Vondeih Kep Ding – 17
Tawngno,
Daily gelh in lupna tung ah ka om a, ciapteh huai thu teng kagelh khit ciangin a beisa ka paina, ka nasep te ka sim kik kik leh kong gen ding a ka ciapteh thu khat mu kik ing. Na pa zong nidang bang nawn lo-in ka khuak a hat nawn lo deuhdeuh tawh kibang sa ing. Tu’n zong gen hamtang ning ci-a, ka ciapteh sa sitset hina pi-in ka daily a-en kik lo hileng a mangngilh cip ding hita zen lawmlawm ing.
Tu kum, kum kipat lam in pawlpi keem ka siapa uh Sia Paupi leh pawlpi mi ( 4 ) khawng tawh ko kiang panin tai (140 ) khawng aki gamlak na Cleveland acih khuapi neu khat ah mikang pawlpi khat in Seminar bawl in tua ah thuhilh dingin Sia Dokham ( Dr. Chin Do Kham D.D, D.Min; 
Ph.D) cial ahih manin thu ngai dingin ka vapai uh hi.
Seminar kah vekpi pen mi (100 ) kiim khawng pha ding hi. Sia Dokham in thuhilh na leh teci pan na nei kawm in a nungta Pasian thu hong gen hi. Apiang thak ciangin midangte in sang zolo in a nawl khin na, sumtang peekkhat zong nei lo-in Lai Siangtho Sang ah kah dingin a pai na khawng hong gen ciangin ka khuasik mul hong tho nainai hi. Pasian a teel zawk na hangin pianna pa ta hial in telkhial in innpan in a hawl khaitna thu hong gen ciangin na pa’n ka khitui ka kham zo mahmah kei hi. Tua bek hilo in Yangon ah a sang kah lai khawng, Korea ah aom lai khawng zong hong gen in Pasian a itna leh amuan na, Pasian amuan na hangin a gim thuak nate leh a haksatna te khawng hong gen, hong gen ciangin kuamah in en to zo nawn lo-in mikhem peuh khitui nul in lukun gai uh hi. Ka lungsim ah, ‘Sia Dokham in hih zah in Pasian a it hi zen maw,’ ka ci-a, Pasian ka itna hong khang semsem hi.
Tawngno aw, ei lam ah Sia Dokham hong zin ciang ih khua pen khua neu khat ahih manin thugen in a tuam in hong pai zolo kha ding hi. Ahi zongin Kawlpi ah hun zang hamtang ding ahih manin koi pawlpi ah bang ni, bang hun in hunzang ding cih kan in, setbeng ahih kei leh motor cycle tawh thungai dingin na nau Dimno tawh na pai hamtang un maw.
Sia Dokham in a pianthak na thu, na dang khempeuh sangin Pasian a teel zawk na thu, Pasian leh ama gam adingin a gim thuakna thu te mikim simtheih dingin laibu khat in hong bawl lehpaukhankap hoih ding hiven! Tua hi leh ei pata teng in zong sim thei in, Pasian tawh hong kinai sak tuam lai mah ding hiven.
Sia Dokham tawh kimuh na khat ka neih leh zong hih thu na gen ning. Na nu thugen te limtak in na mang in la, na nau hoih tak na don in maw. Zanhal ni nisa lua in tuivot limdawn lua ka hih manin kanap tawm atui sim loh adang bangmah ka natna om kei. Tua zong a hoih kik ding hita!
Hong it,
Napa
July 5, 2013
Columbus, Oh, U.S.A.
Comment piaknop aomleh...