Zankhang kimin kah tamlawhna ~ Sia Do Khup

Zankhang kimin kah tamlawhna ~ Sia Do Khup

Zingsang nai 2:00AM in ka khanglo a, ka ihmu thei nawn mahmah kei hi. I minam sunga a piang i tuahkhak thute ka lungngaingai hi. ZOMITE KI-ITNA TUIZAWL KOISAN (KOI LAI) PANIN KEH AHI HIAM? 2 SAMUEL NIHNA 12:10 TDB

10 Tua ahih ciangin tu-in nangmah in kei hong simmawhin Hit mi Uriah’ zi nangma zi dingin la khin na hih manin na inn sungah namsau tawh kidona veng ngei lo ding hi,’ ci hi.

Minam khat unau khat kilem thei mahmah lo a i om zawzen nadingin i pute kua khang panin hih samsiatna hong tung ahi tam? namdangte tawh buai loin ei leh ei biakna ah gamvai (politics) ah i buai niloh pen David innsung buaina tawh kibang hi. “Topa aw keima mawhna ahi kha hiam? hong sit in” ci-in thu ka ngen hi.

A KI-IT LO MINAM IHI KHA HIAM?

I minam sungah kei kihel khakna ciang tawh kong gen nuam hi. 2015 kumin mencim tuikhang gal i tuak a, ki-itna lakin sum leh paii, tha leh ngal tawh i kihuh ziahziah a, i ki-it lam i mu thei hi. Covid 19 pulnatna hong om a kum nih sung vilvel sum leh paii, tha leh ngal tawh i kihuh a, i ki-it mahmah hi. Tua ahih manin a ki-it lo minam ihi het kei hi.

A KIPAWL THEILO, A KIHUA MINAM IHI KHA HIAM?

Lungdamna thugenin Zomite tenna mun leh gam tampi ka pha kawikawi hi. Lungdamna thu za nuamin inn kotkhak liangin khuazang bupin hong kikhawm zel uh hi. Pawlpi namkim pan ahi hi. Biakinn khat sungah kipawl khawm a biakpiakna nuam a sa mahmah minam ihi pha ngel hi.

Ten nading inn nei pak lo ka hih manin kum 8 sung vilvel inn sap lo loin inn nuam mahmah ah hong om sak Pa Go Khen pen SDA pawlpi mi ahi hi. Movie hoih ka bawl zawh nading Europe gam sung leh Vitican belbang ka vel theih nadingin RC pawlpi mi ten hong huh uh hi. Tu a ka tenna innhuang lianpi hong pia, Pa Khup Suan Gin pen EBC ahi hi. Tuni dong ka innkuan ading leh Khitui Gospel adingin ma hong pangte Zomi sunga Christian pawlpi namkim kihel hi. Tua ahih leh a kipawl thei, kihua loin a ki-it mahmah minam ihi hi.

I TUIZAWL KILAWI, KISONGSAWLAWI ZEL HI

Nidangin i pu i pa ten PVC pipe khawng neilo uh ahih manin gua kiphelkhap ahih kei leh taak dawng kisui kuak peuh tuizawlin zang uh hi. Tuibul panin tuate khat bek inntual hong tung zolo ahih manin khat tungah khat ki-nga dimdiamin tui hong luang a, innka mong a om kuangzawn (tuikuang) hong tung hi.

Tua tuizawl kithuap dimdiamte bawng, lawi, sakol ten pal kha-in kilawi thei a, khat tungah khat kithuap nawnlo ahih manin tua mun panin tui keh (bua) hi. Kuangzawn ah tui om nawnlo ahih manin khangkhamin kitam a, tui a luan kik hangin zong keh ta ahih manin mipi zat ding tui kikhol (kicing) thei nawn lo hi.

Zomite ki-itna tui siang mahmah a, zong kikem kihuai nuam mahmah uh hi. Ahih hangin tuiluan bangin a luang mipite zuih tuizawl ahi, makaite kilemlo kisongsawlawi zel ihih manin i tuikuang keu-in keh a, mipi tampitak kikholna tuikuang, pawlpi, kipawlna gina om zoloin tuikuang nuai buan lakah manawhna kician om loin ei san ciatah i luang ciat hi. Buan tawh kisawh ta ahih manin zat theih melloh tui nin i suak a, mi’ khebuan siakna i suak ta hi.

MAKAI 2VEI SEM KHA NGEI SAM

Ka khua uh kisat zawh kum 100 a cin ciangin Kansau kipawlna cih khat ka nei uh a, President sem masa dingin hong hah tel uh hi. Kum nih term khat ka sep sungin USA, Australia, Malaysia a om ka khuapihte kiangah pai-in huhna ka ngen a, ka khua uh lutna Sihpilui siklei Topa in hong zawhpih hi.

Lei hon pawi ka bawl uh ciangin term cing nailo mahin tawp ding ka ngen hi. Kipawlna makai ten hong kho ciat uh a, ka Pu Neng Za Suan bangin “Do Khup mipi in hih zah a hong ngai lai hiven, sih pah lao nang aih kei nak leh sem lai lel ve” hong ci hi. “Hilo hi, makai kikhel diamdiam ding hihang tua hileh khang to zaw ding” ka ci a, ka tawp teitei hi.

Tutung Covid 19 dongtuahna hong om ciangin kei tang a President sem ka naute Rev. Go Mun Thang in Ks.5,000,000 (Tengh 50) khua adingin hong piakhia pah ahih manin kei ka khawl baih pen ka khua uh a met zawkna ka mu thei pah hi.

ZOMI EVANGELISTS CONFERENCE

Zomi Evangelist teng kipawlna khat neih ding kilunggulh ahih manin tutung a mah bangin fund ka zong a ihmut hun tawm mahmah hi. Note mah ii piakkhiatna hangin Topa in hong lawhcingsak hi. Pawipi a man ciangin Secretary ka hihna pan tawp ding ka ngen a, ka lawm ten hong phal lo lua kisain “Nang ma vaihawm hiven, makai nasep nop kei leh hih kipawlna phiat lel ni ei” hong ci uh hi. Makai pen kikhelh diamdiam ding hoih sa ka hih manin “Kei tawp man a phiat kul ahih leh phiat mah ni ei” ka ci pah hi. (A kiphiat loh ding lamtak thei gige hiveng) Kei ka makaih nawnloh hangin hih kipawlna kipin lawhcing to semsem hi.

Kipawlna khat peuhpeuh ah makai kikhel diamdiam leng Zomi sungah pattah sa makai siam tampi om thei pan ding hang a, makai khat hong sih hangin paktawng nawn lo ding hihang, cih pen keima mimal muhna leh ka nuntakna ah zong ka zat takpi thu ahi hi.

BANG SAMSIATNA TUAK IHI ZAWZEN TAM?

A tung a i gen sa thu khempeuh i et ciangin a kipawl nuam, a piakhia nuam mahmah mipi i neih lam i mu khin ta hi. Tui bangin a siang hih mipite luan nading tuizawl ahi makaite kisongsawlawi mawk ihih manin mipite amkham uh hi. Biakna makaite in hong lungngai pha kik unla, gam makaite, kipawlna tuamtuam a makaite in zong hong lungngai pha kik un, I minam pen mite lamtang gamlumna lel ding, mi’ kam uih thoihna lel ding, mi’ nehpik lel dingin i phal ngam ding hiam? Veina lainatna tawh; Evan. Langh Do Khup (Khuata mipa)