Vondeih Kep Ding – 121 (Dimno’ Pa)

Dear Tawngno,
Tawngno aw, na pa’n lamdang ka sak thu khat in, ‘mi pawlkhatte tatsia gawpgawp napi uh in daupai-in a sepna peuh ah lawhcing uh a, pawlkhatte lah gamtat hoih napi-in daupai thei mahmah lo-in, a sepna peuh ah lawhsam den mawk uh hi.’ Hih thupen telham ka sak mahmah thu khat hi.

Mi pawlkhate’n nuntakna pen ‘khualzin tawh kibang,’ ci-in, pawlkhat in ‘ galsim, galdo’ tawh kibang ci uh hi. Pawl khat in lah nuntakna pen ‘teelna vive tawh kidim hi,’ cita leuleu hi. Nuntakna pen teelna vive tawh kidim leh kilawm sa mah ing. Neutuung pan kipan Sang kahna ding mun teel, College ah major ding teel , nasep hoih teel, lawm ngaih ding teel, zi ding pasal ding teel, teen nading teel, om nading teel cih bang hi toto-a, teelna vive hi takpi mawk hi. Nisim i hek, i tatna khempeuh zong teelna vive mah tawh kidim hi.

Mikhat kampau zong hici et vat leng a ma manphatna tawh kisai lo ding tawh kibang napi-in, ‘hih pa koi bang dan mi’ cih pen a kampau limtak ngai le hang a kampau zia leh a kammalte panin kithei khia hi. Tua manin kampau pen kidop huai in, zong thupi hi. Tua man hi ding hiam khangluite’n, “Kamsiam Sial lei sang, kam sia Sial liau.” cih paunak khat na nei uh hi.

Ih lungsim bangzah ta-in nem ta leh kampau dan siam kei le hang midangte in a heh peuh hong sa mawk uh a, kampau siamte ahih leh a heh mahmah phial uh zongin kammal khauh leh kammal sia zanglo ahih manin a hehlam uh kithei lo hi. Kammal khat in i tha hong dimsak thei a, kammal khat mah in i lawpna teng hong beisak thei hi.

Kampau khat hangin kum tampi a kingai khin lawm kingaite zong kikhen lawh thei uh a, kampau khat hangin i theih ngeiloh midang khat tawh lawmta bangin ki-it thei hi hang. Lawmta ki-it mahmah kimlai, kampau khat hangin a kithei ngei vetlo, khualmi khat kibang thei hi.

Temta tawh i sat khak ahi zongin i pumpi tungah liamma khat peuhpeuh pen zato pai a kul phial zongin hong sawt leh dam lel a, a nat lam kiphawk nawnlo in, a sawt ciangin ki mangngilh lel hi. Ahi zongin kam sia leh kam hoihlo tawh hong ki paupih khak pen i pumpi tung ah liamma om lo, sisan luang lo-in, zato kilah kul hetlo hitase mah leh dam hun cih, mangngilh hun cih omlo a, khang khat sung kikhom thei hi.

Tua manin kampau pen kidop huai mahmah hi.

Na manphate pen muh pakpak ding, ngah pakpak ding hamsa mahmah hi. Banghang hiam cih leh a manphate pen tamlo-in tawm sese hi.

Hong it,
Na Pa
July 15, 2017