Ziding zuthawl ka piakna ~ Lengtong Pauno

Ziding zuthawl ka piakna ~ Lengtong Pauno

Tuni tuhunin gawlphul daikaan a veengte’ kawlkai lei ah hong gilgapsan kazi, haksapi tak maha zuthawl apia kahi hi.

Nulepa omnawnlo tagah, tunlezua tawh holungkumkhawmlo a vaihawm’ pen a baihvetlo thu hi.

Ka sunghte Kalaymyo a teeng ai’hangin, apa’n Vangteh ah sangsia sem ahih manin kalawmnu nulepa Vangteh ah om uh hi. Kei’ ziding kei le kei’ vaihawm ahihmanin, midang sawl tuanlo in, cikmaha kapai ngeilohna khua Vangteh ah, dot le nget leh zuthawlpia dingin Kalaymyo pan Tedim ka paito hi.

Paingeinailohnakhua ah, amahngen dinga angaihmahmahpa paiding himawk ahih manin, ”Ngaihsutciang, sinlung khalah’ng” ci in amah’n zong Tedim hongzui hi. Anitak kimukik in, “Vangteh pen, Saizang kitawn ai’na?” kacih leh alungnuamlo hidi’ ven, ”Keizong, hongzui ning” ci hi.

Ka paikhawm uhi. Vangtehte katheih, ka khua vua Sangsia hong semngei Sia Nang Pum hi a, akhuanawlpan kalawmin, ”Sia Nang Pum te’n tungding nahih leh, hi lampi zui ou, amau bonuaite hi ei” hongci a kaki khen uhi.

Siate innkuanin nuamtakin hong zintun’ bek thamloh, ka vaiding khempeuh hong hawmpih hi. Ka lungdam mahmah hi.

Azingciang nitak nai 2pm pawlin Sia Nang Pum tawh ka sunghdingpa’ behpapi ami muan’ U Tuang Eeng kazawn uhi. Amah’n ka cikhum+bawngnawi te uh pua in, ka sunghding te’n khuamui zulin hong paipih hi. A innkatun’ uh teh, ka lawmnu zong na om ahihmanin, zani a lamtonkhawmnapipen, ”Ah!.. nangcik a pai?” kacihse hiven…haahaa!!!

Video: Lakam tawh kisai Lengtong Pauno ~ Zomi Idol Malaysia 2015

https://www.youtube.com/watch?v=4H9lH9CXNWI

UTuang Eengin, ”Pa Sang, nu Vung amah na mak’pa ciingh uh hi ei’…Pauno, na sunghpa ciingh na sunghnu ciingh hi ei’…” ci meengmeeng, mansak meengmeengziau ei’ leh. Paina vaitenggen, behpapi nih le thum sam uh in, phaitamlam ah va kikum uh. Kei’ adingin bel, Sia Nang Pum vaihawm’siamna tawh, ko’ lampu’pa pen, phaitam meeting ah zong, thuzeekpi’pa mah hilel ahihmanin, vaikhempeuh lema, lungkim takin niangtui dawnkhawmna nei in, vaisiang hong suak hi.

Nuntakpihding: Nungak tangval nulepa damlai te’n apiangtheidingthu ahih nak leh, nute pate hong dampih laimahin, vaihawmhuaihi, cih ki deihsakthu akigen hihangh.

Ka lungdam, Munkhai’pa