Zomi Innkuan USA tung ah lam-etna lianpi

Zomi Innkuan USA tung ah lam-etna lianpi

Leitung Gaalpi-nihna pen Europe leh Asiagamte’ a thuakpi pen a hi uh hi. Pearl Harbour vai tawh kimeemat in Heroshima leh Nagasaki ah nuclear thautangpi United States in a khiat tak ciang un, Japan gaal maitang hong daizo pan hi. Europe gaalmaitang leuleu ah Nazi te’n France lakhin uh aa, France tawh tuipi haalbek a hi, hunkhatlai-in a minthang vangvang British Empire-phungpi England nangawn’ lakding emsa-in a koih khitsa uh a hihi. Tuakawmkal leh America lampan galhuhna hong paitakciang in, Nazi te’n gaal hong lel uh aa, Leitung Gaalpi nihna a veng hong suak hi.

Tudong mah, leitung ah USA sang-in, galvan ahau-zaw kuamah omnailo hi. Tua mah bang inzong, eitheih ban ciang cileeng, Kuwait bang a hutkhiat uh hi aa, Iraq zong a lumletsa uh a hihi. Gaalvai bek hilo, mihing kihuhna piakkhiatna lam ah zong USA sang-in, a thahaatzaw omlo hi. Pawlkhat bangin, USA pen UN sang-inzong muangzaw uh hi. Muantaak takpi hi. Kawlgamvaai bang UN secretary pa gensang-in, US Secretary Anthony Blinken thugen kingaizaw hi.

Innteek Red Indian a kicite lobuang a vom a kang peemta hi aa, gami khatciat liangko kikimna gam a hihi. Tua hi aa, USA gamite zah in, gam -iit kua mah omlo phialding in kingaih sun hi. USAgam bek iit uh hi lo aa, a pianna akipatna gamtek-uh zong iit in, a kipahpih gammite zong a hi uh hi. USAgammi te lo-in, Israelgam koilam ngamawk ding hiam?

USA ih tunnaak leh a piangtheilo omlo, The American Dream, a kicih zui-in zong, a pianna gamvuah a sepzawh ngeiloh ding uh, nalianpi te zong semkhia zomawk uh hi.

Kawlgam Zogam Zomite inzong USAom mipihte muanna lianpi nei uh hi. Pawlkhat bang in, muang lua kisa in, ZRA te na-ngawn USAgamsung Zomikipawlna te’n utbang in, a peithei ding in, ngaihsun uh hih man-un, mipil kici pipi a buailawh tampi omlai hi.

Khangthak Zomite kipawlna te, Kawlkumpi hong pattah bang-in, “Mikhat thu tawh vai kihawmthei ziau”, cihbang ngaihsutna tawh a kipawl omding in lam-et ding hinawnlo hi.

Khangto a kici te-in, system hoih nei uh aa, tua system sung ah kalsuan uh a hih man-in, ziakaai ngaklahhuai a bat hang-in, sauvei kimang leh tozaw hamtang hi. Zomi te’n zong ih omna gam dung zui-in, vaihawmna khat peuhpeuh ah, Made in the USA, Made in England, Made in Germany, Made in Australia, Made in Japan cihbang in trademark ih suanngam ding’ lunggulh huai hi.

Tunaai Kawlgam thupiangte leh leitung khuahun dung zui-in, gamsung gampua Zomi-tampi te’n GZA, ZIUSA leh ZRA cihbang te ah kinahvawh lo, dangkaa pyakhat zong a piak loh uh hang in, lam-etna lianpi a nei a ommah bang in, Zomi te khantohding a deihlo te zong, a na lausim-dingthu zong a hihi. Happy Independence Day, USA! Nantal’suan