Vape zateepna puakkham ahih manin, aha tang 7 siacip, amai leh a ngawng meikang

Vape zateepna puakkham ahih manin, aha tang 7 siacip, amai leh a ngawng meikang

US gamsung Idaho State aom papikhat a zateepna Vape ahih keileh “Electronic Cigarette” puakkham ahih manin, amai meikang in aha zong tang 7 siacip cih Daily Mail pan kiza hi. Tua papipa minpen Andrew Hall hi a, in Pocatello, Idaho aom a innpan in nasemding in akithawithawi laitak, a zateepna Vape pen bangmah Warning omlopi in puakkham cihi.

A zateepna Vape apuakkhapna hangin akamsungteng siazancip in, aha te kilongkhia bekthamlo, amai leh a ngawng zong meikang hi. Hih zateepna apuakkhap laitak in amahpen kisilbuk Bathroom sungah aom hi a, kisilbuk ii abaang teng ahzong meikhu belmang kimuthei cihi. Tuaban ah kisilbuk sung aom Basin or Sink zong akiu kitam cihi.

Hih atuahsiapa pen kum 30 gualpawl hi a, Car Salesman nasep asemkhat ahihi. Tulaitak Intensive Care Unit (ICU) ah kikem ci a, ama tuahsiatna tungtawn in mite akidoptheih nading in atuahsiatna Photo te Facebook ah asuahkhia ahihi. Vape ahih keileh Electronic Cigarette te lauhuai mahmah cih mipi atheisaknuam ahihi.

Hih azateepna Vape pen kumkhatbang azatzatsa hi a, hibang in apuakkhaptheih nadingin katokkha kei cihi. Battery zong angei mah bangin kalei akipan azuakte honggendan in kakepcing himah leh kamaitang ah hong puakkhammawk ci’n genkhia hi.

Zateep limlim pen ahoih hetlo kawmkal ah Electronic Cigarette ci’n hih Vape zateepna te hongki bawlbeh sawnsawn a, pawlkhat bangin Style lahna danin teep mawkmawkthei uhhi. Electronic van himawk ahih manin, lauhuai kawmkal ah Made in China pianvive hisawnsawn ahih manin, zateepsawm te’n ngaihsut huai mahmah hi.

Hih Vape te puakkham cihpen kiza zelzel a, kamtawh akiteep himawk ahih manin atuahsia te amaitang siatlawh lianlian uhhi.

Behlapna:
Zateep pen ateep te adingin ahoihloh banah agei aom te ading inzong nopmawh mahmah hi. Adiakdiak in naupang te geinai ah zateep pen naupang adiakdiak naungek te adingin hoihhetlo hi. Thuaklah mahmahding uhhi.

Akhangto gam atungkhinsa ahihhang papi pawlkhat in naungek tawikawm, puakawm in za teep viauviau thei uhhi. Nang zateepna panin zakhu te na tano in hong dikpihpih hi cih phawk in. Nangsang in na tano in thuaklahzaw thamthamding hi. A teeplo te adingin namsia mahmah cih phawk huai hi. ZD Sawltak #zomidaily