Vawh bang atkikna leitung ~ Khat Thang
Hun khat lai-in Africa gam panin sal/sila dingin mikangte in mivomte man/lei uhin Europe gam le USA gamte ah zuakkik uh hi. Mihing takpi a kizuak akilei ahi hi. Innkuan sungah Nupi le naunen teng kinusia in a thahat lai papiteng sal dingin kimanin kizuak hi. Hih mihing zuakte in Africa gam panin diamonds tampi zong laksak uh hi. American President masa pen George Washington bang sila khawi mihau khat ahi hi. Tua ban zomin mikang missionaries tampi zong Africa gam zuan ngeingai uhin leitang tampi laksakin, diamonds tampi laksak uh hi.
Desmond Tutu in “Missionaries te Africa hong pai cilun Lai Siangtho Bu nei uh-a, ko gammite’n Leitang ka nei uh hi. Thungen ni ci-in ka mit uh hong sisak hi. Ka mit uh ka honkik uh ciangin gam nei mite in La Siangtho Bu ka nei uh-a missionaries te’n leitang nei uh hi” ci hi.
Hun khat lai-in mivomte tungah tatsiatna tampite tuin mikangte in ahi ciang khat a thuakkik uh hi kici thei hi. Mikangte in sila dingin mivomte alei uh asap uh hi-a, tun deih lohkik cih sansan pen thu dik lo khat ahi hi. Gam khat sungah tengkhawm nungta khawm gamite tungah mihing suahpih hamphatna kumpite in a piak khitsa ahi hi.
A beisa hunin Republican party kumpi ahi-a, Democratic kumpi akah zongin lungnuam takin sawtpi nungta khawm khin uh hi. Republican kumpi Abraham Lincoln in mivom salte suahtakna ding vaihawm a, Democratic kumpi John F Kennedy bangin zong African te suahtakna ding, nasep khop theih ding tampitak vaihawm pihin African sang naupang tampi USA ah pilna sin dingin huhna pia hi.
Hi bangin ki-itna a kilam khit hun sawtpi himah leh tutung USA president Trump tungtangah kitelkhialhna hong pian pen President pa thugel siam loh man hi, kampau kidop siam loh man le pilvang lohna hi aci zong tam sim om hi. Ahi zongin Pasian deihna bang om cih I gen khol thei kei hi.
Gam khat sungah Pa dinmun pen haksa ding himah leh “hi gam ah nop nasak kei uh leh paikhia un” cih bang kammalte pen a zat huai lo ahi hi. Innkuan sungah Pa ten tate khasiatna, lungkim lohna a neih leh bang hang cih kanin tate kipuah ding kipan pih ding kisam bangin vaihawm ding hi-a, “inn sung nop na sak kei uh leh taikhia mangun” cih bangin kihawl khiat ding hi lo hi.
Tutung USA buaina ah ei Zomite adingin gup ding paih ding cih bang om lo banah ei gup le paih zong thu lut zo peuhmah lo ding ahi hi. Pilvang huai in, vaikuanna ciat ah zong kampau kidop huai hi.
I gen nop bulpi ahih leh hun khat laiin akang ten zong avomte’ inn le lo tampi laksak ngei, mihing nuntakna na ngawn sila/salin zuak, innkuan tampi nupa, tampi khen kham ngei tham uh-a, avomte in zong lah ci thei leh pungcing hong kisak uhteh hong hangsan simta uh ahi hi. Tua hi in, US te kisap pen hauhna sumlepai hi nawn lo-in Kumpi hoih kisam hi gige hi.
Republican pan ahi a, Democratic pan ahi zongin President hoih picing khat kisam mahmah ta cih kitelcian hi. Muhna akibat keh hidan zong om ei na cih sakun. Khat Thang
Comment piaknop aomleh...