Vondeih Kep Ding – 140 (Dimno’ Pa)

Vondeih Kep Ding – 140 (Dimno’ Pa)

Dear Tawngno, Tuzan lumkhial kik ka hihtam thei lo ka khanlawh ciang ka veilam ah ka ngawng hek leng hong na leuleu in, lingsi ka nuh leh hong nuam tuam zaw deuh ta sam. Khuahun bel kumthak kiimlam bang nawn lo-in vuk khiat zong hong phadawm zawdeuh ta-in, na seppai ciangin zong tawmcik khat vuk tam lai sangin lung nuam zaw deuh ta hi.

Ka phawk khak ka lawmte pawlkhat pen sangkah lai-in sangkhan sungah pil lua het lo hinapi, tuin gam makai zo liang dingin pilna lam ah a tung pawlkhat om ta hi. Ka kan simsim ciangin koih pih hoih zi leh a panpih thei ding zi a neih manin midangte sangin a lawhcingzaw ahih lam phawk kha ing.

Numei pawlkhatte zong Master bang zo uh in, ahi zongin pasal hong neih ciangin a pasal in thusim sak lo lua ahih manin a pilnate zat loh in aom cip pawlkhat om leuleu hi.Ih khua sung leh i Zomi sungah a pil ding, hong makaih dingin a muanhuai numei tampi tak a pasal panpih loh hangin a mitcip tampi om dingin um mawh ing.

Nupa i cih pen i thanem ciangin tha a kipia ding bek hi lo-in, a uk leh a lunglut thute ah zong i nupa mah in tha i kipiak ding kisam sa ing. Na lawmngaih nu a sepnop khat sangpi a tun theih nadingin panpih ding hiteh!

Kong gen sa mah bangin Michelle in Barack Obama pen kumpi a suah ding manin a tenpih hi lo-a, kumpi a suak theih ding ama pasal kumpi a suah theih nadingin thapia in, hanciam pih in, a panpih hi. A pasal kumpi in hong om ciangin amah kumpi nu dinmun ah hong om hi. Obama in a thugen na muntampi ah a zi hangin a gualzo ahihna gen mun mahmah hi. A zi pen pahtawi mun mahmah hi.

Ih lawmngaihte a gualzawh pen ei a gualzo mah hi hanga, i pasal hong lawhcing pen ei a lawhcing mah hi hang. Papi pawlkhat in a lawmnu pen thu in sim lo-a, milak khawng peuh ah gen siasia thei mawk hi. No hun, khangthak hun ciangin tuadan om nawn kei leh lunggulh huai sa ing.

Pasal in zite uukna a hih zawhzah in panpih in, zi in zong a pasal uuk leh a nasep a panpih theih zah in panpih ding hun hita hi. Tua hileh nupa in gualzo in lawhcing ding hi hang.

Nungak tangval lai-in tei mahmah, pil mahmah napi, a nupi a papi khit ciangin a kizang thei nawn lo mitampi tak i khuasung, i gamsung ah tampi om hi. Amau thanemna zong kihel sam in cin, ahi zongin a pasal thapiak loh, a zite thapiak lohna zong tampi kihel ding hi

Na lawmngaih nu in bang uuk cih kan in, na hih zawh zahin a tup, a lunggulh a tun zawh nadingin panpih le ci ut ing. Ahi zongin a hoih bek ciang khat bel om ding hi.

Tua leh Kawlte paunak ah, “Siate hilh loh in, adan manin kihih thei kei. Ngapik em na ngawn siate’n hong hilh mah leh,” cih khat om se hi. Ih theih loh nate ei sangin a thei zaw i siate, i ute tungah dot dingpen haksa sa lo hiteh!

Hong it,
Na Pa

Columbus, OH
February 27, 2018