Vaan laaizang panaa a kia-suk thupha ~ Yah Liante’ Pu (Travelogue)

Vaan laaizang panaa a kia-suk thupha ~ Yah Liante’ Pu (Travelogue)

Thu patna :: Hihbangaa a lamdang mahmah, tulai hun gengenloh, taanglai pekpan na ngawnaa zong apiang mengmeng ngeilo, “Vaan laaizang panaa a kia-suk thupha” in, a lamdan mahmah zahkhatin, aki gen lam zong ka zakha ngeikei aa, lai tawh aki gelh lam zong, ka mukha ngeikei hi.

Hihbang a lamdang piandanin, Zomite aa dingin, lamkhat teitei panin, phattuamna hong piakha thei ding hicih, upna tawhin ahong gelh ka hi hi.

Ih uang gennop luatna

Ei! Zomite in, thupha hawih, thupha limci, thupha lian, thupha lamdangmah mah ih limh gennop ciangin, ”Van laaizang panaa ahong kia bang,” ih cithei hi. Hih bangaa ih gen ciangin, ih uang genna hi’n, a taktak in, a diakdiakin tuhun ciangin, tuabang thupha ahi, van laaizang panaa ahong kia, cihbang a om ngeikei hi. En, ih tuakngei kei hangin, taangtuanaa upna ah, ih pute lai pekpek hunin, omngei a hihna, LST sung panin, ih theingei bek hi.

LST sung nangawnah zong, ki tamgen hetlo

Tuabang, Van laizang pan aa akia thuphate in, keima theihphaak ciangah:- Abrahamin a tapa, Isaac biakna tau-ah go dingin aki thawi laitak, apaam manggkai lakah, tuutal khat aki piakna; Mawsi in Israel mite Khaa-nan gam a zawtpih laitak, gam simtham ah, Sabbath ni in, Maa-na leh Va-mimsa a khiatna; Mawsi in, a ciangkhut tawh suang asaat ciangin tui phulpah ahihna; EliYAH in, Baal kamsang 450- te tawh biakpiakna aki demna uhah, ama biakpiakna Van laaizang panin meikluang kiasukin kaang ahihna, cihbangte aa ki pan, Van laaizang panin aki khiasuk thuphate mahmah bangin a piang ahi hi.

Hihbang thuphate in, ei, Abraham, Isaac, Yahcobte’ Elohim (Pasian) a umte tuahkhak bek hiaa, biakna dangte in, bangci muh, bangci up, bangci sann cih, ih theihsak kha ngeikei hi.

Keima tuakteek teekngeite

1968- kumin, nasep vai tawh Maw-la-myaing ka tung hi. Khuasung ka vak kawikawi na ah, Taik-inn dawlnih leh a tungsiah khempeuh phial Raw-ka-mann’ inn (Rawkamann Building) kici hi. Tuabang tengbekbek zong, lamdang ka sakhin zo hi.

Nasep ka ki patciangin, ka OC pa in khuasungaa Galkap Unit (Cantonement Area) teng, hong leensak hi. Tuabang kei letna kuamsung ah, Za-khine-gone, Shwe Nattaung Pagoda nunglam kuam khempeuh huamin, Rawkamann tui kholna (Rawkamann Reservoir) cih ana om leuleu hi. Tua in golmah mah ahih manin, a nawl khat pan a nawlkhataa mi pai bang, aakpi cia bangbekin ki mu ciau-ciau bek hi. A zaina in, acre 3,000 valbang hi dingaa, tui a tazah (capacity) in, 200 million gallan bang hiding hi. Tua tuikholna in, Maw-la-myaing khuabuppi tui apia ahi hi.

Tuabang tuikholna tawh ki zomin, Rawkamann’ tenna inn dawlnih aa aki lam, a meeng ziazua leh a kiang nai ah inn tuamtuam tampi tak a omlai hi. A huangin, acre 500 val bang azai ding hi. Tua huang, Rawkamann’ huang (Chian-Garden) a kici ana omlai lai hi.

NB:- Tuabang huangin, Revolutionary Council kumpi in la-tein (confisticate) in, No.104. LIR (Light Infantry Regiment) te Batallian huang dingin zangh uh hi. Rawkamann’ inn bel, Batallian zum dingin ki zangpah hi.

Tuateng baanah, Mawlamyaing khuasung, akhua laaizangaa paak-huan (Paan-chian-Park); Zee (Market); aa ki pan Mawlamyaing khua sungaa munthupi (landmark) teng khempeuh zong, Rawkamann min vive mah pua in, amin ki lawhna in kinei hi. Hihte khempeuhin, keiman ka mittawh ka muh, ka khut tawh ka lawnteek teekte ahi uh hi.

Ka muhloh, ahong ki gen thute

Ka muh ahih kei hangin, ahong ki gen thute in, Rawkamann in, zingsang simin ahuang kongpi gei ah, Mawlamyaing khuasungaa Khutdawhngen(Ta-taungsa) khem peuhte neek ding, an ahawm tawntung hi. Tua baanah, aman Hindu biakna ummah mahin, bawng a biate uh ahih manin, nisimaa khuasungaa aki go ding, bawng teng khempeuh tanh(redeem)in, tuate khawi in vaaklai, kici hi.

Hauh leh cit a thuahkhawm, Rawkamann

Rawkamann in tuabangaa ahih theihna in, bang hang ahi taam? A hauhluat leh a citluat man ahi hi. Tuabang liangaa a hauhtheihna in;

Rawkamann a pianna leh a neulai thu

Rawkamaan’ khanin, aki cianin ka theihlian loh hangin, 1800 beikuan, 1900 ki pat lam ahi hi. Amah, Indian(Kala) mi hi’n, Hinduism Upna(creed) a um mahmah khat ahi hi. Amah tuabangaa a hauhtheihna in, apu apate khang pan aki pansuk, ama khangdong hau in, a nuamsa, cihbang ahi hetkei hi. Rawkamann in a neulai in, pilna lah neilo, zawngmahmah, cihmawh genhtheihna teng a thuakpa ahi hi. Tua ahih manin;

Zanngaak nasep (Night Security Guard)

Ama nasepin, sing-aat set(sawmill) ah, zanngaak nasep a sem hi. Nitak khua mialaa kipan, zingsang khuavak( 06:00 pm – 06:00 am) dong, zaan thapaai, vilkawm ngaakkawmin amah guakin singset angaak ahi hi.

Zanin, a ihmut khak leh;

Amah zong, amah guak ahih si tawh, kuamah dangin vilin ngaksawn tuanlo a hihmanin, zan sungteng ama thuthu ahi hi. Tua ahih manin, khatveivei, kuamah kihtaak ding omlo ci hiding hiam, sing-aatsa aki ciaangte tungah a ih mukha hi. Tuabangaa ahih tawntung, zankhat a manggin;

Rawkamann! Rawkamann! na tung, ento ouh!; Amah zong, tuabangaa aki sam aw-gingin phawngvat in, a tunglam a ettoh pah leh, a tung panin(Van laaizang panin) ippi khat, a dimaa na aki guang phitphet, a kia suk langhlangh amu laizang hi. Aman zong, tua ippi a santoh zawhciangin a hon leh, dangkaa tangh bekbek ana hi hi. Rawkamann hauhna in, tuabang dan panaa aki pan ahi hi, kici hi.

A tanu, Daw Rosy

A tungaa thuteng baanah, keimahmah tuakkhak thute in; Rawkamann in, neih leh lamh bek hilo, zi zong lii tak anei hi. Tua a zite lakah, a zineu penpen tawh tanu khat a nei aa, tua nu in, Daw Rosy ahi hi. Daw Rosy’ pasal in, Kawl sitmah mah, U Ohn Lwin ahi hi. 1968- pawlin Daw Rosy in, kum 70 gualbang apha panbek hi.

Daw Rosy tate! ka lawmte

Tua, Daw Rosy tate, Ko Taung Nyunt leh Ko Soe Myintte unau in, ka lawmtaktakte hi’n, a innuh ah ka hawh, ka baan, ka phak tawntung na bek hikei lai, akhing asa ka nekna ahi hi. Tua ahih manin, ka lawmte nu, Daw Rosy zong tawh ka ki thei mahmah uh hi. Daw Rosy in apa, Rawkamann thu zong ahong genngei zel hi.

Thu khuphna

Hihbang zahta nangawnin Rawkamann thu ka theih mahmah hangin, “ Ama hauhna, Van laaizang panaa akia,” cihthu, ka sangzo naituan kei aa, ei, Zomite taangthu(myth) ahi, Peenglam, Dahpa, Galngam leh Hangsai, Neino, Cing Khuup leh Ngam Bawm, Lengtong Hawih, Maan Dawng, Ngamtawn cihbang dante bangbek dingin ka ngaihsun thei zaw hi.

Banghang hiam cih leh, hihbang na lamdang ahi, “Van laaizang panaa ahong kiasuk thupha,” in, Abraham, Isaac, Yahcob te Pasian(Elohim)in, ana ciilbawl mahmah khat ahi hi. Tuabang na lamdang, Pasianin, amah a ummah mahte tung nangawnah a zat mengmeng lohkhat, amah a theilo, a umlote tungah, bangdingin tungsak laizang ding ahi hiam? cihthu hangin, a sang zolo mah ka hi hi. (Excerpt from Pau Za Mung’s Memoirs)