Via Dolorosa ~ Khaibawi

Hih kammal pen Latin pau hi-a, dahna lungkhamna lampi, ana asa liamna thuakna lampi cihna ahi hi. I Topa Jesu in a khe mahmah tawh pai ngiatngiat in amah aki khaina ding Singlamteh, amah mah-in pua in aki khaina ding mun Golgotha mual ciang, nang leh kei hong it manin paita zen hi.

A puak Singlamteh pai-in ki mangsakziau leh a hithei lua hi. A hih kei leh huhna apa kiangah ngen leh vantung mite kuansawm le kuannih paiding cilai hi. Ahi zongin nang le kei hong itman in thuak ngeungau hi. Hih lampi Via Dolorosa thu tawh kiai a ciapteh huai mun 14 kigelh hi. Tuate in:

• 1. Jesu Pilat mangpa mai-ah thu aki sitna leh aki mawhsak na.
• 2. Jesu Singlamteh aki suatna.
• 3. Jesu in a Singlamteh puak lel in a tuk masak na.
• 4. Jesu in lampi ah anu amuh na mun.
• 5. Cyrene khua mi Simon in Jesu Singlamteh a puakpih na.
• 6. St. Veronica in Jesu mu-in a maitang a nulsakna.
• 7. Jesu in a Singlamteh puak lel in a nihvei na a tukna mun.
• 8. Jesu in adah akap aom Jerusalem nupite a hehnepna.
• 9. Jesu in a Singlamteh puak lel in thumvei a tukna.
• 10. Jesu a puansilh kimlai aki suahsak na mun.
• 11. Jesu Singlamteh tungah kikhai in siktukilh tawh aki kilhna.
• 12. Jesu a sihna.
• 13. Jesu Singlamteh tung pan aki lakkhiatna.
• 14. Jesu hankhuk sungah aki sialna.

Hih munteng pen Lai Siangtho sin Sangnaupangte ading in thupidiak, ciapteh huaidiak ahih manin khat le nih in a phattuampih khak leh ci-in kong gelhsawn ahi hi. Ka mit mahmah tawh vamu in, ka khe mahmah tawh vasik kha ngiatngiat kha ka hih manin kei zong hampha kisa ing. Jesu thu a kisitna mun Khansung zong limtak in puah uha, Singlamteh pua a, a paina lampidung khempeuh zong, kultal kizut in suanghoih agol mahmahte kiphah in zoldik dek hi.

Lamkim, lampam ah innhoih nono leh vanzuakna sai tampi Golgotha mual tundong, omto zihziah hi. Jesu sulnung khempeuh ki khel in khangto mahmah hi. Zogam zong Jesu thu in hong nawkkhitteh, ki khel in I ann nek tuidawn, I nikten puansilh, I gamtat I luhek hong kidang hi. Jesu in a nawkkhak mun le gam, minam khempeuh kikhel in khangto cih hong phawksak hi.

Khaibawi