“Zeisu” nakua ahihiam?

“Zeisu” nakua ahihiam?

Pasian’ tapa Zeisu khazih pen gumpa leh honpa-a san’dan namnih:

1) Gumpa, honpa leh hong tankhiapa-a san’na:

Gumpa, honpa leh tanpa cihte pen a kibang pian vive hi a, ki lamdan’na lianpi omlo hi. Zeisu pen gumpa ahih kei leh, honpa leh tanpa in sanguh ahih manin, Dawimangpa khut sungpan ki gumkhia khinzo, ki honkhia khinzo, ki tankhia khinzo hi.

Sisan’ sawpsian’na ngahin Zeisu gumpa leh honpa in sang ihih manin, suahtakna ngah in ipiangthak hi. Kha Siangtho’ ciamtehna zong ngah hi. Vangam tung thei ding hi.

Ahih hangin Zeisu pen Topa in na sang khalo uh ahih manin, Topa neilo pah uh hi. Kihtak ding, zahtak ding, boss ding omlo in phengtat nuam uh a, a Tapidaw nuntakna (Christianity life) hoih zolo uh hi. Lai Siangtho in, “Alui nate kikhelin a thak a piangzo hi” ci napi’n amaute thakzolo in, nung tolhin nee kik zel, dawn kik zel, sem kik zel, kilam dan’na nei zolo uhhi.

Tua bek hilo-in, Topa neilo uh ahih manin, Dawimangpa leh Khanin te’n zong kihta lo in, simmawh in bawlsia gawp thei lai hi. A nuntakna ah etteh tak ding limpha omlo hi. Pasian min than’na ding bangmah omlo hi.

2) Gumpa leh Topa-a san’zia:

Zeisu pen gumpa bek hilo in, Topa in zong sang hi. Zeisu pen honpa leh tanpa bek hilo in, Topa in zong sang ahih manin phengtat ngamlo uh hi. A Topa it in zahtak in a thu mang uhhi. Tua ahih manin, a Tapidaw nuntakna (Christianity life) zong hoih hi. Topa nei mawk uh ahih manin, Dawimangpa leh a pawl ten zong simmawh ngamlo pah uhhi. Topa nei mawk ahih manin, kuaman bawlsia ngamlo uhhi.

Sanggam,”Zeisu pen nakua ahihiam?” Na kam pa’n na genkhiat kammal tungah vangliatna om hi. Tua ahih manin, Zeisu khazih pen na gumpa leh na Topa in na hihsak tektek dingin Topa Zeisu min tawh kong hanthawn nuam hi. Topa’n minthan’na ngah tawntung ta hen! Amen.

Author: Rev. Thang Do Khen (Pasotor, ZCF; Canaan Church)
Edited: Dal Sian Hung