Vietnam numeikhat alupna ah Phone Charging tawh datlaih in si

Vietnam numeikhat alupna ah Phone Charging tawh datlaih in si

Mobile Phone azang atamzaw in zan ihlupding ciangin ih phone tepen Charging zopsa in ki ipmutsak tek hi. Sunthapai ihzatcip ih Mobile Phone tepen inn ihtun ciangin atha beigawp a, Battery kiamgawp ahih manin, Charging zoploh phamawh hi.

Ahi zongin Vietnam numeino khatin alupkal in a Mobile Phone zatpen Charging zopsa in akoihleh, daihlaih in ihmu saksuak cih Metro News pan kiza hi. Tua Vietnam numeino pen kum 14 aphapan Le Thi Xoan kici minnei khat ahihi.

Le Thi Xoan pen sangkahlai Schoolgirl khat hi a, alupkal in amazat iPhone 6 pen Charging zopsa in akoih ahihi. Tua Charging khaupen luiluata, atung atuamna tezong kekkhiata in, Plastic Tape khawngtawh aki belhthuahkhat ahihi.

Hih numeino ii asihna pen aki kankhiat ciangin iPhone 6 pen alupna gei ah Charging zopsa in koih ahih manin, tuapan in datlaih “electrocuted” hiding kicipah hi. Amahpen alupna geinai ah Phone Charging zomden a, tuapen zongsan khinta hi.

Alupkawm amumang in a Phone omna lamah akhuttawh zawtpheikha in, Charging khau hoihnawnlo, akekteng zawtkha hiding a, tuapan in Electrocuted in asi hiding kici hi.

Hanoi Police te’nzong numeino ii lupna geinai ah Cable meikatna athemneng kimu cihi. Hih numeino pen anu apa te’n amuhcil in khua phawknawnlo in, tuaciang in amanlang in Hospital ah kitaipih himahleh zato ah asi veve ahihi.

Hospital panin Doctor te’nzong asihna “Cause of Death” pen Electrocution mahhi ci’n genkhia uhhi. Tua Charging khaupen Apple Company panin akibawl Original ahihiam, ahih keileh Third-party ahihiam cihpen ki theicianlo hi.

Ahi zongin Police te ciaptehna ah tua Charging khaupen Apple te Original sangin themkhat tomzawdiak ci uhhi.

Hih numeino pen Vietnam, Ha Tinh Province sung aom Huong Son khuasung ah ateengkhat ahihi.

More: Samsung Phone khat ipsung ah akikoih laitak puakkham in meikuang

Alimlim in lupna ngei anailua ah Phone Charging koihpen hoihlozaw hamtang hi. Deihlohpen apuakkham, meikang leh Electric datlaih cihkhat hileh lauhuai mahmah hi. Tuaban ah Mobile Phone tepen abawlkhia Company te ii Battery leh Charger cihtemah zat huaizaw hi. Adangdang Third-Party te ihzat ciangin Mobile Phone tezong atozahding in tolo in, siabaih zawdeuh theihi. iPhone khawng tultampipi in ihbeibuang in, Charger khawng Original leingamlo cihbang haivai cihnop huaiphial hi. Original asit kingkeng, atha liklekmah zatsawm ni, buaina tawmpending hi. Sawltak #zomidaily