ZIUSA pan Dahna Pulakna: Mangpha Anthony Lian Lam Mang (Fort Worth, TX)

Zomi Innkuan USA
Executive Committee

Dahna Pulakna: Mangpha Anthony Lian Lam Mang
Texas Gamkee, Fort Worth khupi a teng Nu Niang Dim Cing leh, ahong nusiakhin, Zogam Salzang khuami, Manlun beh Pa Thang Gen Tung tapa upa pen, Anthony Lian Lam Mang in May 29, 2015 ni in damlohna hang tawh mual hong liapsan hi. Tg. Lian Lam Mang in ahong nuasiat laitak in kum (18) cingpan a, a nu Nu Niang Dim Cing in asuan mahmah tapa khat ahi hi. Innkuan sung ah muanpen suanpen ding tangvallai khangno khatin hici bangin mual hong liapsan baihlua ahih manin nakpi takin kikhasia a, kidah mahmah hi.

Anthony Lian Lam Mang in mual hong liapsan manin adah akap a om, Nu Niang Dim Cing-te innkuan a kipan, meeltheih tanaute, khuapih tuipihte, pawlpi mipihte leh Zomi Innkuan Fort Worth kipawlna tawh akibang in Zomi Innkuan USA Executive Committee pawlzong ka dah mahmah uhhi.

Anthony Lian Lam Mang tawh hun nunung pen Roman Catholic biakna ngeina tawh June 6, 2015 ni in St. Batholomew Catholic Church ah kibawl ding a hanmual ah kikha ding hi.

Nu Niang Dim Cing-te innkuan pen ZIUSA Genvai Thukhun apom Zomi Innkuan Fort Worth kipawlna Pawlmi Innkuan kician khat ahih manun Zomi Innkuan USA kipawlna in Anthony Lian Lam Mang’ luangphamna/vuina ding Sumtang $10,000 (Dollar Tul Sawm) kipiakhia ding hi. Hih sumte Fort Worth khuapi a om ZIUSA kipawlna Makaite in innteek bangkua tung ah piakhia ding uhhi.

Anthony Lian Lam Mang in mual hong liapsan manin adah akap lungleng khuangai a om a Nu leh a sanggam teng a kipan, laizom u leh nau, nu leh pa, lawm leh gual khempeuh anungta Pasian in hong hehnem henla, adamlai teng cidam takin nisim mabante ah thupha leh thathak tawh a kalsuankik zo dingin hong siamhen ci-in thu ka ngen uhhi.

Dahna tawh;

Executive Committee
Zomi Innkuan USA, Inc.

Tulsa, OK
June 5, 2015