William Carey leh Judson te Nihgel

William Carey leh Judson te Nihgel

William Carey kum 1793 kumin hong lut aa, Khedap khui nasep sem in gupna thu hong puak hi. Calcutta hong tun ciangin College sia khawng hong semin Kamlet khawng hong semto hi. Khatvei a khualam hong ciah in Missionary Society va phuan hi. England gam panin Sangmang a puak uh ciangin nung zuih aa, ahuh theih dingin Society khat hong phuan khia uh hi. Kum 1812 kumin hong pai khia aa, America panin hong pai Judson tawh hong tonin Tawmbaw tungah thu hong ki kum khawm uh hi. Pasian thu hong ki kumto uh aa, Tuithehna sangin Tuiphumna manzaw cih musak hi. Sangmang tuak ahih uh hangin a upna a ki tuiphumna uh ki bang hetlo uh hi.

Calcutta hong tun uh ciangin khua laizang luiluang Oceangreen tui sungah William Carey in Judson tui na phum hi. Tua-a ki panin Judson sangmang zong Tuiphum sangmang hong suak pah hi. 1813 kumin Judson hong tung suk aa, Mawlamia khua hong tung hi. Kawlgam pen milim bia gam khauhpai mahmah khat hi aa, Judson in gupna thu a gen ciangin Kawlte’n Ni sagih sung bungbu khai in a zi gal etsak cih bangin bawl uh hi. Thongzong khiasak uh aa, khua khat leh khuakhat leitangsa pen khedap bulhsak lo in a khetawh paisak hi. Thongsung ah kia leuleu in tua kal in a zi in na sihsan cih bangin lungkhiatna ding tampi na phukha uh hi. Thongsung panin hong suah khia khit ciangin gupna thu mah genin hong neih veve hi.

Mihing nuntakna sungah ahoihlam ding na lianpi ih gel ciangin haksatna leh thutuamtuam tampi ih phukha ding hi. A hizongin lungkhiatna cih pen ginat lohna ahih manin gualzawhna pia theilo hi. Minam ading, Pasian a ding ih ki piakna khat peuhpeuh ah hangsantak leh citak tak in kalsuan gitnget ding ahihi. Tuakna phutkhatna na sia semsem leh tupna gimna khauhsak semsem ding hizaw hi.

Tua ban-ah tulai Pastor te zong a piang thak tamlo uh hi. Mi khempeuh a piang thak dingin muhhuai nawnlo hi. Na inn aa hong pai khat zong muan pah ding leh a thu up pah ding zong hi tuanlo hi. Sangmang tuaktuak Carey leh Judson te zong a gam uh panin Piangthak ki sa in hong pai uh hangin khatpen pianthak mello upna bek tawh a kalsuan khat hi cih pen ki mu hi. Pastor pawl khat hong khuanung piangthak cih tampi ka mu hi.

Haksatna ih tuahzah in ih lawhcin keileh ih gimna ih tupna diktaklo cihna ahih manin, tupna ki cian, gimna ki cian neih vilvel ding thupi hi. Hih ka tupna in mimal hamphatna ding maw, mipi hamphatna ding cih ngaihsun ciat in tupna ki cian ih neih ding thupi hi.

Hih a tunga sangmang nihte upna leh sanna a cilin ki banglo aa, ahizongin a tupna uh ki bang sitset ahih manin tupna ki cian aneih manun tuni dongin Pasian gamzai semsem in amin uh mangngeilo uh hi. Hih bang nasep hoih sepnopna Zomite sungah hong khangsemsem hen.

Thawn Tuang
Zomi Angvaan
Ka Laikung panin::http://zomi-angvaan.blogspot.com/
May 16, 2013