WWI Kum 100 cingta (1918 – 2018) Remembrance Day or Armistice Day

WWI Kum 100 cingta (1918 – 2018) Remembrance Day or Armistice Day

They shall grow not old, as we that are left grow old: Age shall not weary them, nor the years condemn. At the going down of the sun and in the morning, We will remember them. (Laurence Binyon)

(Kum kivei-in kha kidang zong, Ei a omlaite bang-in, teeklehvuai, khanghaamna te’n a maute’ zonawnlo ding uh aa, Zaang nisuah nitum sial-in, amaute’ ih phawk den ding hi)

Tuni November 11th ni, 11:00am in leitung galpi khatna (WW1) ave’n zawh kumza hong cing peetpeet ta hi.

Germany leh a pawlte 1918 kum-kipatlam in, galhat mahmah na pi’, upmawhloh pi-in France leh Britain kipawl in honglehdo uhciang’ gal hong lelpian mawk uh hi. Tua ban ah, USA pan galhuh tampi hong tunbeklai ahih man-in, German galkaapmang te’n galdo khawlding-in a kumpite uh ngen uh hi.

A tawpna ah 1918 November 9ni-in German makaipi Kaiser Wilhelm in Emperor tokhom nunsia-in hong taimang takciang, a thaaikhatni Novermber 11ni in Britain, France makaih gamkipawlte leh Germanyte kikal galvending’ thukimna(Armistice) hong nei uh hi. A sawtlo kumkik 1919 June 28ni-in, Treaty of Versailles (Germany leh a lang-ah gamkipawl Britain, France, Italy leh Russia) tawh galpikhatna athu-ala in vengtaktakta hongsuak hi.

England kumpi King George V thupiakna tungtawn in, 1919 aa kipan, hih nithupini pen 11:00am in minute2 daihna tawh gam aa ding’ galdona-ah nuntaakna piakhia galkaapte zahtaakna a kipia a hihi. Kumsim November nipi-nihna pen Remembrance Sunday in kiciamteh in phawkna kibawl aa, tukum kum100 cin kum-in, November 11ni leh Sundayni zong a hong kituak lianse hi.

Poppy

Tu-hun ciang, United Kingdomgam khangthak te ngeina, nuntaakzia khat in hong omta hi. November kha hongtun nakleh Christiangam a hihna tawh kizui-in All Souls day leh All Saints day ci-in a sisa itlehngaih teng phawkna kinei hi. Galsung ah mualhong liamsan paltan(galkaap) te phawkna in Poppy paaksan kizang hi.

A kiciaptehna ah, 1915 kumbullam pawl galpi a hatmahmah laitak-in Canadian military doctor John McCrae in a sihsan a itmahmah, a lawmpa Canadian galkaap Lieutenant Alexis Helmer a ngaihnatawh khuangai in a omlaitak, sisan-naaisan leh hanphual tawh kidim galkidona lei-maitang tuam in, sanciuciau aa, paak-ziahzuah poppy te a muhciang “In Flanders Fields” cih a minthang lakam hong suutkhia hi. Galvenzawh a kipan-in, a kizang-suak a paisate phawkna paaksan, a hongsuak hi.
Hih nithupini pen a khuakhua ah Cenotaph kici mualsuang te ah pakkual piakna tawh phawkna pattawina kipia hi. Muntuamtuam ah zong Poppy lim kisuang kawikawi hi.

The unknown warrior (Theihban-zawhloh ngalliam)

Galsung ah a site-han a tuam vilvel in a gamgam-ah om ahihi. Yangon khuanawl ahzong khat a om hi.

Galpisung hitaleh, gal hong venciang in galsung ah nuntaakna piakhia Zomi France Labour Corps te aa kipan, minlehpuam kithei khempeuh han-kipia in limtak kivui hi. A hizong, galsung a hih mahbang in, a kitheibanlo milehpuam bek hilo hanzong a ngahlo tampi mah a om hi.

Britain te’n tuate’ bangcih ding ci-in tawlkhat lungngai in om uh hi. Ngaihsutpiakna tampi a omlakpan, galmai-ah mapangkhawm Pasian nasem The reverend David Railton ngaihsut piakna hoihkisa pen hi.

1920kum November 7ni zan-in galkikaapna atampenpen munte pan ciaptehna neilo hankhat pan misi 4-6 ta tokhia kik uh aa, Northern France -St Pol khua aa om, galkaapte-biakinn kitunpih hi. Tuapan a kitokhia misiluang khatciat gamdial (Union Flag/Union Jack) tawh kituam in Britain galkaapmaang Brigadier General LJ Wyatt in tua gamdial tawh kituam tampi lakpan khat teelkhia in, a dangte kiphum kik hi. Tua a kiteelkhia pen hankuang sung ah kisial in, HMS Verdun tawh English channel tuipi kantan in Dover, Britain kiciahpih hi.

Tua siluang pen November 11 niciang in King George V in mualsuang thak honsak leh pakkual pia in, pahtawi vakpihna a kineih khitciang Westminster Abbey, kumpi han ah kivui hi.

Han mualsuang tung ah,

“They buried him among the kings, because he had done good toward God and toward his house. (2 Chronicles 24:162)

Khangthute Nihna 24:16 a hi’ “Amah in Israel sungah Pasian le a biakinnpi adingin na hoih sem ahi manin, David Khuapi sungah kumpite tawh kivui khawm hi” cih kammal ki-at hi.

Mite’n theihbanloh na-ngawn pahtawi-uh ei guai. Nantal’suan

Laaksawnna munte:

• http://www.bbc.co.uk/schools/0/ww1/25403869
• https://www.mirror.co.uk/news/uk-news/ww1-poems-remembrance-day-poetry-13564573
• https://www.bbc.co.uk/newsround/15492752
• https://www.britishlegion.org.uk/remembrance/how-we-remember/the-story-of-the-poppy/
• http://www.greatwar.co.uk/poems/john-mccrae-in-flanders-fields.htm
• http://www.bbc.co.uk/history/historic_figures/unknown_warrior.shtml
• https://www.bible.com/bible/208/2CH.24.ZIV>
• The New English-Zomi Dictionary by Dr. Dal Lian Haokip