Yangon khuasung atai YBS Bus sungah Passenger khat asisa in kimu

Yangon khuasung atai YBS Bus sungah Passenger khat asisa in kimu

Yangon khuasung atai YBS 61 Bus tungah zanni Monday ni in Passenger khat asisa in mawtaw sungah kimu a, ahi zongin ami kua, koipan cih kitheicianlo cih Yangon Police te’n tangkokhia uhhi.

Hih YBS 61 Bus pen Hlaingtharyar aom West Yangon Technological University panin Yangon khuasung Sule dong ataizel ahihi. Kumpi thunei te’n hih misi pen bangci bangin mawtaw sungah hongtuang hiam cihpen akansan laitak uh kici hi.

Hihvai tawh kisai in amukha Witness khatin agenkhiatna ah hih misipa pen Shwe Gone Daing ah Bus akhawl laitak in mawtaw tungah hong kahto cihi. Bus sungah tutna a awngkhat mu ahih manin, tuateng ah tusukpah cihi.

Tua tutna ah atutkawm in, alu pen tutna leh kongkhak Window kawmkal ah ngasuk in, ihmusuk cihi.

Tua Bus pen Thukha leh Insein Road lamkiu aom Bus Stop khat atun ciangin aomzia, a ihmutzia man asalo Passengers dangte’n mawtaw hawlpa zasak uhhi.

Bus Driver inzong tuabang in a ihmu aom ciangin aphongzel hi a, ahi zongin hih Passenger ihmu pen tuamdiak ahih manin lunghimawh mahmah uhhi. Tua ciangin Bus Driver inzong amanlang in Insein Hospital ah taipihsuakpah a, ahi zongin zato pan Hospital Employees te’n tuapa pen sikhin cimawk uhhi. Apumpi apualam bangmah liamna cihbang kimulo hi.

Hih misi pen apumpi tungah bangmah ID, Matpongtin cihte omlo a, kumpi thunei te’n Yangon khuasung pan hiding in ummawhphot uhhi. Hlaing Police Station ah Case kibawl in, kumpi thunei te’n mipi tungah tangkokhia uh a, ami kua cih aki kanciansan laitak ahihi.

Hih atung a misi pen atheikha aomleh Hlaing Police Station Commander Thein Swe Myint at 09250283275, ahih keileh Sub-Inspector Khin Soe at 09953184452 ah na zasak un.

Abeisa huntomno sungin Yangon khuasung Bus tungpan misi akimu pen hihtawh athumna bang hita hi.

Tukum June khasung in Taunggyi panin Yangon zuanin atai Bus khat, Aung Mingalar Bus Station atun ciangin asungah Passenger pasal khat asisa in kimu ahih manin, palik te ki zasak hi.

Related: Yangon YBS mawtaw nungzui numei khatin anik lemsan

Tuazawh asawtlo, kalkhatzong asawtlo in Kayin State, Myawaddy panin Yangon zuanin apai Bus khat, Yangon atun ciangin asungah Passenger pasal khat asisa mahin kimukhia cihi. Sawltak #zomidaily