ZAM Thupuak :: 13 July 2014

ZAM Thupuak
ZAM :: Zomi Association of Malaysia

Zomi (430) Bang Sang Akahna
Jenks Public Schools (USA) Pan ZEC (Malaysia) Hawhta

Tulsa Khuapi sung aa teng Zomi naupangte ii pilna sinna Jenks Public Schools (JPS) Sangte-ah, High School (Tan 9-12) Sang naupangte Manglai a hilh Sianu Mrs. Pamella Garvin pen, Malaysia aa Zomi naupangte tawlngak hun omlo-in kum (7) sung a pantah khin Zomi Education Center (ZEC) a vaan dingin July 9, 2014 ni-in Malaysia tungta hi.
2013 lai pekpan hanciamna kinei toto hi aa, ei lampan ki thalawp ngaklah mahmah hita leh 2014 sungin hong piangthei pan ahihi. Hun saulo sungkhat ahih hangin sum tampi a beiding khualzinna leh a nek le dawn vai khempeuh JPS in sikding cih thukimna March 26, 2014 ni-in kipsak zo pan uhhi. Tuazawh a sawtlo-in mipi muh dingin zong facebook pan tangko pah uhhi. Zomi te vaan ding pen, amau Siate khat le khat zong ki lungdampih mahmah uhhi. (Ka principal nu bangin hong lungdampih-haza liangin amah zong painuam mahmah, ci hi.)

Mrs. Pamella Garvin ii thu atomin
USA gamah Sang Sia septheihna ding license tawi hamtang kul; License tawi zawhna ding ciang pilna sinna pen Master ciang kahte bang bekin mun kician ah Sia semkha bek uhhi. Sianu pen Manglai hilhna lamah Bachelor khitteh Master zosa khat hi-in, a pasal engineer khat leh a tate tawh innkuan nuam nei khat ahihi. Kum (16) val bang lai hilh khin hi. (Deihsakna aneih zia zong tuciang kum khat val kizopna sungah tel muh sinsen ing. Hih ZEC hawhna ding vai bekbek, omna kibatloh tawh e-mail zang aa ki thuzakna-ah kum khat val, nipi kaal sim phial mah Zomi te aa ding ahun pia ngam, pia zo mahmah mawk hi!)

Jenks Public Schools leh Zomi Sang naupangte thu atomin
1908 kumpan aa kipan ahi Jenks Public Schools ah Tan Lang pan Tan 12 kikal Sang naupang kigawm tul sawm (10,000) val pha hi. Sang Sia vekpi kigawm 529 pha hi. 2009 kumin a (100) veina graduation ah Senior (Tan 12) bekbek (715) in Sang zawhna laipi leh lukhu nelkai ngahthei uhhi. Thukhun tawh ki makaih siamna leh lai sinzia, a laisinte mahmahah a minthang Sang khat ahihi. A beisa Laisin kum 2013-2014 ah Zomi (Tan Lang pan Tan 12 akah kigawm) 430 bang pha, ci uhhi. Nung kha (2014 May) sungin Jenks High School pan High School zawhna lukhu nelkai leh Diploma laipi a ngahthei Zomi (22) pha hi.

Banghang ZEC ah pilna sin Zomi naupangte vei uh
2013 March kha sungin a masa pen JPS thu vaihawm pawlkhat leh Sianu tawh kimeltheihna nei masa ingh. Tuazawh aa kipan ki thuzakna leh amau lampan galtai Zomi naupangte pilna sinzia, ZEC vaihawm zia aa kipan thu tampi a hunhunin hong dong zelzel uhhi. Manpha sa mahmah uhhi. (2010 June kha masiah volunteer takpi tawh ka naupangte uh hunbit lai hilh in Sang vaihawmna sumbeite haksa pi-in hanciam hi ungh, kacih leh, ZEC Sia khat pen hong zahtak semsem bilbel uhhi. ZAM 2006-2010 mapina nuai aa nasem khat aa ding a lamdan’ loh hang US gammite aa ding na lamdang mahmah in, bang ne, bang dawn, kua khawngin hong panpih hiam cih hong dong phapha uhhi. Hong vei tektek zawlai uhhi.) JPS in hih bangin Malaysia aa omlai Zomi naupangte aveina pen, ZEC in Zomi naupang tampi JPS ah pilna sinzom thei dingin a pattah khitna zong ahang khat ahihi. JPS kah laitak ZEC 2007 – 2011 Sang naupang tawm hetlo hi!

Bang ngimna bulpi tawh ZEC hawh
English Language Development Program tawh Zomi naupangte mailam saupi aa ding, Zomi ZEC Sang naupang a za tampite aa ding hong makaih, lam hong lakna ding uh lunggulhna lianpi ahihi. Zomi naupangte ii Mangpau, Manglai sinzia ding makaihna leh, Mangpau, Manglai thupitnate hong laknuam masa uh aa, Subject dang tuamtuam leh Sang khan sung ki makaihziate, Sang naupang makaih ziate zong hong laknuam uhhi.

Vaihawm masak acih limlim hunbei mahmah hamtang

Lai hilhzia, bang laite sinsak, Siate ii nasep zia cihte aa kipan galtai naupangte panpihna thu tampi Jenks Public School pan hong dong toto uh aa, amau kiang akah laitak ahi hetlo Zomi te zong vei uh ahih manin angtan’ huai mahmah hi. 2013 kum kipat lam pek pan ZEC hong hawh nuam uh himah leh, vanleng sap leh a bei zah ding teng board (thukhentatte) tung ngettheihna ding ki hanciam aa, ZEC leh Malaysia Zomi khangno-naupangte thu le vai kicing takin pulak masak ding kisam ahih manin kuppihna kinei toto thei hi. Kum khat dektak bang hong beiziauh khitteh 2014 January kha sung aa a beiding teng a ngetna kibawl pen, March khabei kuan teh piakding khentatna neizo pan uhhi.

Zomi naupangte leh ZEC Siate mailam aa ding thupi
ZEC in kum (7) val Zomi naupangte a pattahna sungah, aki simzo nawnlo gualzawhna leh minam hong tawisang, hong pulak zo zahin matutna kicing mahmah ki neizo khin hi. Gamthumna atungsa ZEC Sang naupang za tampite lawhcin’na tuamtuam zong ki mumu, ki zaza khin hi. Gamthumna lung-gulhin aa omlai Zomi naupangte, gamthumna a tun’ma-in a kicingthei pen leh a kicing zaw semsem pattah zawhna neihding lunggulhna hiden hi.

Zomi naupangte aa ding bek ngimna tawh hih program/vaihawmna ki hanciam hetlo hi. ZEC hunbit Sia, Sianu te aa ding zong, USA khawng ah aki nei tangtang professional development ci uhin, naupangte laihilh zia, makaih ziate a picingzaw aa kihilh/kikupna, ahih kei leh training hun zong, Sianu Mrs. Garvin tawh picing takin ki vaihawm hi. Bek thamlo-in, gamthumna mitsuan vive ihihna zui-in, gamthumnate-ah ZEC Sia/Sianu khatin ama mimal maban leh ngimna, tupnate koici hanciam huai cihte aa kipan, bangci lampi, bangci nasepte, bangci Sang zopna ziate kigin’kholh theihna om ding hiam cihte Sianu in picing takin hong makaih ding hi. (Kei mahmah mimal ii tuahkhak thu tampite zui-in, hih education lam nasep ih hanciam teh Malaysia aa ZEC hunbit ih sepzia, ih hanciam ziate leh USA aa High School ah ih sepziate, naupangte panpih ziate aa kipan, ei mimal ngimna/tupnate zong bangcidan lampi zuihhuai cihte, ZEC Siapite tung Sia khempeuh aa ding a tomkim thei penin ong gelh/khak toto ding hi’ng. Tuatung tawnin, USA ah Sang lam ih sepsawm kei leh zong Sang pilna sintheihnate aa kipan ei mimal nasep/pilna mabante Sianu Mrs. Garvin tungah sinhuai, dothuai thu tampi mukhol pah ding hi uh teh.)

Thuvanpi ding Sia Tuang (ZEC-Talalla)
Mrs. Garvin ZEC a hawhsung teng vai om khempeuh aneng asii a makaih ding, a thu vanpi ding ZEC Sia sungpan nasep kum a tampen leh education vai a telpen khat ahi Sia Tuang in ahihtheih tawp tawh hong hanciam ding hi. A han-ciam khin hizaw aa, Mrs. Garvin a khualzinna ding sum le pai a kipiak khit taktak buang teh bel, thu le vai a kisam a om leh Sia Tuang ka dotzel ahihi. Tua tawh kizui-in, adeuhdeuhin ZAM pan ahi zong, ZEC Head Teacher te-in ahi zongin ma na pangkhawm ding na hih man un vai haksa lua omlo dingin ka lamen hi. Tha lawphuai sa mahmah ing.

Angtan’ huai theihsakna
Hih amasa ahi USA aa High School minthang khat pan ZEC aa pilna sin Zomi naupangte vaanna thu manpha pen a tomkim theithei-in kong gelh hi. A taktakin, hih thu hang tawh Zomi khangthak naupang tampite maban leh Zomi te ii thu vaihawm zawhna namdangte, zumpite-in hong muh semsem ziadingte a hunhunin ong gelh-hanciam ning. A masa-in, UNHCR-Education panin zong, Sianu tawh kimuh khak hun ding na lawp mahmah ungh, hong cikhinta hi. ZEC in UNHCR tawh lengla thupi kimu sak cih vaihawm zo leuleu ding hihang. Ngimna leh ih maban lunggulh tampi omlai hi!
Tg. Kham @ Khampi

Kawlgam Madalay khuapi a buaina
Kawlgam khuapi nihna ahi Mandalay khuapi ah Muslim lutuun leh Buhdha Lutol te biakna vaai buaina hangin minih si a tampi tak liam ahihman in hithu apiangsak mi 400 kiim kimanta hi ci-in Mandalay Palik zumpi te in July 7, 2014 ni in taangko khia uhhi. Hih buaina hangin Malaysia zong hong lawh zel ahih manin Zomi akua mahpeuh kidop siam ni. Kithuahpih ding lawm teelsiam ni. ZAM zumpi panin KL sung a thunei palik te tawh July 8 ni-in kimuh khopna kinei a, Muslim makai te tawh zong July 10 ni-in kihona kinei khin hi. Mihon omna khawngah siamlo pipi-in Kawlpau khawng tawh kiho bualbual loh ding dan hi. Na paina peuhpeuh na Zomi hihna ZAM card pua hamtangin la deihloh penin buaina a om kei ZOMI hing ci-in na lak le teh hong thei pah ding hi.

Dengue natna laang lua
Malaysia gambup in tulaitak a buaipih pen Dengue natna hi. Dr. Ng Lee bangin a sepna zatopi sungah lupna kicing nawn lo hi ciliang hi. Nidang a nikhat in Dengue natna tawh zato lum mi 5 pha den uh a, tun ahileh mi 10 val den ta uh hi ci hi. Zato mun tampi ah lupna kicinlohna hangin cina tampi tak Private hospital ah kilumsak hi. Tuciangciang Pasian hehpihna tawh kumpi zato te ah cina gimte aa dingin lupna a kicin kei lezong Private hospital te ah mun om zel sam ci uh hi. World Health Organization (WHO) in Malaysia gam pen Dengue natna apun penna mun in ciamteh hi. Tui taakkhat kicing sung bekah zong no 300 val a nei ziau thei Dengue natna a keng thokaang te tawh ih kipelh theihna dingin ih kiim ih paam siangtho sak tawntung ni. Hih natna te ngah phot lehang dam siang baih nawnlo hi.

Kumsim kipawlna maikaite “Makaihzia” thusinna

Kumsim UNHCR-CDU makaihna tawh kipawlna makaite Help College panin makaihzia ding tentan a kipia den hi. Tukum adingin zong July kha sung anuai a bangin kahna kinei leh kinei lai ding hi.
09 July 2014 Makaihzia
15 July 2014 Kizopna
22 July 2014 Sepkhopna
29 July 2014 Numei le pasal vai, cih bangin kinei toto ding. 2013 kumin ZAM zumpi panin Lutangpi leh Thuvanpi kikah thei-in pahtawina lai zong kingah hi. Tu kumin zong ZAM zumpi panin Sumkempipa kah leuleu thei hi.

Tukal Palaai te buaipih diak teng
Langh Sian Thang (Laaitui) July 5 ni-in Kotaraya KL ah kimanin Dangwangi Lock up ah buaipih lai.
Kap Pian Thang leh Tuan Kho Lian (Tuimui) July 7 ni-in Sunway ah kiman, Shahalam Immigrationah buaipih lai.
Ciang Lam Khai(Tuitawh) leh Suan Pian Khai(Haupi) July 5 ni-in Balai Polis, Dangwangi ah ki buaipih.
Ta Mung (Kaptel) IPR ah kiveh thei.
Suan Kim (Cikha) July 7 ni-in Balai Polis, Setapak ah ki buaipih.
David Piang Lian(Tedim) July 7 ni-inPolis, Dangwangi ah ki buaipih.
Thang Thawn Lian (Tedim), Thawn Deih Piang (Tongsial), Thang Lem Siam (Pyidawta), Thang Sum Sing (Tungzang) leh min kitheilo (Mauvom)khat July 8 ni-in Pekan Nanas JB ah kivan thei.
En Sian Sing (Pakzang) leh Nu Ciin Mang (Tungzang) July 9 ni-in GHKL ah ki buaipih.
Kap Zam Sing (Zampi) leh Thang Min Lian (Kahngen) ACR card tawi July 10 ni-in Setapak, Balai Polis ah buaipih.
Ciin Khawl Vung (Tungzan) July 10 ni-in Setapak, Balai Polis ah buaipih.
Khual Khan Sung (Laubung) kuly 10 ni-in Dangwangi ah buaipih.
Kai Khan Pau (Zampi), Nang Za Mung (Selbung) July 11 ni-in Lengeng Camp ah kivan thei.
Pau Baik Lian (Leilum) Sg. Buloh zatopi ah buaipih.
Lian Za Mang (Mualpi), Dal Mung (Bapi) leh Khen Cin Tuang (Kaptel) Tzu Chi ah buaipih.
Cin Lian Thang (Laaitui) Tung Shin zato ah ki buaipih.
Kai Sian Mung (Vangteh) Ampang zato ah buaipih.
Giants Super/Hyper market ah July 9 ni-in nasem ding Zomi 20 val kilut sakthei hi.

Zomi honkhat UN ngahsa in Thong pan hong tuak
Ih mipih sungah kiman te hangin palai te in nisim phialin kibuaipih den hi. Phone tawh gensak, sum tawmkhawng tawh hehpihna ngetbawl cih bangin kisem den hi. A hi zongin hunlap loh man leh asinpy thei hetlo teng pen Thong inn sung hong khumsuak uh ciangin ZAM pailai te in amanlang thei pen inahkiman te min, kimat ni leh kimat na mun te UNHCR zumpi ah kipuak pah hi. Tua bang aa ih buaipih ih sanggam te Lenggeng Camp panin UN minsan na ngahsa in Zomi sinsen (20) val hong pusuak thei ahih manun ih lungdam pih mahmah hi.

Thong inn sung buaina (mipawl khat in lungpho na) a neih na hangin Thonginn sung kibuai gawp ahih manin ih sanggam te pawl khat pusuak hun cingta hi mah leh hong pusuak thei nailo ahih manin thunget na tawh phawk ciat ni.

ZSM pan dahpihna
Tuipi khuami Tg. Thang Kap Lian Thang Kum 18, pen Kawlgam pan leilam tawn in Malaysia hong pai aa, June 16, 2014 ni-in Pahang State, Temeloh khua hong tunkuan ciangin kamsiatna tawh Mawtaw kibung ahih manin tuamun ah anuntak na hong beisan hi. Zomi te khat kihel hi cih puaisa te’n ZSM zumpi ah huhna hong nget ciangin palai Sia Tuangpu in va delhpah vingveng hi. Zum vai buaihuai tampi omphial zongin Pasian hehpih na tawh zumpi pan kivan thei aa, sawtlo in kivui thei ta ding hi ta hi. Sanggam pa hangin adah akap, Nu leh Pa sanggam laizom, Khuapih te tawh kibangin ZSM zumpi panin ih dah khawm hi.

Malaysia ah theihloh phamawh thu pawlkhat
Zomi tampi a omna Malaysia ah theih loh phamawh thu pawlkhat thu pawlkhat kikum khawm ni. Theih loh manin buaina le haksatna kiphu kha thei ahih manin, theih ding kisam pah hi.

1. Taxi Natuan Teh: Taxi natuan ciangin napai nopna mun full address kician takin lak theipah inla, tuamun ciang bangzah or meter tawh paiding maw ci-in driver kiangah dong masa pah sitset in. Ahih theih leh Indian le Melayu te pelh inla, Chinese te bek kawmzaw lecin khialh omlo ding hi.

2. Vanleng Tual Ah: Vanleng tual ah mi nadawn sawm leh bang vanleng tawh hong pai ding, nai bangzah a hongtung ding, cih theihsawm pah sitset in. Myanmar panin Air Asia vive kituang zaw hi. Nidangin Air Asia pen LCCT ah khawl hi. Tun LCCT kikhak phot a, KLIA ah khawl hi.
KLIA zong nih in kikhen a, KLIA (1) leh KLIA (2) in kikhen hi. KLIA (1) ah Mass vanlengte khawl a, KLIA (2) ah Air Asia khawl hi. Mass vanleng pen mihaute tuanna vive hizaw a, Kawlgam panin Air Asia kizang zaw hi. Tua hi a, KLIA (2) ah napai kul ding hi.

3. Nasep Tawh Kisai: Atamzaw permit tawh ki om hilo ahih manin, nasep pen ei leh ei a kizongthei, kikhawl thei ziauziau hilel hi. Nasep nazon ciangin, offday, nasep hun, khasum, an nekzia le omna, sum leitawi a kipan nasepna ah ih nawkkhak ding thu teng kician takin dong pah lel in.
Offday nalak nop leh nang thu tawh offday la kenla, Boss te kiangah khuan ngen in.
Hunlap takin lut inla, hunval khit ciangin ciah panzaw in.
Seppih khempeuh tawh kilem ding hanciam tentan in.
Khutcin khecin tomsak sitset den inla, pasal nahih leh sam tomsak sitset in.
Nasep hunsung phone mekmek kenla, hong ki call leh bel dawng hamtang in.
Ahih theih leh sum leitawi keizaw in.
Giahna ah mi ihmut hunin, phone khawng ho suasua kenla, lawmte nawngkai sak ken.
Nasep natawp sawm leh Boss te kiangah notice hoihtak pia inla, taisimse ken.
Thuakzawh sawm tinten inla, lungduai mahmah in.
Sum le phone cihte a kipan van manpha naneih sunsun dongdai takin koih ken.
Malaysia pen cihmawh gentheih ciangin kibing cihmawh thei ahih manin, sum 1000 ciang peuh-mah mi muanhuai khat kemsak den in. Na cihmawh ciangin tua in honghu ding hi. Mi ih muan leh eimah banga cimawh vive nahi kha ding hi.
4. Myanmar pan Malaysia: I gamah sep ding omlo ahih manin, Malaysia mah kipai nuam tentan hi. Tua ahih manin, hong dingte in Agent azat leh Agent gina teelkul hi. Tunglam mah tawh hong pai dinguh hoih zaw hi. Nuailam pen lauhuai mahmah hi. Nuailam peuhmah hong zui kei tapeuh hen!
Author: Dal Sian Hung

ZAM Card tawi Zomi te ading nasep
UNHCR-EST nasep zonsakna pan KFC ah numei mangpau or malay pau thei cashier ding mi 10 kinawh deih, Johor Bahru KFC sai a sem dingin Zomi citak mi kideih behlai hi. A lunglut khempeuh ZAM zumah na min sazian kipia thei.
UNHCR-EST pan mahin Old Town White Coffee Shop ah ding mangpau or malay pau thei mimal 30 kideih. Khasum pen sialo ding hi.
Ipoh packing setzungah sem ding pasal 6 kideih. Nasep hun nikhat nai 10 sung, OT tawh nikhat RM54-60 kikal ngah thei den. UN card neite bek deih. Kha sum ni 7 mata pia den. Alunglutte kizopna ding: Mangpu 019 510 6413

Lungdam kohna
Zomi Catholic (ZCCM, St. Joseph Church, Sentul) pan tukal Thupuak bawlna ding RM50 hong piakhia leuleu uh ahih manin lungdam ihko hi. ZCCM Pawlpi tawh na kizop nop leh: Francis Khampi 016 269 1351.
Ngalzang khua mi Hau Cin Thang & Kap Do Nang in thongpan a suahtak uh lungdam kohna in tukal Thupuak bawlna ding RM50 hong piakhia uh ahih manin lungdam ihko hi.

Address:
155A Jalan Maharajalela,
50150 Kuala Lumpur
Office Tel: 03-2142 6659
Hotline: 016-293 9027
Email:  zomiassociationmls@gmail.com

Malaysia gamsung aom ZAM (Zomi Association of Malaysia) panin Zolai tawh kalsim in Newsletter neiden uhhi. Kuala Lumpur khuapi sung aom Zomi te kikhopna pdficonBiakinn Churches tuamtuam leh Zomi te paidiakna ansai Restaurants tuamtuam ah Printed Copy kikoih kawikawi hi. Ahi zongin Kuala Lumpur khuapi tawh aki gamla aom khuate ah ahunlap in ki ngahlo ahih manin, tuate ading khualna leh Internet azang leitung muntuamtuam gamtuamtuam aom Zomi te ading khualna tawh ZomiDaily website tungpan kongsuaksak zelzel uhhi.

Note :: PDF tawh na simnop leh

Anuai a PDF lim tungah namek lecin Download kullo in PDF Version tawh ki simthei pahding hi. PDF File tepen ihtheihsa mahbangin Mobile Phone sangin Desktop PC tawh a etdan lemzaw khading hi.

Newsletter pen PDF tawh akikoih hi a, ki simtheilo ahih keileh hamsatna khatpeuhpeuh aomleh hehpihna tawh ong zasak kik in. Anuai ah Comment Box pan inzong Comment, Feedback, Suggestion na piaksak inmaw…