Yangon ah Rohingya te hangin Buddhist leh Muslim kikal buaina piang

Myanmar, Yangon khuapisung aom Mingalar Taung Nyunt Township ah Wednesday zingsanglam in Buddhist leh Muslim kikal buaina piang ahih manin mi 1 liam cih Irrawaddy pan kiza hi.

Buddhist Monks te makaih Kawlgammi honkhatin Mingalar Taung Nyunt Township sung aom innkhatah Muslim Rohingya te guklut uh “illegal” in om uhhi ci’n zankim in vapai uhhi.

Muslim Rohingya tepen Myanmar, Rakhine State sungah akigawm in 1 Million bang omding in kigen hi. Tua Rohingya akicite pen avek un Muslim hipah uh a, Rakhine State aki ciangtanna sungpanin mundang ah pusuahkhiatding kiphallo hi.

Vaithupi khatpeuh tawh pusuah akulte zong Special Permission ci’n phalna lai aneihlehbek Rakhine State sungpan in zinkhiathei pan uhhi.

Myanmar kumpi leh gammi tampitak in tua Rohingya akici tepen “Bengali” ci’n ciamtehzaw uh a, Bangladesh gampanin hong pusuakkhia peemta mi ci’n ciamtehzaw uhhi.

Tua Muslim Rohingya te ‘illegal’ in zintung hi ci’n aki theihna innsungah Myanmar Nationalists honkhatin zankim in vasim uh a, ahi zongin innsung ah Rohingya kuamah na omnawnlo cih Police te’n amuhkhiat ciangin Nationalists te hehthei mahmah uhhi.

Tuapan in Muslim leh Buddhist pawlnih kikal buaina hongpiangin Yangon Police te’n mipi khenthang nading in Warning thau nihvei lawnkhia uh cihi.

Nungkaldiak mahmah inzong Yangon, Thaketa Township sung aom Muslim sanginn “Islamic Schools” nihtak ki khakcipsak hi.

Phalna ngahlopi in Islamic Schools tepen biakinn “Mosques” in kizanghi cihtawh buaina apiang hi a, tuahangin Muslim sanginn nih aki khakcipsak ahihi.

Aki khakcipsak sanginn tepen Yangon, Thaketa Township, Anawmar 11 leh 12 sung aom sanginn kici hi. Myanmar Nationalists mi 50 bang ki tuahkhawm in sanginn khakcip, kalhcipsak uh a, tualaitak in City Officials leh Yangon Police tezong agei ah om uh cihi.

Mipi pen lungso mahmah uh a, agei ah thuthang kanding in aom AP (Associated Press) te ii Videographer Ko Min Kyi Thein zong video azaih laitak in ki sukha cih kiza hi.

Yangon ah Buddhist Nationalists leh Muslims kikal pen buaina piangzelzel a, Muslim sanginn aki khakcip khitzawh Rohingya vaitawh abuaikik leuleu ahihi. ZD Sawltak #zomidaily