Vondeih Kep Ding – 7
Tawngno,
Tawngno aw, leitung pen khangtoh lam manawh in taai cihtak in taai a, ei phak zawh ding bang hilo hi. Tua mah bangin siatna zong khang cihtak in akha’n lam zong ih thei sa hi. Hoihna a khan leh siatna zong akhan ding pen alamdangin ngaihsut ding zong hi nawn lo a, mihoih paukhankaphong tam tektek in, misia zong hong tam tektek ding hi. Ahi zongin ‘Diamond’ pen bangmah in a siatsak zawh loh bangmah in mihoih ding te zong a kim apaam ah siatna blangzah tak in a om hangin tua siatna te-in sia sak zolo ahi maw!
Na nu na hopih dan, na nu’n na hongsawl leh na dawn kik dan te pen na nu tawh ka ki hopih ciangin hong gen kik zel hi. Tawngno aw, na nu nadawn ngawh nate, na leiding khawng in mun khat peuh ah hong sawl ciangin na pai nop loh zel nate hangin na nu pen dah mahmah in, sun in zan in ihmu mawh hi. Tu laitak nang bek hi lo-in, no khanggual te pen lauh ‘naneih loh laitak hun, kihtaak na neih loh laitak hun leh 
pil ‘na kisak mahmah laitak hun uh ahi manin atua ciding mah na hi-a, na nu ka hopih ciangin, ‘ih nuapang te thei siam in, amau tua bang laitak mah ding hi’ ci-in ka na hehnem zel hi. Na neu lai, na lampai thei cil in nong muan dan te, lawm leh gual na neih masak hun na tanlangh kah hun in nong muan dan te leh na nu ang ah lum nawn lo-in a tuamin na lup hun na Middle School kah lai hun khawng leh tuhun a nong muandan leh nong hopih dante pen ki lamdang mahmah sa ung. Tua te hangin nang ading in ci-in lai khat hong gelh beh ingh.
Kum 4 ka phak-in : Ka pa in na khempeuh hih thei.
Kum 5 ka phak-in : Ka pa in na khempeuh thei, theih loh khat zong nei lo!
Kum 6 ka phak-in : Nang’ pa sang kei pa pil zaw!
Kum 8 ka phak-in : Ka pa’n na khat peuhpeuh a tel taktak meel hi kei veh aw, a upmawh teng a paupau bek hi.
Kum 10 ka phak-in : Ka pa’ khan (khanglui lai hun ) lai leh tu hun ah na khempeuh a kilamdang khin ta hiven.
Kum 12 ka phak-in : Oh! A taktak in ci leng ka pa’n thu khat peuhpeuh kician tak in telmeel a nei lo hi mawk ei! Teek lua mahmah ta sam hiven, bang ci bangin a neulai hun te ciamteh thei nawn mah ding, bang tel nei nawn mawk mah ding!
Kum 14 ka phak-in : Tua puteek pa khawng! Bang mah thu-in zong sim ding hi kei! Thulak a zong hel ding hi kei, huah om sak!
Kum 21 ka phak-in : Amah maw! Kalai…kalai…liamluam…koih lel vo! A paihphat hita ei!
Kum 25 ka phak-in : Amah akum tam zaw buang hiven! Kapa’n kei sang tawm bang thei zaw sam mah lo dia!
Kum 30 ka phak-in : Ih pa’n bangci dan in ngaihsun cih dotbawl huai sa-ing!
Kum 35 ka phak-in : Ka pa kiang ah ka dot masak loh buangin na khat beek sem ngei kengh!
Kum 40 ka phak-in : Ka pa’n hih te bang cih geel in, bang cih hih zawh peuhmah ai tam, a lamdang pi hi! A sin thu leh a thuah thu a tamkhit mah bangin, mi’ ciim mahmah khat zong na hi lai mawk ei!
Kum 50 ka phak-in : Tu-in hiah ka pa tawh a kiho thei kik hi-in ka pa tawh a om khawm thei kik ding hi leng, ka neih kalam khempeuh ka pa pia nuam si’ng! Ka pa mi ciim mahmah khat hina pi-in, ama kiang pan thu tampi tak kasin loh, kadot man loh aw, pammaih mah si e maw!
Tawngno aw, hih pen mi khat i, a pa amuh zia kong gelh hi. Nang mahmah in ki ngaihsun in khat vei nasim kik in maw! Limtak na keem in. Nidang ciangin simkik nuam le cin na zongzong loh ding in!
Hong it tawntung,
Napa
March 15, 2013
Comment piaknop aomleh...