Myanmar, Yangon khuapisung aom “The Iron Rose” kici Weekly Journal Editor athatlum pen kitheita cih DVB pan kiza hi. Tua mithatpa minpen Aung Ko Ko kici a, Yangon Police te’n amatkhiat uh ahihi.
“The Iron Rose” kici Weekly Journal ah Editor asempa pen amin Wai Yan Heinn hi a, nung Kawlgam Thingyan Tuibuahpawi sungin azumkhan sungah aki thatlum ahihi. Aluanghawm aki muhkhiatzawh ni 4 sungin Yangon Police te’n athatpa pen akankhiathei uh ahihi.
Journal Editor Wai Yan Heinn si cih akizak ciangin Myanmar Media sungah upmawh thu tuamtuam hong gingkhia hi. “The Iron Rose” Journal pen abeisa in galkaplui ulian te thu limgelh mahmah ahih manin, tuahangin aki suamlum hiding cihbekbek ki limgen mahmah hi.
Ahi zongin Wai Yan Heinn ii sihna, aki thahna ahang taktakpen innkuansung vai nahihtuak zawmawk hi.
Athakpa Aung Ko Ko pen gamdang tembaw zui in khual sawtpipi azinkhat ahihi. Gamdang ah khual azinkal in azi leh Wai Yan Heinn pen angkawm in naki thuahzel uh cihi.
Aung Ko Ko in tuavai atheih ciangin April 11 ni in azi leh atapa inndei sungah kong apualam panin kalhcip in, vaksan hi. Inn atunkik ciangin azi leh atapa innsung ah na omlo ahih manin, Wai Yan Heinn kicipa kiangah Phone hopih in galdot hi.
April 14 ni in Wai Yan Heinn in Aung Ko Ko kiangah Phone hopih a, nazi leh na tapa pen Dagon Ayeya Highway Station ah kamu ci’n zasak hi. Athu akician in natheih nopleh kazumkhan “The Iron Rose” Journal Office ah hongpai in cihsan hi.
Aung Ko Ko zong “The Iron Rose” zumkhan ah April 14 ni sunlam 2pm hunpawl in paipah hi. Azum sungah atun ciangin azi vaitawh kisai in ki kamtam, ki kamnial uh a kitawng uhhi.
Aung Ko Ko in ageinai sabuai tungah temta khat mu in tuatawh Wai Yan Heinn ii agilpi dawtsak hi. Yangon Police te genkhiatna ah agil akidawtna pen mun 14, 15 bang phading ci uhhi.
Yangon Police te’n azi vaitawh kisai in hihthupiang cih aziatheih uh ciangin Aung Ko Ko zongpah uh a, amahpen Pyinoolwin ah naki buto hi.
Ahi zongin mithatpa Aung Ko Ko leh azi pen April 19 nitaklam in palik te’n mankhiathei uhhi.
Related: Yangon, Tamwe ah naungek suakcil akipaai khat ahing in kimu
Hih “The Iron Rose” Journal Editor kithahna hangin upmawh thu kigen tammahmah ahih manin, Yangon Police te’nzong atheihcian phetin athuman agenkhiapah uhhi cihthu kiza hi. ZD Sawltak #zomidaily
Comment piaknop aomleh...