ZCD akum 31 cinna Khawmpi Report panin ngaihsutna tamlo kupna

ZCD akum 31 cinna Khawmpi Report panin ngaihsutna tamlo kupna

ZCD a kum 31 cin’ khit October 23, 2019 ni Cope Centennial Jubillee Hall, Tedim ah ZCD khawmpi leh tan 10 All D ngahte pahtawina pawi kibawl hi. Hih hun ah minam itna lian mahmah lai cih kimu hi cih ngiau pen bang tawh minam itna teh i hi hiam? Delegates a sapte uh a paite a muhna pan uh maw? Cik hun in minam itna kiam ngei hiam? Party leh minam min zang a kipawlna tuamtuamte in a minam itna uh kiamsak leh liatsak hun a neih kei buang uh leh cikmah hun in mipite in minam a itna uh kikheel ngei loin lian den hi.

“Zomi movement thanem deksuai nai lo hi cih ka mukhia hi,” i cih miau leh movement koi ciang tungin koi ci kalsuan a, mipi ten bang lametna hoih a neih ding sepkhiat khitsa leh muh leh lah thei ding om hiam? Movement a thanem deksuai kei leh ngaihsutna kibat lohna neite minam leh makai langpang ci-in pum ngawh khawlsan hun ta hi. Minam movement thanemsakna ding deihna ngaihsutna neute kampau hi. Innkuan sung gentak loh a lukhawm den nupate ngaihsutna nangawn kikhat den lo ahih manin minam khat i ngaihsutna kibang den lo cih i phawk hun mahmah ta hi. Ngaihsutna kibat loh man in minam langpang a kingawh pah khawlsan hun mahmah ta hi.

“Khua 76 pan in delegate 859 pai hi. A kisam zah sangin tam pai zaw a, a painuam a pai kha/zo lo zong tam mahmah hi. A utpeuh pai ding kici hi leh Tedim khuapi vukcip zo ding hi” cih bang version om hi.

Delegates kici pen a khiatna “a person sent or authorized to represent others, in particular an elected representative sent to a conference” a cihna hi. Tua ahih leh delegates i cihte khua 76 in amau sik leh tanga palai dingin cik in thuneihna pia in, cik hun in a teelcing uh hi mawk hiam? Delegates cih kammal zang khin napi hangin bang hangin a kisam zah sangin a tam zaw hong pai hi ci thei mawk i hi hiam? I delegates sapte a kuate hi diak se a, a kisam zah leh kisam lo zah khawng om sak thei mawk i hi hiam?

Khua 76 panin delegates 859 tak a phak mawk leh khua mipite delegates bangci kiseh/kiteel a, koici teel uh hi ding? A kilawmsakna dingin thu ngai khia ding bekin i sapte peuh DELEGATES hi a ci suk miau hi zaw leng kilawm hong hi. Delegates i sapte in khua mite kisapna leh haksatna a neih uh hun a genna dingun minute 1panin minutes nga beek i pia hiam? Amau bang teng hong gen uh a, thu bang teng kikumkhawm??? (A kim sipsip hi loin minam party khat i cih leh mipite rheih dinga kilawm tam lo beek report khahkhiat pahpah dingin kilawm buang hi). Israel in gam a ngah ma in Zionist Movement tuamtuam om ten mipite kiangah thu imcipcip loin seelsim den lo uh hi.

“ZBCA leh ZBCM makaite zong thupi ka sa mahmah hi. Vai tampi nusia in US pek pan a hong pai vingveng uh hi mawk ahih manin zahtakhuai kasa hi,” cih bang thu om hi. ZBCA leh ZBCM makaite zong ZCD kahiang (branch) dan maw? Ahih kei leh ZCD lobbyists teng hi zaw ahih manin zahtakhuai diak se uh ai tam?

“Zogam ah All D ngahte pahtawina amau mahmah in hong piak ngiat uh pen thupi ka sa hi,” i ci hi. Sangnaupang lawhcingte pahtawina piak pen thupi mah a, a lawhsamte zong thapiak ding thupi zaw kan lai hi. A lawhcing sangin a lawhsam tam zaw den ahih manin a lawhcingte bek phawkin pahtawina piak tawh i khawlsan a, a lawhsamte thapiakna i neih kei a, maban ah lawhcin’na amau zong hong ngah theihna dingun pan i lak kei leh maban mial ding tampi om hi. Education Minister kinei buang ahih manin amah mah in pahtawina piak dingte, thapiak dinga kisamte, sanginn puahphat dinga kisamte, a kisap behna munte ah sanginn bawl leh lam beh dingte ah ama term bei ma-in nasia takin pan hong lak ding pen mipite lunggulh leh lametna hi a, ama liangko tunga kinga tavuan lianpen leh thupi masa pen ahi hi.

October 22 ni in ZCD pan CEC member 14 ten Tedim Guest House ah ZCD maban ding deih takin a kikupna uh pan un:

• – Constitution etphatna leh puahphatna nei ding in tua pen 2020 kum February kha a kipsak ding.
• – Tua thukhun zui in National Committee (NC) or Central Committee (CC) member mi 45 tawh kiphuankhia ding.
• – Tua mi 45 ten CEC puahpha ding
• – Thukhun tawh kituak in MP candidate ding telkhia ding
• – 2020 kum Zomi Nam Ni tawh kituak in ZCD Youth Conference Tedim ah thupi takin bawl ding

cih ahi hi.

Minam min tawh a ding party i cihcih leh delegates a sam ding veve bang hangin ZCD pan CEC member 14 bekin Constitution enphatna leh puahphatna ding gen in kipsakna nei se in, delegates i sapte ngaihsutna ngaihkhiatna tawm bek nei lo i hi tam? Kum 31 a upa minam party khat buangin tu dong Constitution kician leh kipsak nei nai loin February 2020 ciangin thukhun zui in National Committee (NC) or Central Committee (CC) member mi 45 tawh kiphuankhia dingte kipsak pan? Tua ahih kei a beisa hun in MP tuh dingte Constitution kician om loin angvantuam leh deihsaktuam teng bek nepotism policy tawh i teel leh candidature seat i piak ai tam?

US politics dan in MP tuh dingte in term khat sung adingin a vision neihte uh leh sep dingin a ngimte uh mipite mai-ah genna kamciamna tawh MP tuh nuam tengin genna nei uh hen a, mipite ngaihsutna la masa in National Committee (NC) or Central Committee (CC) member mi 45 in scrutiny bawl pan le-uh hoih pen leh siangtho pen in kimu pailet (transparent) dingin uphuai hi (online panin amau political manifesto neihte gen le-uh baih pen ding). Bang hang hiam cih leh political ideology kibang nei pawl khatte kihon pawlna party mawkmawk hi loin minam party a cici i hi hi.

National Committee (NC) or Central Committee (CC) member mi 45 cih kammal i zat a “NATIONAL OR CENTRAL” cih kammal i zat leh “minam bup leh mipi bup i a laizang” huamkha ahih manin hih party vai tawh ah leitung bup Zomi khatpeuh in ama muhna leh ngaihsutna tawmkhat a gen khak ciangin sih zakdah pahpah in, ciltang mek khaksak leh tangtel sihtan bat det keei manlang takin tawpsan in, “No India, no gamdang a omte kicinlah leh kitaklah khakna ding om kei, no tawh kisai kha lo hi” cih kammal zat tu ni a kipanin khawlsan hun ta hi. Tua loin minam min leh NATIONAL cih kammal pen manlang takin laihhuai hi. Zomi minam bup i huam khat party i hih takpi leh leitung bup a om Zomi kuamah ngaihsutna nawlkhin thei lo ding cihna hi.

“Mipi in Zomi party it mahmah in lamen mahmah hi. Mipi’ muanna ngah mahmah lai hi cih ka mukhia hi,” i cih leh mipite muan bangin bang teng mipite lametna leh lunggulhna bang teng kum 31 sungin semkhia khin zo ta i hi hiam? Lamet mahmah leh muanna ngah lai mahmah i kicih leh hong muangte adingin bang teng semkhia khin a, hong muanglahte adingin bangci panlak sawm i hi hiam?

Kum 31 a upa party pen mihing nuntakna khang kimkhat bang hi mawk ahih manin sep ding bekbek leh maban adingin geelna leh saupi adingin muhna hoih nono (vision) gengen hun hi nawn loin muhtheih dingin party kiphuankhiat cil in i party vision neihte gamtatna (action) tawh lahkhiat hun hi ta a, gam leh minam sungah kikheelna leh khantohna muhtheih ding sepkhiat hun hi ta hi. A gengen i hahkat zah in sepkhiatna tawh lah ding zong i hakat zawk sem hun mahmah khin zo hi.

Martin Luther Jr. in,

• “Na len’theih kei leh tai in,
• Na tai theih kei leh khe pai in,
• Na pai theih kei leh bokvak in,
• A babgbang ahi zongin
• na hihna khatpeuh ah na mainawt ding ahi hi,”
• ci-in a gen panin tha la-in kingaihsun pha kik ni.

Laigelh: Tg. Khup Zo Mang (M.Div.-MIT & MBA-India)