Vondeih Kep Ding – 52 (Pau Khan Kap)

Vondeih Kep Ding – 52 (Pau Khan Kap)

Dear Tawngno, Tangthu tom khat hong gen nuam ing. Hunkhat lai-in a lawmngaih pa a limngaih mahmah, alimbawl pha mahmah nungakno khat om hi.Tangvalpa in bel alawm’ bawlzahliang in bawl lo-in tuadan in ama utthu in om lel hi. A lawmngaih pa in bangbang in abawl zong, a thudon kei phial zongin telsiam in acihcih in mangin agei ah om den hi. Nungakno nu in message a khakkhak hangin etsak pah in reply kik pah cih peuhmah omlo hi. Nikhat khit cih bang ah laikhak kik pan cihdan in om hi.

Nungakno nu in phone samsam taleh len ngei lo-in, missed call amuh hangin call kik cih peuhmah aom-a omlo hi. Nek theih khat, bang khat peuh apiak hangin lungdam cih kammal azak kik ding pen mualmong et bang lel hi. A birthday, valentine’s day tungtung tamah leh a lawmnu adingin thungetsak in apainopna mun khawng ah paipih cih bang om ngei ngiat lo hi.

Nungakno nu in a facebook wall ah a lawmpa a ngaihna thu gelhgelh in, photo khawng upload ta leh aman ama wall ah gelh cih peuhmah om ngei lo hi. Photo ten ding bel gamla lai lua! Alawm agual te mai-ah cikmah hun in pahtawi cih peuhmah om ngei lo-in, hawmthawhna kammal, totna kammal bekbek hi niloh den hi.

Tua bangin hun hong paipai hong paipai-in ni hong bei, kha hong bei-in a kum in hong pai ciangin nungakno nu lungsim ah meima neu khat hong om hi. Nikhat khit nikhat a meima damdam in hong gol tektek in, a lungsim ah, ka u in kei hong ngai takpi mah ahi tam,’ hong cita hi. Zan ihmu mawh in hih thu hong lungngai in atawpna ah hih zah ta-in ka bawl hangin ka u in kei hong thudon loh pen, ahong ngai lo hi, ci-in hong tel hi.

Khitui luang in, lungsimna in hong kap, hong kap, hong kapkap hi. Tua khitciangin khensatna khat hong nei hi. ‘Kei adingin ahun hong pia zolo,’ ‘Kei adingin amaitai nei lo,’ ‘Kei adingin a nuihmai ngei lo;’ ‘Kei hangin a lunggim den, ka u kiangpan in paikhia ta ning,’hong cita hi.

Tua leh zingsang sim in message a khak den hong khak nawn lo hi. Sun in a phone call den zong hong call nawn lo hi. Nikhat, ninih hong hih hangin tangval pa in phamawh hong sa nai lo hina pi, Kal khat bang hong sawt ciangin a lungsim ah banglo khat akisam danin hong feel hi.

Hong ngaihsun in,‘banghang in ka lawmngaihnu in phone hong call lo ahia leh,’ ci-in a phone lain hong hopih hi.
Tua hun ciangin a call hangin computer bek in na dawng ta hi. Amah a it mahmah, a telsiam mahmah a lawmngaih nu ama kiangpan in pai khia ta-in, mu kik zo nawn lo hi.

Tawngno aw, ataktak in cileng hih tangval pa in a lawmngaih nu a it lo, angai lo hipeuh mah lo-in ngaih cihtak mah in a gai ahi. Ahi zongin a lawmnu in limngaih lua liang ahih manin ama kiangpan in a paikhia thei nawnlo ding sakha in thudon loin aom kha hi.

‘Itna’ cih bel kithuh kik ding ahi. Aman hong ngai tah ci-in akhat te ut bangin om gawp ding hilo hi. Hong ngai ta ci-in thudon loh in koihcip in om ding zong hituan lo hi.

Mihing i hih manin ciangtan khat ciang bek kithuak zo-a tua ciangtan hong kheng leh bangzah ta-in it in i ngai zongin paisan mah a kul ding hong hita hi. Mailam ah hih cibangin na gamtat khialhgawp lohna dingin pilna hong pia hih tangthu hong gen hi ing. A Vanglian Pasian in thupha hong pia ta hen! Hong it, Na pa, Columbus, OH (August 31, 2016)