Yangon ah Zomi Nam Ni kibawlding: Lungdam kohna

Yangon ah Zomi Nam Ni kibawlding: Lungdam kohna

Hong tungding Feb 20, 2018 (Tuesday) ni ciangin Yangon Zomi tengin Zomi Nam Ni nuamtak in dawn theih nading in akisam sum leh pai pen aki gelna zahsang tamzaw Pasian in hong ngahsak ta ahih manin ong piakhia Global Zomi Alliance leh Zomi mi kiphal te hangin nakpi tak in lungdam i ko hi. Minam khat aa ongbawl Pasian na zahtak na uh leh Zomi na itna hangvua neilo pi mah kiphal tak a hongpia khia mimal kim tungah Pasian in hong thukkik tahen. Sum leh pai tawh mapang nuamlai na om uh leh zong kuapeuh ki mapang theilai hi cih ong zawn lai ingh.

Zomi atam theithei paikhawm aa ih Nam Ni nuamtak zangkhawm dingin Yangon Zomi akua mapeuh Nam Ni vaipuak lai khempeuh aitang in khatvei kong zawn pha kik hi.

Amun : Telegu Methodist Church (corner of Seikantar Street & Anawratha Street TBC-Y Biakinn lui)

Ahun : 2:00pm to 4:00pm (nitak lam)

Ani: 20 February 2018 (Tuesday)

Ciaptehding : I Zopuan silhkim tek ni.

Thupiak om bangin
Pau Khan Sing

Yangon ah Zomi Nam Ni Kibawl Ding

Hong tungding February 20, 2018 (Tuesday) ni-in Yangon khuapi sung ah om Zomi te in A 70 Veina Zomi Nam Ni nuamtak leh picing tak zat dingin kigel hi.

Hih hun ah kipawlna Zomi kipawlna khatpeuh in vaihawm ziau hilo in Yangon om Zomi ki pawlna khempeuh in kipawl khawm aa kibawl ding ahi hi. Hih hun ah Zomi atam theithei paikhawm aa, Zomi hihna lakkhia kia hilo in minam itna leh hihna tawh hun la a paikhawm ding in i kizawn hi.

Hih Zomi Nam Ni ah Global Zomi Alliance in moh leh avot tawh apaikhawm khempeuh taitak in hong vak ding uh hi.

Hih hun sungah hun hong kepsak dingin Pu Mung Laan Thang kiseh aa, aman nopci tak leh thalawp huai takin hong makaih ding hi. “Lunglau lo aw, Zogam lei aw,” cih latawh mipi in la kisa khawm ziahziah ding aa, Sm Niang (LZNiang)in hong makaih ding hi (lasa nuam te in Piang (OM) kiangah na pia un). Dr Khen Za Sian in vaimuak thugen na hongnei ding aa, tuakhit ciang Zomi lasiam te in hong awi ziahziah ding uh hi.

Zomi Zogam Zosuan tate ading Pasian thu leitung thu tawh makai te ading thunget khopna hun zong limci tak kibawl ding hi. Zomi mihau Pu En Za Kap, Zomi sungah etteh tak Pu Thang Khawm Cin te in Zomi te ading kisam asak te uh hong genkhia ding uh hi. Mipi in “Tun Sung Khatpan” cihla kisa khawm ziahziah ding aa, hunkhak naleh nek leh dawn in hong zui pah ding hi.

Hih hun ah Dr Pum Khan Pau (Professor Visva Bharati University, Santiniketan, India) zong hong kihel thei dingin ki lamen hi.

Hih hun sung khempeuh Live in kikhah ding hi.

Pasian in Zomi Nam Ni nuamtak a uap thei ciat dingin Yangon Zomi khempeuh cidam ludam na hongpia ta hen. Amun ding ahih leh Photo sungah ompah ding hi.

Thupiakna om bangin
Pau Khan Sing
Stage Manager