ZBCA (Zomi Baptist Churches of America) kamuhna
ZBCA Kiphuatna
ZBCA (Zomi Baptist Churches of America) pen 2012 kum October 21 ni in Rev. Kap Khan Mang (ZBCM of Tulsa), Dr. Tun Cin Kap (Zomi American Community Church, Pensacola, FL), Rev. Pau Khan Lian (Agape Mission Church, Nashville, TN), leh Rev. Tual Khaw Mang (Zomi Community Church, Denver, CO) te’n Nashville khuapi ah ana phuat khiat uh ahi hi. Akiphuat zawh kum 6 ahi tukum (2018 kum) ciang in pawlpi 39 te’ kipawlna hong suakta a hong thahat mahmah ta hi.
ZBCA Katheih Ciilna
2015 kum June/July kha Zogam guahtui tamna leh mencipna vai tawh dong tuak in ih om laitak in ZBCA in Zogam dongtuakte $ 40,000/- tawh huh ding cih kazak ciang in thupi kasa sim khinkhian peuhmah hi.
Kawlgam a om Zomite’ sungpan tan 10 laivuana ah All-D angahte kawlgam sum teng 10 apiak lam uh zong kazak ciang in thupi kasa semsem hi.
Keizong Hong Huam
ZIUSA te’ thusiamna tawh US kapaiciil kum ahi 2016 kum in Pasian’ thu gen in kazin kavakna khempeuh ZBCA sung vive hi a ZBCA makai khat ahi Rev. Tual Khaw Mang in hong gelsak ahi hi. Siapa’ tung leh ZBCA te’ tung ah genzawhloh lungdamna kanei gige hi.
Lungdamna Kibehlap
Tukum A (6) Veina ZBCA Khawmpi ah Zomi MP te tawh akibang in Zinmang khat in makaite’n hong sang sawnsawn ahih man in lungdamna suutlo in a omthei nawnlo kahih man in hih thute hong suut kahi hi.
Tutung Khawmpi
Tutung khawmpi pen A (6) Veina hita a, Kentucky State a Zomite’ tampenna ahi Bowling Green ah July 20 – 22 kikal sung kibawl hi. Lengla bekbek zong 1200 vai kipha hi. Zin khempeuh Hotel ah hong tungsak zihziah uh ahih man in nop cihtak in nuam hi.
Nitak sial in phatna leh biakpiakna nasia tak in kibawl ziahziah ahih man in nuam ngiat hi. BWA (Baptist World Alliance) pan in GS pu Rev. Dr. Elijah Brown in nitak sial in hanthotna hong nei den a Rev. Pau Khan Khai in kamlet den hi. Kamletpa’ gen pen zaknop zawphial lai ahih man in tha kingah mahmah hi.
Kipat ciilni nitak in America ah biakna pawlpi nam 40, pawlmi million 120 val te’ kipawlna ahi Christian Church Togather (CCT – USA) ah Director ahi Rev. Carlos in zong thugenna hong nei hi.
Meeting Thupi
July 21 ni in Khawmpi Delegate Meeting zingsang nai 8:00 pan nitak nai 5:00 dong thupi tak in nei uh a delegate mi 127 tak kah uh hi. Tua mun pan in akhentat uh thupi kasak mahmah pawlkhat:
1. All-D ngah te teng 10 ta pialai ding. (Piaksa 17 phakhin in tukum mi 3 pia ding. Tua hi leh mi 20 in angah khin hiding)
2. Kawlpi ah Zomi Education Center ading leitang Acre 3 teng 400 in kilei khin. Tualai ah building lamna ding tukum beima in ZBCA in $ 100,000/- vaihawm ding
3. 2019 kum November khabei lam teh Kawlpi ah ZCLS tawh kikop in Zomi pastor 1000 kaikhawm ding in kimuh khopna nei ding. Sun sung pastor te’n holimna nei ding. Zan ciang in mipi tul tampite leh pastorte’ mai ah gam makai te’n thugenna nei ding. Tua a ding in budget $ 12,000/- koih ding.
4. Zomite lailam khantohna ding in LST nipi ni a sumpi peuhmah ZCLS pia ding. 2017 kum in zong teng 64 pia khin.
5. Mai kum a kipan Youth Conference leh Women Conference zong neita ding. Khangno lasiamte CD/DVD bawlsak ding
6. ZBCA in Zumpi Inn neih zawhna ding hanciam ding
7. ZBCA ah GS asem peuhmah khasum piata ding
cihte khawng ban ah vai thupi tampi gel uh hi. Hihte khempeuh kipawl khopna om kei leh apiang ding khat zong omlo hi. Tua ahih man in kipawl khopna thupi mahmah hi. Zomi te kipawl khawm thei hileng bangzah ta in ki thahat ding cih kician tak in hong lak hi.
ZBCA Kamuhna
1. Mapai sa mahmah ing.
– Kum 6 sung in pawlpi 39 bang hong kipawl theih uh pen nakpi tak in lungdam huai kasa hi. Hih kipawlna in ih minam nakpi tak in hong kem ding hi. Hih kipawlna sung a om khangno leh khangthakte mangthang hak tuam mahmah ding uh hi. Ih zia leh ih tongte hong theituam ding uh hi. Amau leh amau hong ki mumu le uh hong kingai lel ding uh hi.
– Kum 6 sung in BWA leh CCT – USA ah lutzo cih pen Pasian’ Khutma taktak ahi hi. Minampi ih suahtheihna ding kalpi khat ZBCA in hong suanpih ahi hi.
2. Phatna Leh Biakpiakna Thupi Sa Ing
– Khangno te’n akineih uh himawk lo in alungsim takpi uh tawh Pasian phat in adian ziahziah uh kamuh teh ka khitui hong tak keuhkeuh hi. “Kei hong pahtawite ken zong pahtawi ning” aciPa nakpi tak in ih pahtawi mahmah lungdam huai sapen ing.
3. Picinna Piangsak
– A meeting tutdan, athu kikup dante khawng uh ka et ciang in picin vai kasa mahmah hi. Apicinglote zong hih lak ah kihelhel le uh picing pah lel ding hi. Hih ZBCA sung ah akihelkhate pen akihellote sang in peello hampha zaw ding hi cih kagen ngam mahmah hi.
– Youth Conference khawng ciang in zong Talent Show khawng bawlsak in Zopau mahmah tawh kam kituhna (Debate) khawng nasia tak in bawlsak leng khantohna hong tam mahmah ding hi.
4. Partnership vai thupi sa ing
– BWA leh CCT-USA te ah member lut ban ah Pawlpi 677 apha Baptist Churches of Mizoram, Pawlpi 19 apha ZBC – Mizoram, leh Agape Mission Church, Brisbane, Australia te tawh kizom ding cihte pawl zong lungdam huai sa mahmah ing.
5. ZIUSA Galbawl Lo
– ZBCA in ZIUSA thupitna tel mahmah ahih man in ZIUSA galbawl hetlo in ZIUSA Khawmpi awn ngiat in tua khawmpi tawh akituak lo in ZBCA Khawmpi abawl ngiat zong thupi in picin vai kasa mahmah hi.
2020 Ciang
BWA ah GS asem Elijah Brown in 2020 kum Brazil a kibawl ding BWA khawmpi ah Zomi 200 peuhmah hong kihel un acihna zui in kihel zo takpi ding in ka um hi.
BWA pawi siim ding in Boing 747 or 777 dim Zomite pai in ka um hi. Tua vanlengpi pen Zodial tawh kituam in ka um hi.
Bralzil BWA khawmpi ah Zomite guatah lam in hong lam in leitung a media minthangte ah hong suak zuahzuah in um ing.
Tuani ciang in Zomi a hong bawl Pasian’ tung ah lungdamna luankhite luang keuhkeuh in um ing. Kei zong tua Brazil khawmpi ah kihel nuam ing. Kihel sawm ing. Kihelkha ding in zong ki um ing.
Registration bawlna ding $ 300/ asawtlo in khiazo ding in ki um ing. Lamsap dingte zong Pasian in hong sik mahmah ding in um ing.
ZBCA hong cidam in. Aki thehthang Zomite na khanuai ah hong seel in hong hum in. Hong daupai ngiat inla Pasian in aziatlam khut tawh hong makaih ngait hen. Amen. Note’ Itna Sung Ah (Mung Laan Thang) Tawmvei USA
Comment piaknop aomleh...