin Independence Army (KIO/KIA), Karenni National Progressive Party (KNPP), New Mon State Party (NMSP), Shan State Progressive Party (SSPP/SSA) ten NCA signlo ding in, September 9, 2015 a kibawl meeting ah gen khia uh hi. Banghang hiam cihleh, Kawlgalkap Kumpi in Mualmi Thautawi khempeuh kilemna ah helkimlo ahihman uh hi ciziau uh hi. Tuaban ah NCA Thukhun honkhat a thukim zawhloh uh om hi.

A kilehbulh leuleu ah, Karen National Union (KNU), Restoration Council for Shan State (RCSS/SSA), Paos National Liberation Organization (PNLO), Chin National Front (CNF), All Burma Students’ Democratic Front (ABSDF), Democratic Karen Buddhist Association (DKBA), Karen National Union/Karen National Liberation Army Peace Council (KNU/KNLA-PC) and Arakan Liberation Party (ALP) ten Mualmi Thau tawi dangte tawh tawnlo in Oct 15, 2015 in NCA thukimna suaikai hiau uh hi. Akitawng loteng in Kilemna bawl uh hi. Tuani pen Mualmi Thautawite phelnih akisuahni hi a, Aung San Suu Kyi zong kah beklo hi.

Kawl Galkap Kumpi in United Wa State Party (UWSA/UWSP), National Democratic Alliance Army (NDAA) and National Socialist Council of Naga (NSCN-K) te aciamteh uh hang kilemna latuanlo uh hi.

Ahuampi in enleng, alunglut huai mahmah ah, Myanmar-Thai Gamgi aomteng in Kilemna Suaikai a, Myanmar-China Gamgi a omteng in Kilemna Suaikailo kici thei hi.

Tua Suaikailo teng United Nations Federation Council (UNFC) pan hong khawl pah uh hi. Ahang in Ethnic Arm Organizations aa, kipawlna 16 te pen UNFC ah Political Partite tawh kipawl in kilemna ah kalsuan khawm uh hi. Phelnih hong kisuah uh ciang, Phelkhat pai khia in koi ah pai hiam cih leh NA ah pai uh hi.

Northern Alliance (NA)

Kilemna lalo Thautawite pen NA ah apai ma un, akhat veina Union Peace Conference-21st Century Panlong hong kah tei uh hi. Anih veina ma in NA ah kigawm uh hi. NA pan Sen Kumpi sawlna tawh anihveina Union Peace Conference-21st Century Panlong ah zan khat giak in Vanleng tawh Younan State pan vakah uh a, ciahkik pah uh hi. NA ih cih pen Beem(O)Wah te makaihna hi leuleu hi.

FPNCC

Federal Political Negotiation and Consultative Committee pen Northern Alliance ten Kumpitawh kilemna abawl nang un Committee abawl uh hia, Wah te makaihna hi. Tuasung ah, KIO, ULA, PSLF, MNTJP, SSPP, PSC, UWSP te kihel uh hi.

NCA pen Galkap Kumpi uk Kilemna Committee hi a, FPNCC pen Mualmite uk kilemna Committee hi. NCA in Kilemna hong muhpih loding lam athei khempeuh FPNCC ah alut hizaw hi. NCA Roadmap pen abei dekdek hizaw hi.

Banghang FPNCC

Galkap te NCA thukhun in Federal tawh kituak kimlo ahihman in Mualmite deih Federal tawh kituak ding in FPNCC in policy hong bawl uh ahizaw hi. NA ten Kumpi in Kilemna abawl nop leh FPNCC pan hong hopih uh hen ci ngam uh hi.

Atung a ihgen khat lakik leng 2015 NCA signed teng pen Myanmar-Thai Gamgi based teng hideuh a, a signed loteng Myanmar-China Gamgi based teng hi. Tun FPNCC in Kibelpawl gam ah kilemna aomtheih nang Gamveng Senten nong huh nang huhna kangen uh hi ci-in Aug, 24, 2017 Wah State Pangkham Khuapi ah kibawl amasapen FPNCC meeting pan Statement number 7 na ah gelh khia uh hi. Kilemna aomnang International Pressure ala uh hi a, Federal tawh kituak Upadi bupi inneih mateng, FPNCC in Suaikai lo ding uh hi.

Hong Ki Zimcipta

Tua Kawmkal ah Zomite ihdinmun atoi mahmah lai hi. Zogam nalengh ah Galkap nam thum om a, Kawl Galkap, Chin Galkap leh Meitei Galkap ahi uh hi. CNF ten Gamgi ah siahdong uh a, Meiteiten Tonzang Gam Senam le Sialmei lam ah busa in Bengcing uh hi. Hihte ahun in ihdang a ih hawlkhiat zawh kei leh Zomi zingvai mial mahmah ding hi. Zokam bek a kizatna mun Tedim leh Tonzang ah Namdang Galkapten thu hong nei uh hi.Zomiten Leitangh nei napi hangh, mi khutsung ah piapia hihangh. Leitang pen Sisan tawh a kihu ahihi, Zomi Galkap in Zogam a kem ding ahihi, nang leh kei tektek Army sem in gam kemcing ding hihangh.

Zomi Galkap dingzo leng Zomiten hamphatna tampi ngah ding hihangh. Zogam pan Galkap dangteng thautawina hang in thutawh hawl khia zo ding hihangh. Minam lian ih hihna lakzo ding hihangh. Nikhat niteh Zomi leh Zomi bek kiuk in kuama khut nuai ah om nawnlo ding hihangh. Zomi State lazo leng Zomite khangto in gual englo ding hihangh. Federal Union hong kilamteh Zomi thusung in Zomi State lamkhia leng, khangsawnte ading in khangtohna lianpi hongsuak ding hi.

Ih nuntak sung, ih Gam ading in, Ih sep zawh tantan ihsep kei leh ih tu ih ta te ading in gam hoih apia zolo hihangh. Khaici hoih tuhni.Galkap ih cih sam hang Politics ah kikap ni, nongngap hia cih hipah lo a ko om ungh cih lahna zong ahihi. Political Demand( ih deih ih nget theih nang Thau kitawi hizaw hi.Thu leh La tawh do kei leng, Galtai Minam leh Mi khut sung ah aomden Minam ih suak ding lauh huai mawk hi. Thu tawh adodo pawl om a, thu bek tawh akido theilo na om hi.

9Miles pan Tedim/Ciau /Cikha Mawtaw paiteng Tax Zomi ten la in Zogam Budget Tedim pan zekkhia leng kikhangto mahmah ding hi.Gulu Mual leh Dolluang Gamsung a Sumngoteng sumsuah in Tedim pan zek leng vam mahmah ding hi.Tedim leh Kawl kikal minit 90 bek Mawtaw tai leh ki vam khantoh ding hi. Kalaymyo ah Sang/ College kah leng ki vam pil semsem ding hi.Tedim-Tonzang-Cikha lampi Cement Road hi in, Cikha ah Manipur tawh kizopna Boader Trade Center om leh e, khuvam lodia.Tedim pan Migam Falam District ahi Rih tawn nawnlo in, atedim-Kapteel-Tuidil lam tawn in Mizoram tawh kizopna Boarder Trade omleh bel naizaw lai in kikhangto mahmah ding hi.Tedim to Bulphek or Tedim to Dalkhai-Mizogam ah Boarder Trade bawl zihziah leng ee. Zomi zingvai Zomi in hawm in Zogam ah Free Trade Economic Zone khong nei leng, Free Tax khong, etc

Gam leh Minam pen Sisan tawh akilei hi.

Isreal te tangthu honkhat en pak lehangh, Mr.. Nethanyahu in hi ibang in gen hi.Tuma kum 70 lai in Jew te Tuu hon bang in hong kithat hi. Tuma kum 60 lai in Gam nei kei ungh, Galkap nei kei ungh. Arab gam pan gam 7 ten a neu mahmah Jews State tawh gal kido ding in hong phin uh hi.Tuado ding , Ko galkap 650 bek pha ungh. IDF (Israel Defense Army) cih bang om nai kei ungh. Gal Vanleng zong nei nai kei ungh, Gam leh lei it mihangsan bek nei ungh. Lebanon, Syria, Iraq, Jordan, Egypt, Libya, Saudi Arabia ten tha khatthu , hun kibang in hong do uh hi UN ten hong pia ka gam uh 65% Sehnel gam hi.. Tuma kum 35 lai in Arab a galhat pen gam thum ni 6 sung in do ungh a zo ungh.

Tun ahih leh, Gam, Galkap, Gal Vanleng, Sumleisumzuakna, IT, Siavuan cihteh ahoih mahmah nei ungh. Sehnel gam ah khaici namcin ciing thei ungh. Space ah zong Satellites 5 khah khin ungh. Leitung ah khangto pen leh galhat pen USA milip 250 million, Russia, Milip 200 Million, Chinna, Milip 1.3 billion Europeans – France, Great Britain, Germany – Milip 350 million tetawh liangko kikim ungh. Laisiangtho sung a kigelh hatsatna leh adang Leitung migilo, galhatte hong piak tampi tak thuak in kantan zo ungh. Ahang pen ko leh ko ka ki it mahmah man uh hi ci-in gen hi.

Hanthotna

India gam makai SB Chandrabos in ‘ Give me your blood, and I will give you freedom’ ci hi. Na sisan nongpiak leh suahtakna kong pia ding hi ci hi. Gam leh minam pen Sisan tawh a kigum a kilei ahihi. Thudang khat in gen leng Zomi galkap hong lut un, cihnopna ahihi. Moses zong Pharaoh kiang ah a gen masa pen’ let my people go’ cih kammal in Zomi Pasian nasem khempeuh in naza ta un, Moses pen politician leh Nationalist hi. Zomi cih paulap in gospel mawk paipai pawi mawk bawlbawl kei unla, ih minam ading hong kin un, nozong Zomi Nationalist hi uh leh. Ko Pasian nasemte lo in Minam nasemte piangtheilo hi ci-in mipi mai ah kam dimdim in gennawn kei unla, Zomi zingvai pen Politician te bek hilo ihvek in Zomi a kici khempeuh i vaipuak hi cihnopna hi.

Tuabang a Gam ih neih theih na ding in ki it mahmah kisam hi. Kihai Thutuah Ni ciphial ingh.AKipilsak teng hong kihaisak henla, lawngkhat in luangkhawm ni. Ahang in a kipilsakteng hang in buaina tampi om a kikhenkhapna leh kiamsukna piang hi. Mipil taktakte zong kipilsak tuanlo hi. FB zangh thei khat kipilsak cihpah zong mihai hituanlo. Zomi makaiten Mei lak ah hong tuakpih samlo ding hi.

Thukhupna

B Muan Ngaihte lasak (Kua Hiam Ding Ding?)

A: Tualai khangno lia leh tang lungngai dih ve ni, ih gam pupa satsa lei tulding bangzo hi, ka gam ka lei ihci a kamkei bang ih hang, ih gual in zingvai hong hawm khum ta

Cho:’ Kuahiam ding ding , kuahiam kuan ding ih gam a ding in,
Itna taktak Pasian anei, Gam lei a it ding, gam lei ahuai tusawn khangsawn makhual ding’2

Hongzun henaw tungsianmang in pupa satsa gam, maciang huai ding hong siam hen aw.

B. Dogal kisuah kei ni maw gamlei it vang in, sinthu ih hawmkhial zong in zing hawm khialh ci ni, selung liap pakbang vulte thelbang thokik ding,ih gual in zingvai hong hawm khum ta.

Lungdam
Cin Lian Khai (Zogamkhaino)
Shortspeech Pan Longspeech
Oct 16, 2017
Zomi Khuado, Malaysia