Zanni December pan Mai Kum ah

Zanni December pan Mai Kum ah

Zanni December 31 a beisa Kum pan Kum thak ah
Eite’ nungah ong cing Pa le eite’ mai ah a pai Pa Israel Pasian (Isa. 52: 12)

Thumasa
Pasian in a beisa thu zong ong kal hi. Mailam ah ih bawl ding hoihna in a beisa mawhna hemkhia thei lo hi. Guilt for past sin cannot be removed by future law-keeping. Mawhnei ih hihna pen a beisa, tuhun le zingciang hun in hong man khin hi. Tua ahih manin Hotkhiatna bucing ih cih pen abeisa mawhna, tulaitak mawhna le hong tung ding ih mawhna pan hotkhiatna ahi hi. Salvation is from the Past, the Present and from the future. Mi khat in ut ta kei leh hih mawhna a pumpi tung pan singkhia thei lo hi. A person cannot shake sin off; He cannot reject sin. Mawhna ih nolh thei kei a, mimawh ka hi kei hi, ci-a ih nial theih nawn lohna pen Jesuh Khrih ih kisapna thu ahi hi. 1 John 1: 10na ah “Mawhnei ka hi kei ih cih leh Pasian zuauphuak Pa a tang sak ih hi a, eite’ sungah thumaan thutak om lo hi,” na ci hi. Rom. 3: 4na ah “Mikhempeuh in zuau a gen zongin Pasian in thumaan gen veve ding hi,” na ci hi.

1. Zanni tak Pan Khamuanna (Security from Yesterday)
Thukhen ding Pasian in abeisa mawhna kisam sak hi. Kum hong bei ciangin Pasian in ih mailam ah hong koih sak thuphate lawp takin hong masuan sak ciat uh hi. Ahi zongin tua lawpna ahong nawngkai sak khat om a, tua pen ih zannitak thu phawk kikna ahi hi. Tulaitak-a ih ngah Pasian’ ong piak hehpihna thupha pen zannitak hun a ih bawl mawhna in hong nawngkai sak pahpah hi. Ahi zongin thu-um mite adingin Pasian pen ih zannitak pan hong honkhia Pasian ahi hi. Tua ahih manin Pasian in ih mawhnate a phawk kik zel thei dingin hong koih lai hi. Banghang hiam cih leh tua ih mawhna hanga ih khamuan loh zelzelna in ih mailam hun adingin bawlkholhna le kipuahphatna hong nei thei sak hi. Kilamthakna hong nei thei sak hi. Hi kisak luat pahpahna om lo sak hi. Abeisa thute pan mailam adingin kipuahphatna om tawntung hi. Tua ahih manin Pasian in nang le kei a beisa thu le ih zannitak thu a mangngilh nai lo dingin hong koih lai phot hi. Tua hi kei leh mawhna kimaisak khinte ih hih hangin nang le kei’ khamuanna pen hong kuacik lua kha ding hi. Zannitak pen Topa ih kisapna hong phawk sak zel pen hi. Ahi zongin tua zannitak in Topa tawh hong kinai sak zaw hi ci-a mawhna bawl ding hi lo hi. Ih nisim nuntakna ah zannitak mawhna pan suahtak nading thu nget zelzel kul hi.

2. Zingciang Ading Khamuanna (Security for To-morrow)
Pasian pen thu-ummi eite’ mai ah a na pai khol Pa ahi hi. Nang le kei zingciang ah ih om khol thei kei a, Pasian ahih leh zingciang adingin zong a na om khol khin thei Pa ahi hi. Eite’ mai ah ih Topa na pai khin hi. Zingciang ah ih bawl khak ding mawhna pan in zong ih Topa in hong tankhia khin ahihna pen a lamdang Pasian’ ong hehpihna bucing taktak ahi hi. Amah in eite hong cing hong kem khol lo hi leh eite khempeuh hong kivalh tum mang khin ding hi. Pasian’ khut in abeisa hun sawk kik a, tua tawh eite lungsim hong siansuah hi. Zingciang ading khamuanna pen abeisa mawhna pan khamuan nadingin Jesuh’ min suangin thu nget zelzelna tawh hong kizom toto ahi hi. Zing ciang mawhna pan suahtak nading thunget pahpah kul hi.

3. Tuni Ading Khamuanna (Security for To-day)
Tuni adingin kinawhsa in buai liang, dipkua liangin gal tai kul lo hi. Hong tung ding kum thak ah ih lut ciangin lawp luat ding hi lo hi. A beisa zannitak hangin lungkuai luat kul lo hi. Tulaitak hun thupi pen ih ci tei ta zongin kidopna mel nei loin cycle khawng mawtaw khawng nawh hawl gawp ding hi lo hi. Zanni tak (or abeisa) hun ah ih mawhnate phawk lo lianga kitha ngah sak luat ding zong hi lo a, ngaihsutna mel nei lo pi-in a patau a diipkua gawpte ih bat het loh ding pen ih Lai Siangtho mun in hong hilh nop thu ahi hi. Israel Pasian eite’ mai ah pai ahih manin eite in zong lungduaitak le cangkang takin humpinelkai bangin khamuang lungmuang lau het loin ih tulaitak hun ah a om hithiat thei Zomi te ih hih ding Topa’n deih hi.

Ih zannitak thu pen a kila kik thei lo, a ki-phop kik thei lo thu ahi hi. Tui buasa kiluak kik thei lo hi. A vangsa kihu kik thei beka ahi zongin vang khin hi. Abeisa hun ah ih ngah hamphatna (opportunities) te a mansuah khin ih hi a, kila kik, kileh kik thei lo hi, cih pen ih theih sa ciat ahi hi. Mawhnei sa khat mawh nei lo kik cih bang om thei lo hi. Mithat khat mithat lo cih bang om thei lo hi. A om kik thei pen mawhna kimai sak thei cih thu ahi hi. Tua ahi manin Martin Luther in “We are simultaneously righteous and sinners” na ci hi. Eite pen mawhna hong kimai sak mimawhte ih hi hi. We are forgiven sinners. Ahi zongin Pasian in ih mailam adingin tulaitakin a kisia sa ih lungsim patauhna khempeuh a kilam kik thei ngaihsutna le upna ah ong khel ong laih kik sak thei hi. Tua ahi manin Tulaitak Christian te in abeisa thu ihmu sak lel ni. Ahi zongin Khrih angsung bekah ihmu sak ding hi hang. A kileh kik thei nawn lo a siasa nate khempeuh Khrih khut sungah nusia ni. A kinial thei lo hong tung ding zingciang ah Amah tawh kalsuan khawm zaw ni.

Thukhupna
Tulaitak, Den, Tuzaan, Zanitaak, Zanhal, Nung Nipi, Nung Kha, Nung Kum => Abeisa 2013 kum phawkna hanga lunghianna (doubt) hangin kipuahphatna le thungetna piang hi. Lunghianna pen gupngah kitel lohna hipahpah lo a, gup ngah kiciatna thu khat hi zaw hi. Lunghianna pen ih nisim mawh khak khialh khak zelzelna hang ahi hi. Abeisa ih kampau ih sep khialh ih bawl khialh mawhnate ki-et kikna mel nei loin kilungmuan kikhamuan sak gawpna zong pianthakna, gup ngah kiciatna hi tuan lo hi. Ki-en kik kicheck up zelzel a nisim mawhna hanga thumin thu ih nget zelzel a kul lai ahi hi.

Gupna tan kik cih thu a gen ih hi kei a, thungetna leh kipuahphatna tawh gupna kician sak semsem, khamuang semsem cih nopna hi zaw hi. “To make your calling and election sure, …” 2Peter 1: 10. Abeisa ih mawhnate pan thungetna tawh kipuahphat zelzelna in khamuanna piang sak semsem hi. Tatkhiatna pen kithalawh thei lo a, ahi zongin khamuanna cih khat pen a kithalawh thei ding khatin na om se hi. God is dealing with doubt so that a man will turn from his sin and make sure himself and bear good fruit.

Evan. Suang Dal