Vondeih Kep Ding – 42 (Pau Khan Kap)

Dear Tawngno,
Nungkum tubang hun in i gam ah dongtuakte huhna ding ci-in khangno pawl khat tawh lampi ah huhna ngen in ka ding uh hi. Ka dingcil in ka mai tawm khat zum pian hi. Ahi zongin ‘kei ading hi kei, ka gam ah nek ding nei lo, dongtuak te adingin a ding hi ing,’ cih ka ngaihsut ciangin ka zumna teng hong bei hi. Thu khat peuhpeuh ah i ngaihsun zia, i view aman ding kisam a, i etna view man kei leh ahilo pi-in ki ngaihsun thei mawk hi. Pom zia, muhzia aman na dingin ngiahsut zia aman ding na kisam mawk ei, Tawng.

Tua leh zanni in kasim,‘Mite’ Zia’ cih tawh kisai tangthu tomno khat hong hawmsawm nuam ing.

Khatvei lai-in i khua bangin a khuata khua khat ah Siahuan khat cidamna tawh kisai agen dingin kisam hi. Siahuan pa in zong a khua mite nunzia hong kan in zuu’ bawl in a lal lawh, a siat lawh tampi aom lam hong thei ahih manin zuu hoih lohna thu, gen dingin hong tel hi. Mipi te mai-ah maanhaai nih hong koih in khat ah zuuhang koih in, adang khat pen ah tuisiang hong koih hi.

Tua khit ciangin ganghingno khat hong la-in tui siang aomna maanhaai sungah hong khia hi. Tua ganghingno in tui sung ah tui hongzaam kiaukiau lam mipi te hong lak hi.
Tua khit ciangin Siahuanpa in zong tua ganghing mah zuu akoihna maanhaai sungah hong khia kik leuleu hi. Minute khat zong sawt lo-in tua ganghing hong si hi.
Siahuanpa in hih bangin alahna pen zuu’ hoih lohna leh zuu in i pumpi bangzah in siasak cih thu agen nuam ahi hi. Thu ngai in hong pai khuanu khuapa te hih cih bangin thu hong dong hi.

“Khai leh guai, hih i muh khiat thu panin laaktheih ding bang thu na mu vua leh?” hong cih leh zuu dawndawn khat pa hong ding in, “A zenzen in nang zuu adawm hi le cin na gil sung, na pumpi sung-a lungno om teng khempeuh tua na zuu dawn in thatlum manggai in teh,” hong ci hi.
Tangthu ahih leh azom kigelh nawn lo-in hitan ciang ah hong khawl hi.

A taktak in Siahuan pa in message apiaknop thu pen tua bang thu hi zenzen lo hi. Zuu hoih lohna thu agen nuam leh a lak khia nuam ahi hi. Ahi zongin mite in amau muhnop san bek uh mu in, a zaknop thu bek uh angai nuam, tampi om mawk uh hi.

Nang zong mitawh na kikholhna hong tam tektek leh damdam in mite zia le tong hong tel toto niteh! Hih thu tawh kisai konggen nop tam lai mah hiven ka kimawl hun hong tungin hizah tawh hong khawlphot ning.

Hong it,
Na pa

Columbus, OH
August 8, 2016