ZIUSA: Khuado Thupuak – 2020

ZIUSA: Khuado Thupuak – 2020

Zomi Chibai! (Dammaw, Zomi), Thuhoih thupha, cidam ludamna leh nopna in Zo ngeina Khuado hun bek hilo in, kum tawn in Zomi mimal khatciat tungah hong tham den ta hen!

Kum, kha, ni leh khuahunte khawllo in a pai ngei in paipai a, i Zo ngeina KHUADO hun hong tungta hi. Pasian bawlsa Zomite in i omna mun leh khua ciat pan in cidam leh lungnuam tak in i ngeina KHUADO a zang thei dingin kong lam-en hi.

2020 kum pen kum lamdang khat in kiciam teh thei hi. Leitung ah a om ngei nailo mihing a min piang khempeuh a buaisak Novel Coronavirus (COVID-19) in i nisim nuntakna, tualsung nuntakna leh gamsung nuntakna tampi kikhek sak hi. Muncih mualcih a om Zomi sung pan in zong hih pul natna hangin dahna kahna leh hamsatna a thuak mi tampi om hi hang. I Zo ngeina KHUADO in tua dahna kahna leh hamsatna a thuak Zomite’ dahna khitui teng hong nulmang sak ding i thu ngetna a hihi.

Zolai simbu sungah “K= Khuado pawi, Kum khen pawi” i cih bangin Zomite’ kum simna zui-in kum lui bei hun hi a, kum thak dawn hun zong a hihi. Zo ngeina KHUADO hun sungin Zomi mimal kim in a beisa kum sung a lawhcin matutna hangin Pasian tungah lungdam ko’h hun hoih in zangin, lawhsapna a omte mangngilhna hun in zang ni. Zomi khat leh khat kikal ah zong lungdam kikohna hun, thupha kibawlna hun leh mawh kimaisakna hun in zang ni.

KHUADO hun pen khuazang bup a “sepkhop hun, pankhop hun” a hihna zui-in Zomi khempeuh in i khua i tui a ding, i gam i lei a ding leh i biak Pasian a dingin khut kilen in mapang khawm ciat ni. “A hat zaw deuh mite kidelh in, a hatlo zaw deuh mite kingak in” i ngeina kepcingna ding leh minam hihna kepcing zawhna dingin nasem khawm ni.

Leitungbup pul natna a hi COVID-19 hangin mipi kikai khawm in KHUADO hun mun tampi ah a kibawl theihloh hangin “KHUADO” i deihna leh khiatna a hi: – “nasep khopna, lungdam koihna, a hoihlo na/thute nawt khiatna leh thak suahna” tawh i minam leh gam a ding ma la in nasem ciat ni.

KHUADO bawlna hangin Zo ngeina leh Zomi, Zogam it semsemna, minam leh gam a ding nasep khop theihna thupha Zomi khempeuh tungah hong tung ta hen! Pu Tual Khan Suan (Executive Director – Zomi Innkuan USA)