SVP VAI TAWH KISAI UNHCR PAN ZAKSAK NA :: Malaysia UNHCR zumpi ah 01 july 2015 pan 22 February 2016 kikal sung Registration interview a neih khit ciangin a ki reject leh laidal a kilak sak kik honkhat kiom hi. Tua hun sungteng pen SVP (Status Verification Process) ci’n a ki lim sit phadiak hun a hih manin Interview a kia lo omlo zaw phial hi.
Tua SVP (Status Verification Process) a kibawlna pan akia te, a ki reject te tu’n UN zumpi ah thumna ngetna Appeal kibawl kik theih cih UN zumpi pan hong tangko khia leuleu uh hi.(Theih ding : Hih hehpihna appeal a bawl ding te pen SVP pan a ki reject te bek hi ding a, a dang vai tuamtuam tawh ki reject te tawh kisai na omlo hi.)
Appeal abawl nuamte pen ahun 01 August 2016 pan 01 October 2016 kikal bek kihong ding hi. Reject a thuak te ngait UN zumpi ah pai kul ding a, zumpi pan in bangci bangin appeal bawl ding cih gen cianna Instruction hong pia ding uh hi.
UN zumpi ah napai ding leh Monday, Tuesday, Thursday leh Friday nite ah kipai thei a, ahun pen 11am pan 1pm dong hi ding hi.A tung a I gensa hun sungin SVP interview hun sunga, a ki reject te zong phone tawh sms kithak ding hi. Tua sms na ngah a, na telcian kei leh ZAM zum ah hopih in kuppih in. Nang a ding lametna om thei kha ding hi. Source: Zomi Daily
PAWLPI SIA, UPA LEH KHUA MAKAITE TUNG’ LUNGDAM KOHNA: Signature Campaign I bawlna ah nasiatak in ma hong pang khawm ahi Pawlpi sia, pawlpi upa, khua makaite, zum hongpha a letmat hong thuh te leh mimal kim tungah lungdamna lianpi kong pulak uh hi. Lametna zahsangin zong tha hong kipia zaw in a vekpi in 4626 bang kihel thei hi. Hong kihel khamanlo te adingin zong supna om tuanlo in, a kihel khempeuh in Malaysia Zomi tanga nasep thupi khat a sem kha na hihna kong theisak uh hi. Signature Campaign ah I kihel na pen Zomi te vaipuak khat peuhah a pua khawm theite I hihna hong kilang sak mahmah a, hamphatna I ngah te Zomi bup in a ngah khawm ding I hihi.Leitung thukhun ah thuman/thumanlo khat a theihpih ding mi 2, kisam a, Malaysia gambel tulsawm a sim Zomite tangdinga mimal hihzah tawh na teci (witness) pan na Topan hong guaksuaksak loh nangin thungetna tawh ma pang ciatni.
A THEIH HUAI LEH A CIAMTEH HUAI PAWL KHAT :: ACTS CLINIC 44 A, Jalan Padang Belia, 50470 Brickfields, Kuala Lumpur, Tel: 03 2272 2585
HEALTH EQUITY INITIATIVES(HEI) :: 26-1A 1st Floor, Vivekananda 50470 Brickfields, Kuala Lumpur. Tel : 03 2272 4957
BUDDHIST Tzu-chi KL FREE CLINIC :: 221, 4th Floor, Wisma LTS, Jalan Pudu, 55100 Kuala Lumpur. Tel : 03 2142 1567
PAWLPI KEM SIATE LEH KHUA MAKAITE ZAM FREE CARD KIBAWL SAK :: ZAM in kumsimin man ngen loin Zomi khua kipawlna makaipite leh pawlpi kem Pastor te ZAM zumah August 1st-31st sungteng nisim 9:00am-6:00pm kikal hunngahni khat peuh ah ZAM Free Card nonglak na ding un ZAM zum pan zah takna lianpi tawh kong zasak uhhi. A theikha nailo a om leh MZCA,ZCMC leh kipawlna tuamtuam te pan na hilh sawnsak un.
lawm takna a khansemsem nading deihna tawh i neih ahi Zomi League ah Football(Tukpeng) leh Volleyball ki demna ding tawh kisai in anuai a bangin gelna ki nei hi.
1. Bawlung suiding team khatin akimawl theihna ding in Entrance fee 700, Deposit RM 300 ta hi ding a, August 21 ni anunungpen in min sazian ap ding hi.
2. Team khat ah mi atampen 20 ta kisang ding hi.
3. A kimawl dingteng in a Card leh card No.(UN, ZAM, ZRC, etc…) te leh passport size photo khatta zong kisam ding hi.
Amun ding :Astaka Sports Complex , PJ
Volleyball tawh kisai in
1. Lutman pen RM 250 hi ding hi.
2.Volleyball a matsim dan dingpen, Best of three mat sim dan in kila ding hi.
3. Team khat ah tampen mi(9) pha ham tang dinghi.
4.Volleyball kimawl ni dingpen September 22 leh 23 (Thursday) le (Friday) niin kimawl dingin kikhensat hi.
5. A kimawl dingteng in a Card leh card no(UN, ZAM, ZRC, etc…) te leh passport size photo khatta zong ki sam ding hi.
6.Volleyball kimawl dingte in name list te August 21 (Monday) ni in ap hamtang ding hi.
Amun ding : KOMPLEKS BELIA DAN SUKAN 4029 Jalan Kampung Pandan, 55100 Kuala Lumpur. RHB Insurance kilei thei Lai :ZAM zumpi ah ni sim zum hon hunsung khempeuh in RHB Insurance ki lei thei hi. Hih Health Insurance pen a deih khempeuh in kilei theilo a, UN Card neite bekin leithei hicih mang ngilh kei ni!Insurance leina dingin UN card copy, om na inn address cih te kisam hamtang hi.
RHB INSURANCE CARD KINGAH THAK :: UN001801 pan UN001820 kikal, UN001887-001900 ki kal RHB Insurance card kingah ta hi. Zum ah hong la un.
ZOLIMTUI ANN SAI THAK :: Zolimtui annsai ZAM zum nuai-ah 08 August 2016 ni pan kipan in zingsang nai 8 pan nitak nai 7 dong ki kihong ding hi. UN ah vai tuamtuam neite in Zo ann mah hong delh hamtang un cih hong zawn ing. Innkhan sap nuam a om leh zong kisap thei hi. HIh annsai ah Zongei na ann tuamtuam kingah thei ding hi. Pa Mang :018 2021 216
Kimat kihen na tuahkhak leh: ZAM member te kimat kihenna tuahkhak uh leh Sia Tuangpu: 016 254 4093, Sia Go Mang: 018 202 1216.
Zomibup antan thunget neikhawm ding zaksakna :: UN te-in nagamuh hoihta hi aciah nuamte ciahthei hong ci ahih manin i lungnuamlo hi. Tua ban ah 2018 nung siah UN ten maban zom nawnlo ding cih thu om lailai a hih manin i vai kikhak mahmah hi. Pasian in manlangtak a i maban hong honsak nangin Pasian na semte le mipite in kipawlkhawm kigawmkhawm in i Zo zumpi mahah antangin Pasian maipha zong khawm dingin kong zawn hi. I pawlpi tek ah kingen thei lua hi ahi zong khatvei beek hong paikhia in nong kalsuan khiat ding Pasian in hun hong sata hi. Hong paikhia in Malaysia pan gam 3 na ah napai khia tak tak ding hi.
ZCF KLANG CAMPING SAPNA :: A tung a thutawh ki zui-in ZCF-Klang in Zomi sungpan Lai Siangtho bang aa pianthakna ngah nailote ading it-na tawh camp ki bawl ding a hihmanin a lunglut khempeuh ta ding ZAM Thupuak pan zeisu min tawh kong zawn uh hi.
ZAM zum leh thupuak ading panpihna hongpia Zomi u leh nau, Khua kipawlna leh biakna pawlpi khempeuh tungah gen zawhloh lungdamna lianpi ZAM pan kong tangko uh hi. Topa Zomi te thupha a hiden dingin hong siam ta hen.
Note :: PDF tawh na simnop leh
Hih link >>> PDF File tungah namek lecin Download kullo in PDF Version tawh ki simthei pahding hi. PDF File tepen ihtheihsa mahbangin Mobile Phone sangin Desktop PC tawh a etdan lemzaw khading hi.
Newsletter pen PDF tawh akikoih hi a, ki simtheilo ahih keileh hamsatna khatpeuhpeuh aomleh hehpihna tawh ong zasak kik in. Anuai ah Comment Box pan inzong Comment, Feedback, Suggestion na piaksak inmaw…
Malaysia gamsung aom ZAM (Zomi Association of Malaysia) panin Zolai tawh kalsim in Newsletter neiden uhhi. Kuala Lumpur khuapi sung aom Zomi te kikhopna Biakinn Churches tuamtuam leh Zomi te paidiakna ansai Restaurants tuamtuam ah Printed Copy kikoih kawikawi hi. Ahi zongin Kuala Lumpur khuapi tawh aki gamla aom khuate ah ahunlap in ki ngahlo ahih manin, tuate ading khualna leh Internet azang leitung muntuamtuam gamtuamtuam aom Zomi te ading khualna tawh Zomi Daily website tungpan kongsuaksak zelzel uhhi.
Comment piaknop aomleh...