ZAM Thupuak :: 08 Mar 20 (Coronavirus vai Meeting)

ZAM Thupuak :: 08 Mar 20 (Coronavirus vai Meeting)

COVID-19 TAWH KISAI UNHCR ZUM AH MEETING KINEI

06 March 2020 ni 11:00AM-12:45AM sung UNHCR zum ah Community makai te leh UNHCR Health Department lam pan thunei te kimuh khopna kinei in COVID-19 natna tawh kisai in gencian na hong nei uh hi.

COVID-19 natna tawh kisai in World Health Organization te in March 05, 2020 tangko na a neih na ah hih natna pen leitung gam 77 ah om ta in natna a ngah vekpi 95,270 leh hih natna hangin nuntakna a bei lawh vekpi 3,280 hi ci-in pulak khia uh hi.

Hih natna pen Sen gam pan kipan hi aa, South Korea, Italy, Iran, Japan leh France gam te ah natna nei leh a kilawh tam pen hi ci uh hi.

A diakdiak in Korean gam ah kilawh na bulpi pen biakinn kikhopna sung pan hi ci uh hi.

Zomi tampi gambel in i om na Malaysia gam sung mahmah ah zong hih natna nei pawl khat kimu khia khin ahih manin Zomite zong kidawm ciat ni.

Hih natna a nei mimal 55,924 tungah et phatna a neih ciangin hih natna a nei te tungah anuai a dan in natna lim kilak khia hi ci uh hi.

• 1. Cisa (Fever)
• 2. Bukkhuh (Dry Cough)
• 3. Om dan nuam lo, vangpil mello (Fatigue)
• 4. Khaksawh tam pha diak (Sputum Production)
• 5. Tawl pahpah (Shortness of beath)
• 6. Gawngtawl na (Sore Throat)
• 7. Lutang na (Headache)
• 8. Satak te leh guhtang te na (Myalgia or Arthralgia)
• 9. Khuasik (Chills)
• 10. Luvai in luaksuak (Nuausea or Vomiting)
• 11. Nakbing (Nasal Congestion)
• 12. Sungpai (Diarrhea)
• 13. Bukkhuh in si pai (Haemoptysis)
• 14. Mitna (Conjunctiava Congestion)

Hih COVID-19 natna leh khuahun kikhelna hangin i ngah theih bukkhuh vei (Seasonal Influenza) kilamdang na pi pen in hih COVID-19 pen kigim zaw leh hong nasia zaw in kibawl na ding zatui om nailo hi. Khua hun kikhelna hangin i ngah theih Bukkhuh vei (Season Influenza) te ahih leh zatui om hi.

COVID-19 natna a kibawlna ding zatui om nailo ahih manin kidal kholh ding thupi pen hi. Tua ahih manin hih anuai a bangin kidal ding thupi mahmah hi.

Hih natna pan in I kidal theih na dingin

1. Tuap lam damlo te tawh kinai tak in om khawm lo ding

2. Na khut siangtak in sil pahpah lecin hoih pen hi.

3. Na bukkhuh ciang leh hatchai (Sneezing) ciang in na nak leh na kam hoih takin hum ding (Tissue ai kei leh dial tawh hoihtak in hum hamtangin)

4. Na bukkhuh ciang leh na hatchai (Sneezing) ciangin na kidalna tissue te hoih tak in tun in ninbung ah pai in. Na ut na peuh ah thangpaih kei in.

5. Tua tissue ahi a, na kidalna khat peuh na lawn khit sim in na khut siangtak in sil kik pah in.

6. Na pumpi siangtho na hahkat in tha om ding ann te ne in ih mut ciim sak mahmah in.

7. Ganhing tuamtuam te tawh kisukha, kisawk kha lodingin om in.

8. Sa a min siang loin ne kei hamtangin. Sasan na zat leh zong a minsa atna leh a sial atna khen hamtangin.

9. Mitamna mun te ah pai ding kidawm inla napai leh zong na muk leh na kam tuam hamtangin.

10. Tuisa lim dawn in. Hih lungno in a vot thuak zoin a lum thuak zolo hi.

11. Nisa kimu sak zelzel in na puan te zong nisa mu sak zelzel in.

Hih a tung a bangin na khat na neih leh aman lang pen in Siavuan te tawh kilak pah in. A pua lam ah vakvak loin innsungah hoih tak in tawlnga in.

UNHCR ZUM PI AH APPOINTMENT LATE KI SAM SAM TA HI NA PHONE LIM TAK LEN IN

ZAM Zum pan in UNHCR ah appointment la in ih lai tin sakte Pawlkhat kisamsam omta a hihmanin,a kisam pawlkhat te in UNHCR pan in appointment ngahta uh a, UN laidal tawita uh hi. Tua kawmkal ah Phone contact kingahlo zong om lailai I hihmanin I phone tawi te hoihtak kidawm in Phone hong lutleh len ciat ni.

Hong kisap leh Kawlgam pan na tai na leh Gambeel mii na hihna kiciantak in na gentheih ding hong kisam ding hi. Tua ban ah appointment na nget lai in na at thu tawh a kituak ahih hamtang ding zong hong kisam mah mah ding hi. Tua bang in hoihtak na gel siam theih kei leh a thei ding leh lam hong lak thei dingte kiang ahi zongin, ahih kei leh ZAM zum ah hong pai in kidong thei hi. Telbeh nop a om leh ZAM Office : 03 2142 6659 ZAM Hotline : 016 293 9027

PILVANG TAK IN OM NI : Tulaitak I omna gam ahi Malaysia gam sungah gamvai tawh kisai in buaina neng neng om ahih manin I omna ciat ah pilvang takin om ni.

A diakdiak in I omna inn te ah gamlum lua, veng leh pam nawnkai sak zah dongin I gamtat loh dingthupi mah mah hi.

I veng I pam leh midangte mit ah kilawmlo dingin gam ta loin om dan I siam ding hong thupi mahmah hi. Vai thupi mahmah a om kei leh zong vakvak selo in hoihtakin I om na ciat ah I om ding thupi hi. Lam block tuamtuam zong om denden ahih manin ei lam pan kidawm thei leng hoih pen ding hi.

Lampi ah I paiciangin zong gamdang mi I hihna a kilang dingin pai luailuai, phone kihosa in pai in a ngaih pipi in awngbaba cih te pawl zang kei hamtang in.

Mun tampi ah Oparasi lut kawikawi ahih manin I om na ciat ah kidawmtak, pilvangtak in om ding han ciam ni. A thukin lua mahmah ahih kei leh vakvak kei zaw ni. A diak diakin Immigration te leh CID te uniform silh loin vakvak uh a, tua tungtawnin pawl khat in sum zon nain hong nei lai uh hi. Hong pang kawikawi in tampi pi tawh hong kitan sak uh hi. I vak suk vaktohna ah kiim leh pam zong hoih takin I et theih ding hong thupi hi.

WELCOME TO ZAM : Kawlgam, Vaigam, tuipigal leh gam tuamtuam pan Zomi tampi omna Malaysia ah hong zin Zomi makai te’n Zomi zumpi ahi Zomi Association of Malaysia(ZAM) ah hong hawh/phak hamtang in thapiak na leh idea tuam tuam piakna nong neih nadingun kong zawn phapha uh hi.

2020 ZSM LAIBU KINGAH TA HI : Malaysia zomi Genvai Kipawlna (ZSM) 2020 ading ki lutthei ta a, ZSM laibu te zong kila theita hi. ZSM lut man mi khat ciang kum khat ai RM 20 hi a, hih na lutna hang tawh ahamsa adongtuak I mipihte a panpih, adah-akap hun ah a khi tui anul sak na hi gige hi. ZSM member na lutna in nang ading apia na hikei a, panpihna akisamte a pan pihna hizaw hi. A kisam khat I panpihna in Pasian deihna zong ahi hi.

ZSM ADING PANPIHNA HONG PIA TE

• 1. MBF Pawlpi RM300
• 2. Taaklam Khua Kipawlna RM200
• 3. ZEM Pawlpi RM1500
• 4. Phunom Khua Kipawlna RM-200
• 5. Phaiza Innkuan – Malaysia RM-200
• 6. ZCF-Kajang Pawlpi RM-200
• 7. Agape Puchong Pawlpi RM-300
• 8. Ngalbual Khua Kipawlna RM200
• 9. Haupi Khua Kipawlna RM200
• 10. MZCC Pawlpi RM500
• 11. ZCF-Bethany Pawlpi RM200
• 12. Suangpi -Tedim Khua Kipawlna RM200
• 13. Zomi Innkuan- Rawang Pawlpi RM300
• 14. Cingpikot-Keizang Khua Kipawlna RM200
• 15. Singzung Khua Kipawlna RM200
• 16. Saizang Khua Kipawlna RM200
• 17. Mualpi Innkuan Malaysia RM200
• 18. Buanli Khua Kipawlna RM200
• 19. Tuithang Khua Kipawlna RM200
• 20. Zion Christian Church -Songailong RM150
• 21. Zonuamzang Khua Kipawlna RM200
• 22. Praise Adonai ZCF Pawlpi RM200
• 23. Mualnuam Khua Kipawlna RM200
• 24. Vangteh Khua Kipawlna RM200
• 25. Lailui Khua Kipawlna RM200
• 26. ZCA Pawlpi RM300
• 27. Laaitui Khua Kipawlna RM200

ZOMI TE ADING NASEP

Malaysia gamsung om Zomite nasep neilo nasem nuam mahmah napi nasep zon nang a lemlote in ZAM zum ah hong dawp un. Zomite adingin man ngenloin na sep kizon sak den hi. Contact – Sia Mamang – 018 231 1365 DAHPIHNA

Pyidawtha Khua a teng Tohing beh Pa Gin Cin Thang leh Nu Man San Niang te tapa Khan Sian Vaan in Sunway Mentari Court a omna inn pan hong nusia a, aluanghawm pen innkuanpihte lunggulhna tawh kizui-in kawlgam ah 07 March 2020 ni-in kipuak hi. I sang gampa Khan Sian Vaan luang hawm tawh hun bawlna Kajang Zato misi buk ah 06 March 2020 nitak lam nai 3:00PM in kinei hi.

I sanggampa hong nusiatna hang in a dah akap khem peuh Topa’n hong hehnem tahen. ZAM/ZSM pan in zong dahpihna I pulak khia hi.

LUNGDAM KOH BIAKPIAKNA AH SAPNA

I UN maban te Topa’n hong tonpih toto ahih manin lungdam koh biakpiakna lui nuam I hih manin Pawlpi sia/sm te, kipawlna makai te leh khua makai te Topa min tawh kong zawn uh hi.

ZOMI’ TANGMI THUNGET PAWL

• Ahun :12:00PM
• Ani : 09 March 2020 (Monday)
• Amun : ZBCM biakinn
• Grab : ZBCM

ZATO LAM TAWH KISAI

Zato lam tawh kisai-in vai khat peuh na neih leh ZAM zum ah hong ko in. Contact :Sia Mungpi 018 3122 957

TUKAL SUNG ZATO LAM BUAIPIH

• 1. Zam Sian Huai (Tedim) Shah Alam Hospital
• 2. Peter Lang (Tuisanzang) ACTS ah kibuaipih
• 3. Thang Khaw Za Tuan (Laaitui) ACTS leh IPR ah kibuaipih

TUKAL SUNG THONG LAM BUAIPIH

• 1. Dal Gin Tung (Saizang) kajang thong ah kimuh pih
• 2. Nang Khan Khup (Saizang) Kajang thong ah kimuh pih thei.
• 3. Thang Lian Mung (Phunom) Mahkahmah pan hong suakta thei
• 4. Thang Khaw Zam (Pyidawtha) Sungai Way palik zum pan hong suakta thei.
• 5. Nang Sian Mung (Vangteh) PJ lockup ah kibuaipih laitak
• 6. Khual Sian Tuang (Pyidawtha) PJ Lockup ah kibuaipih laitak

KIMAT KIHEN NA TUAK LEH

Zomite kimat kihen na tuak zenzen uh leh hih phone no. te ah na hopih pah in. Nang a dingin atawn tungin kiging sa in om den uh hi.

• Sia Tuang Pu : 016 254 4093
• Sia Zo Mung : 017 663 6087
• Sia Maa Mang : 018 231 1365
• ZAM Hotline : 016 293 9027

LUNGDAM KOHNA

• 1. Kham Sian (Laaitui) RM50
• 2. Kham Suan Kim (Tuithang) RM40

Panpihna hongpia khempeuh tungah genzawhloh lungdamna lianpi ZAM pan kong tangko uhhi. Hi bangin I pankhopnate hangin tuni dong a kalsuanzo I hihi. Topa’n Zomite adingin mapang zo semsem dingin thupha hong pia tahen. ZAM ZUM NISIM 9:00AM-6:00PM SUNG KIHONG DEN HI.