Vondeih Kep Ding – 82 (Dimno’ Pa)

Vondeih Kep Ding – 82 (Dimno’ Pa)

Dear Tawngno, Naupang nawi ne laite bang hinawn lo-in asia le apha, ahoih le ahoih lo te limtak ngaihsun in khen theita na hih manin nidang sangin kong muanna lian zawta hi. Mi pawlkhat te apian kum tamsim sim napi-in bangmah ngaihsutna nei mello-in hih cibangin aom melmal zong om mawk hi.Tua leh apiang taktak ahih leh ahih loh bel thei lian kei na vengin, a ngaihsut huai mahmah tangthu khat hong gen ning.

‘Sang aman zawh uh asawt lo-in Chuan leh Jing in company khat ah na hong sem khawm uhi. A lawmta un nasep hahkat tuak mahmah in a pu in zong pakta tuak mahmah hi. Hun sawtpi khat mah hong sep khit uh ciangin a pu in Jing pen aza hong khan in, Chuan ahih leh asep ngei panmun mah ah hong koih lai hi.

Tua bangteng mah tawh hong semsem hina pi, a thuak zawh nawn loh nitawp ni hong tung ciangin a pu kiang ah nasep khawlna lai pia kawm leh a lungkim lohna teng gen kawm in hong pai hi.

Chuan in thasial hetlo-in na asep lam pen a pu in zong thei lua mahmah hi. Ahi zongin alawm Jing tawh akibat lohna thu theisak nuam ahih manin Chuan kiang ah, “Zii ah vapai in la, khat peuh in kawl tangmai (water melon) a zuak hiam va en in?” ci-in sawl hi. Chuan zong zii vapai pah in hong tun kik ciang, a pu kiang ah, ‘kizuak mah’ ci-in hong gen hi.

“1kg ciang bangzah man?” ci-in a pu in hong dong hi. Zii ah vatai phei kik in, aman hong dot khit ciang, a pu kiang ah, “1kg ciangin $12 man,” ci-in hong gen hi.

A pu in zong Jing sam in Chuan adot mah bangin paam-a zii ah kawl tangmai aom tam va en in, ci hi. Jing zong vapai phei-in hong kileh kik ciangin a pu kiang ah hih ci bangin hong gen khia hi.

“Zii sung mun khat bek ah kizuak in, 1kg ciangin $12 man hi.”

“10kg lei le hang $100 in hong pia ding. Pom (340) nei-in, sabuai tung ah (54) bek koih hi.”

“Pom khat ciangin 15kg kiim gik in, saklam panin tuma ni (2) lai-in hong tung hi-a, fresh mahmah lai hi.” Ci-in hong gen hi.

Jing in tuadan in hong gen zuahzuah ciangin Chuan in amah leh alawm Jing akibat lohna, a pu in alawm Jing pen a zakhan sakna hang hong thei-in, lungkim lo-in a nasep khawl sawmna panin zong hong khawl nawn lo hi.’

Tawngno, hih tangthu nasim khit ciangin na lungsim ah acian khat om dingin um ing. Nasep kibang na pi-in alawhcing leh alawh cinglo mite omdan pen tu-a bang dan hipah hi.

Hong it,
Na pa

Columbus,OH
November 24, 2016
Facebook ah Dimno’ Pa Page non na Like sak ve vua!