Vondeih Kep Ding – 158 (Dimno’ Pa)

Vondeih Kep Ding – 158 (Dimno’ Pa)

Dear Tawngno, Tawngno aw dam in lai hong khak ing. Dam kim dingin kong lam en a, kei zong Pasian thupha tawh cidam in na sep maban zom thei ing.

Kiphatphat leng nuam na pi, ahi zongin i hih lohpi mun ah i kiphat gawp ciangin kipai khial thei hi. Naupangte i phatphat pen hoih mahmah napi, ahi zongin phat dan i siam kei leh amau adingin lauhuai zaw thei hi. Naupang tawh kithuah ding na hih manin naupangte phat dan research paper ka sim khat hong gen nuam ing.

Billionaire Factory a kici liang Stanford University ah Developmental and Social Psychologist Dr. Carol Dweck leh a lawmte in research a bawlna khat hi.

‘Tan 5 kah laitak naupang hon khat laiphi sak in, tawl khat (minutes 4) khit teh khawl sak uh hi. A laiphi uh a check khit uh ciangin pawl khatte, ‘hih zah na phi theih pen a pil ngiat hi teh,’ ci-in, pawlkhatte, ‘hih zah a hahkat in na hanciam thupi ngiat teh,’ ci uh hi.

Tua khit teh a masa question sang a haksa zaw deuh phi sak kik leuleu uh hi. A mansiang gaih ciangin researchers te-in naupangte tungah, ‘tuna bel khat mahmah zong a piang om kei uh teh,’ ci-in gen khai uh hi.
‘Pil ngiat teh,’ ci-in a phat uh naupangte in lai kia leh a guallel danin kingaihsun pah uh a, ‘hanciam taktak teh,’ ci-a a phatte-in a hih leh lai kia leh a guallel danin kingaihsun lo hi. A sinsin dan in kingaihsun zaw uh hi.

Researchers te in, ‘hih questions pen home work in kua tengin ciahpih nuam? ci-in a dot leh pil ngiat teh, a cihte sangin hanciam taktak teh a cih naupangte in inn ah home work in a ciahpih nuam tamzaw hi.

Tua khit ciangin researchers te-in a masa pen dan mah in a baih mahmah laiphi na khat hong nei sak kik hi. ‘Hanciam ngiat teh,’ ci-in a phat naupangte in a phi masak pen sangin tampi man zaw a, tua bek hi lo-in, ‘pil ngiat teh,’ ci-in a phat naupangte sangin zong tam man zaw lai hi.

‘Pil ngait teh,’ ci-in a phat uh naupangte in a hih leh a masa lai sangin tampi khial zaw uh hi, ci hi.

Tawngno aw, naupangte phat ding hi a, ahi zongin i phatdan i siam kei leh amau siat lawh zaw uh hi, ci hi. Hihzah hong gelh phot ning. Hong it, Na Pa